ஹிருத்திக் ரோஷன் தயாரித்துள்ள வெப் தொடர் ‘ஸ்டோர்ம்’. அமேசான் பிரைம் வீடியோவில் ஒளிபரப்பாக இருக்கும் இத்தொடரில் பார்வதி திருவோத்து, அலயா எஃப், சிருஷ்டி ஸ்ரீவஸ்தவா, ரமா சர்மா, சபா ஆசாத் ஆகியோர் நடித்துள்ளனர்.
அஜித் பால் சிங் இயக்கியுள்ள இத்தொடர், மும்பை பின்னணியில் ஆக் ஷன் த்ரில்லராக உருவாகியுள்ளது. வீட்டுவசதித் திட்ட மோசடியில் சிக்கிக் கொள்ளும் 5 பெண்களின் போராட்டமே இத்தொடர் என்கிறார்கள்.
இதில் நடித்தது பற்றி பார்வதி திருவோத்து கூறும்போது, “பிரைம் வீடியோ போன்ற தளங்களில் ஒரு படைப்பின் அங்கமாக இருப்பது கூடுதல் பொறுப்பைத் தருகிறது. கதையின் நோக்கம் சிதையாமல் நேர்மையாகவும் அனைவரையும் கவரும் வகையிலும் இருக்க வேண்டியது அவசியம். நடிகர் ஹிருத்திக் ரோஷன் தயாரித்துள்ள இத்தொடரில் நானும் இணைந்திருப்பதைப் பெருமையாகக் கருதுகிறேன்.
ஒரு கதையை அதன் உண்மைத்தன்மை மாறாமல், ரிஸ்க் எடுத்து உருவாக்கும் தயாரிப்பாளர்கள் இருக்கும் போது, நடிகர்களுக்கு அதிக சுதந்திரம் கிடைக்கிறது. வெறும் நடிப்பு என்பதைத் தாண்டி, ஒரு கதாபாத்திரத்தின் ஆழத்தை வெளிப்படுத்த இத்தொடர் வழிவகுத்துள்ளது. என்னைப்போன்ற சவால்களை விரும்பும் நடிகர்களுக்கு இத்தகைய ஆதரவு மிகவும் முக்கியம்” எனத் தெரிவித்துள்ளார்.