புதுடெல்லி: பிரதமர் மோடி தலைமையிலான அரசுக்கு எதிராக போராட்டம் நடத்துவதற்கு கரப்பான் பூச்சி ஜனதா கட்சிக்கு (சிஜேபி) அமெரிக்காவில் இருந்து நன்கொடை வழங்கப்படுவதாக அந்நாட்டின் பிரபல பாடகி மேரி மில்பென் குற்றம் சாட்டியுள்ளார்.
இந்தியாவின் தலைமைத் தேர்தல் ஆணையர் ஞனேஷ் குமாருக்கு எதிராக இண்டியா கூட்டணி மற்றும் கரப்பான் பூச்சி ஜனதா கட்சி (சிஜேபி) நடத்தி வரும் போராட்டங்களின் பின்னணியில் வெளிநாட்டு சதி இருப்பதாக பாஜக தலைவர்கள் குற்றம் சாட்டி வருகின்றனர். இந்நிலையில், சிஜேபிக்கு அமெரிக்காவைச் சேர்ந்த சிலர் நிதி அளிப்பதாக அந்நாட்டின் பிரபல பாடகி மேரி மில்பென் குற்றம் சாட்டியுள்ளார்.
இது தொடர்பாக அவர் சமூக வலைத்தளத்தில் வெளியிட்ட பதிவில் கூறியிருப்பதாவது: அமெரிக்காவை தளமாகக் கொண்ட நன்கொடையாளர்கள், தாங்கள் இலக்காகக் கொண்ட நாடுகளில் குழப்பத்தையும் அமைதியின்மையையும் ஏற்படுத்துவதற்காக ஒரு நடைமுறையைப் பின்பற்றி வருகின்றனர். அதன்படி, அவர்கள் முதலில் பழமைவாத உலகத் தலைவர்களை குறிவைப்பார்கள்.
பின்னர் அந்த நாட்டைச் சேர்ந்த, அமெரிக்காவில் கல்வி கற்ற ஒருவரைத் தேர்வு செய்து அவரை தீவிரப்படுத்துவார்கள். அதன் பிறகு அவரை மீண்டும் அந்த நாட்டுக்கு அனுப்பி, குழப்பமும் அழிவும் ஏற்படுத்த நிதியளிப்பார்கள். இத்தகைய சதித் திட்டங்கள் பெரும்பாலும் தோல்வியடைந்தாலும், அவை சம்பந்தப்பட்ட நாடுகளின் வளர்ச்சி மற்றும் நிர்வாகத்தில் பெரும் பாதிப்பை ஏற்படுத்துகின்றன.
புதிய குரல்கள் எழ வேண்டும்
இந்தியாவின் ஆட்சியை சீர்குலைக்க வெளிநாட்டு சக்திகள் மேற்கொள்ளும் முயற்சிகளை முறியடிக்க இந்தியர்கள் குரல் கொடுக்க வேண்டும். இந்திய இளம் தேசபக்தர்கள் எழுச்சி பெற வேண்டும். இந்திய மண்ணில் பிறந்து, வளர்ந்து, கல்வி கற்ற புதிய குரல்கள் இந்தியாவில் எழ வேண்டும். அவர்கள் ஒன்றிணைந்து, சிஜேபியின் சீர்குலைவு மனப்பான்மைக்கு எதிராக அமைதியான முறையில் போராட வேண்டும். ஜனநாயகத்தையும் சுதந்திரத்தையும் பாதுகாக்க எப்போதும் ஒரு எதிர் இயக்கம் இருக்க வேண்டும். இவ்வாறு மேரி மில்பென் கூறினார்.