தூத்துக்குடி: திருச்செந்தூர் சுப்பிரமணிய சுவாமி கோயில் கந்த சஷ்டி விழாவில், சூரசம்ஹாரம் நேற்று மாலை வெகு விமரிசையாக நடைபெற்றது. சூரபத்மனை வதம் செய்த சுவாமி ஜெயந்தி நாதரை, கடற்கரையில் திரண்டிருந்த லட்சக்கணக்கான பக்தர்கள் ‘அரோகரா’ கோஷம் முழங்க தரிசித்தனர்.
அறுபடை வீடுகளில் 2-ம் படை வீடான திருச்செந்தூர் சுப்பிரமணிய சுவாமி கோயிலில், கந்த சஷ்டி திருவிழா கடந்த 10-ம் தேதி யாகசாலை பூஜையுடன் தொடங்கியது. விழாவின் முக்கிய நிகழ்ச்சியான சூரசம்ஹாரம் நேற்று நடைபெற்றது. அதிகாலை 1 மணிக்கு நடை திறக்கப்பட்டு, விஸ்வரூப தீபாராதனை, உதய மார்த்தாண்ட அபிஷேகம், இதர கால பூஜைகள் நடைபெற்றன. தொடர்ந்து யாகசாலை பூஜைகள் தொடங்கின.
காலை 9 மணிக்குப் பூர்ணாஹுதி தீபாராதனையைத் தொடர்ந்து சுவாமி, அம்மனுக்கு அபிஷேகம், அலங்காரம் நடைபெற்றது. பகலில் மூலவருக்கு உச்சி கால தீபாராதனையும், யாக சாலையில் சுவாமிக்கு மகா தீபாராதனையும் நடைபெற்றது. பின்னர் தங்க சப்பரத்தில் சுவாமி ஜெயந்தி நாதர் யாகசாலையில் இருந்து புறப்பாடாகி, பக்தர்கள் வேல் வகுப்பு, வீரவாள் வகுப்பு பாடல்கள் பாட, மேளவாத்திய இசையுடன் சண்முகவிலாசம் சென்று சேர்ந்தார். அங்கு தீபாராதனையைத் தொடர்ந்து, பிற்பகல் 2 மணியளவில் திருவாவடுதுறை ஆதீன சஷ்டி மண்டபத்தில் சுவாமிக்கு அபிஷேகம், அலங்காரம் நடைபெற்றது.
பிற்பகல் 3.50 மணியளவில் சுவாமி ஜெயந்தி நாதர், சூரபத்மனை வதம் செய்ய போர்க்கோலம் பூண்டு சஷ்டி மண்டபத்தில் இருந்து கடற்கரைக்குப் புறப்பட்டார். அங்கு சூரசம்ஹாரம் தொடங்கியது. முதலில் கஜ முகத்துடன் வந்த சூரபத்மன், சுவாமியை ஆணவத்தோடு 3 முறை வலம் வந்து போரிட்டான். மாலை 4.15 மணிக்கு ஜெயந்தி நாதர் அவனை தனது வேலால் வதம் செய்தார்.
இரண்டாவதாக சிங்க முகத்துடன் வந்த சூரபத்மனை, மாலை 4.37 மணிக்கும், மூன்றாவதாகச் சுயரூபத்துடன் போரிட்ட சூரபத்மனை 4.53 மணிக்கும் சுவாமி வதம் செய்தார். பின்னர் மாமரமாக உருவெடுத்த சூரனை பிளந்து சேவலாகவும், மயிலாகவும் சுவாமி ஆட்கொண்டார்.
அப்போது கடற்கரையில் திரண்டிருந்த லட்சக்கணக்கான பக்தர்கள் ‘வெற்றிவேல் முருகனுக்கு அரோகரா’ என்று பரவசத்துடன் முழக்கமிட்டு தரிசனம் செய்தனர். பின்னர் கடலில் புனித நீராடி விரதத்தை நிறைவு செய்தனர்.
சூரசம்ஹாரம் முடிந்ததும் வள்ளி, தெய்வானையுடன் சுவாமி ஜெயந்தி நாதர் சந்தோஷ மண்டபத்தில் எழுந்தருளினார். அங்கு சுவாமிக்கும் அம்பாளுக்கும் தீபாராதனை நடைபெற்றது. தொடர்ந்து சுவாமி பூஞ்சப்பரத்தில் கிரிபிரகாரம் உலா வந்து கோயில் சேர்ந்தார். இரவில் 108 மகாதேவர் சந்நிதி முன்பு சுவாமிக்குச் சாயா அபிஷேகம் நடைபெற்றது.
தென்மண்டல ஐஜி விஜயேந்திர பிதரி, திருநெல்வேலி சரக டிஐஜி திருநாவுக்கரசு, தூத்துக்குடி எஸ்.பி. சிவபிரசாத் தலைமையில் 4,100 போலீஸார் பாதுகாப்புப் பணியில் ஈடுபட்டனர். கந்த சஷ்டி விழாவின் 7-ம் நாளான இன்று (நவ.16) சுவாமி குமரவிடங்கப் பெருமான் - தெய்வானை அம்பாள் திருக்கல்யாணம் நடைபெறுகிறது.