பிரெஞ்சு ஓபன் டென்னிஸ்: அரையிறுதியில் ஜோகோவிச்- சானியா, பயஸ் ஜோடிகளும் முன்னேற்றம்

பிரெஞ்சு ஓபன் டென்னிஸ் போட்டியில் கலப்பு இரட்டையர் பிரிவில் இந்தியாவின் சானியா மிர்சா, குரோஷியாவின் இவான் டுடிக் ஜோடி அரையிறுதிக்கு முன்னேறியது.

பாரிஸ் நகரில் நடைபெற்று வரும் இந்த போட்டியில் சானியா மிர்சா ஜோடி காலிறுதி சுற்றில் 6-1,3-6, 10-6 என்ற செட் கணக்கில் சீன தைபேவின் யங் ஜன் ஷான், பெலாரசின் மேக்ஸ் மிர்னி ஜோடியை தோற்கடித்தது. அரையிறுதியில் சானியா ஜோடி, தரவரிசையில் 3-வது இடத்தில் உள்ள பிரான்சின் கிறிஸ்டினா மெலடென்கோவிக், அமெரிக்காவின் பாப் பிரையன் ஜோடியை எதிர்கொள்கிறது.

மற்றொரு காலிறுதியில் இந்தியாவின் லியாண்டர் பயஸ், ஸ்விட்சர்லாந்தின் மார்ட்டினா ஹிங்கிஸ் ஜோடி 6-4, 6-3 என்ற நேர் செட்டில் ரஷ்யாவின் எலினா வெஸ்னினா, பிரேசிலின் புருனோ சோரஸ் ஜோடியை வீழ்த்தி அரையிறுதியில் நுழைந்தது.

ஆடவர் ஒற்றையர் பிரிவில் நம்பர் ஒன் வீரரான செர்பியாவின் ஜோகோவிச், 6-3, 7-5, 6-3 என்ற நேர்செட்டில் தரவரிசையில் 7-வது இடத்தில் உள்ள செக்குடியரசின் தாமஸ் பெர்டிச்சை வீழ்த்தி அரையிறுதியில் நுழைந்தார்.

நேற்று முன்தினம் நடைபெற்ற மகளிர் ஒற்றையர் பிரிவில் உலகின் 4 ம் நிலை வீராங்கனையான ஸ்பெயினின் கார்பைன் முகுருசா 7 5, 6 3 என்ற நேர்செட் கணக்கில் அமெரிக்காவை சேர்ந்த ஷெல்பி ரோஜர்சை வீழ்த்தி அரைஇறுதிக்கு தகுதி பெற்றார்.