மும்பை: ரயிலில் பாலியல் தொல்லை கொடுத்தவரை எதிர்த்த இளம் பெண் கீழே தள்ளிவிடப்பட்டதில் தனது இடது கையை இழந்தார். இச்சம்பவத்தில் ஈடுபட்ட நபரை காவல் துறையினர் கைது செய்துள்ளனர்.
போரிவலியிலிருந்து விரார் நோக்கிச் சென்ற மும்பை புறநகர் ரயிலில் பாதிக்கப்பட்ட இளம் பெண் பயணித்துள்ளார். அப்போது, அதே பெட்டியில் இருந்த ஒரு நபர் அப்பெண்ணிடம் தொடர்ச்சியாக தவறான முறையில் நடந்துகொண்டு பாலியல் தொல்லை அளித்துள்ளார். கோபமடைந்த பெண் தனது செருப்பை அவர் மீது வீசியதால் வாக்குவாதம் மூண்டது. அங்கிருந்த பயணிகள் தலையிட முயன்றனர். ஆனால் அந்த நபர் திட்டியபடியே தனது செருப்பை பெண் மீது வீசியுள்ளார்.
குற்றவாளி கைது
ரயில் நைகான் நிலையத்தை அடைந்தபோதும் வாக்குவாதம் தொடர்ந்தது. அப்போது, ஆத்திரமடைந்த அந்த நபர் பெண்ணை ரயிலில் இருந்து கீழே தள்ளிவிட்டுள்ளார். இரு பெட்டிகளுக்கு இடையிலான இடைவெளியில் விழுந்த அப்பெண், மீண்டும் நடைமேடைக்கு ஏற முயன்றார்.
ஆனால், அதற்குள் ரயில் நகரத் தொடங்கியதால் அவரது இடது கை சக்கரங்களுக்கு இடையே சிக்கித் துண்டானது. மேலும், அவரது தலையில் பலத்த காயம் ஏற்பட்டு 16 தையல்கள் போடப்பட்டன. சம்பவ இடத்தில் நிலவிய பதற்றத்தைப் பயன்படுத்தித் தப்பிய குற்றவாளியை ரயில்வே காவல் துறையினர் சில மணி நேரத்திற்குள் கைது செய்தனர்.
மருத்துவமனையில் தீவிர சிகிச்சை பெற்றுவரும் அப்பெண், “எனது வாழ்க்கை சீரழிந்துவிட்டது, எனக்குக் கண்டிப்பாக நீதி வேண்டும்” என உருக்கமாகக் கேட்டுக்கொண்டுள்ளார். இச்சம்பவத்தில் காவல்துறையினர் கொலை முயற்சி வழக்கைப் பதிவு செய்யவில்லை எனப் பெண்ணின் குடும்பத்தினர் குற்றம் சாட்டினர். இதைத் தொடர்ந்து, ரயில்வே காவல் துறையினர் உரிய சட்டப்பிரிவுகள் விரைவாகச் சேர்க்கப்படும் என உறுதியளித்துள்ளனர்.