மாநில அளவிலான இளையோர் வாலிபால் போட்டியின் ஆண்கள் பிரிவில் திருவாரூர் அணியும், பெண்கள் பிரிவில் சேலம் அணியும் சாம்பியன் பட்டத்தை வென்றன.
திருச்சி மாவட்ட வாலிபால் சங்கமும், சாரநாதன் பொறியியல் கல்லூரியும் இணைந்து மாநில அளவிலான இளையோர் வாலிபால் போட்டிகளை கடந்த 7-ம் தேதி முதல் நடத்தின. ஆண்கள் பிரிவில் 27, பெண்கள் பிரிவில் 22 அணிகளும் பங்கேற்ற இப்போட்டியின் இறுதி ஆட்டங்கள் சாரநாதன் கல்லூரி வளாகத்தில் நேற்றிரவு நடைபெற்றன.
ஆண்கள் பிரிவில் திருவாரூர் அணி 25-20, 18-25, 25-14, 25-16 என்ற புள்ளிக் கணக்கில் கிருஷ்ணகிரி அணியை வீழ்த்தி சாம்பியன் பட்டத்தை வென்றது. திருநெல்வேலி அணி மூன்றாவது இடமும், தஞ்சை அணியும் நான்காம் இடமும் பிடித்தன.
அதேபோல, பெண்கள் பிரிவில் சேலம் அணி 25-8, 25-14, 25-19 என்ற புள்ளி கணக்கில் ஈரோடு அணியை வென்று சாம்பியன் பட்டத்தை வென்றது. சென்னை அணி மூன்றா மிடமும், காஞ்சிபுரம் அணி நான்காம் இடமும் பிடித்தன.