கொரியாவில் வரவேற்பைப் பெற்ற வெப் தொடர், ‘ஹியர் வி கோ அகைன்’. இத்தொடரைத் தழுவி உருவாகியுள்ள வெப் தொடர், ‘லவ் ஆல்வேஸ்’. காதல், குடும்பம், நகைச்சுவை மற்றும் வயதை தலைகீழாக மாற்றும் விசித்திரமான திருப்புமுனையுடன் உருவாகியுள்ள இத்தொடர் தமிழ் ஹாட்ஸ்டார் ஸ்பெஷல் ஆகும். இதன் டீஸர் வெளியிடப்பட்டுள்ளது. ரிலீஸ் தேதி விரைவில் அறிவிக்கப்பட இருக்கிறது.
கிராஸ் பிக்சர்ஸ் மற்றும் குரு பிலிம்ஸ் இணைந்து தயாரித்துள்ள இத்தொடரில், கவுரி கிஷன், ரம்ஜான் முகமது, ஜெயப்பிரகாஷ், ஜெயசுதா, மாயாகிருஷ்ணன் என பலர் நடித்து உள்ளனர். இத்தொடரில் நடித்தது பற்றி கவுரி கிஷன் கூறும்போது, “இது ஒரு புதுமையான கதைக் களம். அதே நேரம், நகைச்சுவை, உணர்ச்சிகள், உறவுகள் என எல்லாமே நமக்கு நெருக்கமாக இருக்கும்.
வழக்கமான உணர்வுகளை முற்றிலும் புதிய கோணத்தில் பார்க்க முடிகிறது என்பதுதான் என்னை இந்த தொடருக்குள் கொண்டு வந்தது. இதில் வரும் ‘வயது மாறும்’ பின்னணி, கதையில் நிறைய கலகலப்பான விஷயங்களைச் சேர்த்துள்ளது. அதனுள்ளே காதல், குடும்பம், ஏக்கம் என இதயத்தைத் தொடும் அம்சங்கள் நிறைந்துள்ளன. ரசிகர்கள் இந்த உணர்வுப் பூர்வமான பயணத்தைக் கண்டிப்பாக ரசிப்பார்கள்” என்றார்.