காஜியாபாத்: உத்தர பிரதேசத்தை பூர்விகமாகக் கொண்ட சபா ஹைதர் 42), அமெரிக்க நாடாளுமன்ற் பிரதிநிதிகள் சபை தேர்தலில் வெற்றிபெற்று எம்பியாகி உள்ளார்.
அமெரிக்க நாடாளுமன்றத்தின் பிரதிநிதிகள் சபையின் 435 இடங்களுக்கும், செனட் சபையின் 35 இடங்களுக்கும் கடந்த 3-ம் தேதி பொதுத்தேர்தல் நடைபெற்றது. இந்த தேர்தலில் இந்திய வம்சாவளியைச் சேர்ந்த பலர் வெற்றி பெற்று எம்பியாகி உள்ளனர். இதில் உத்தர பிரதேசத்தை பூர்விகமாகக் கொண்ட சபா ஹைதரும் ஒருவர். அவர், பிரதிநிதிகள் சபையின் இல்லினாய்ஸ் 84-வது தொகுதியில் வெற்றிபெற்று எம்பியாகி உள்ளார்.
யார் இவர்?
உத்தர பிரதேசத்தின் காஜியாபாத்தை சேர்ந்த சபா ஹைதர் அங்குள்ள ஹோலி சைல்டு பள்ளியில் பள்ளிக் கல்வியை நிறைவு செய்தார். அலிகர் முஸ்லிம் பல்கலைக்கழகத்தில் வனவிலங்குகள் அறிவியலில் தங்கப்பதக்கம் வென்றார். அவரது கணவர், உத்தர பிரதேசத்தின் புலந்தஷார் பகுதியைச் சேர்ந்தவர். அமெரிக்காவின் இல்லினாய்ஸ் மாகாணம், அரோராவில் குடும்பத்துடன் வசிக்கும் சபா ஹைதர், யோகா பயிற்சியாளராகப் பணியாற்றுகிறார்.
கடந்த 2022-ம் ஆண்டில் அவர் டுபேஜ் கவுன்டி உள்கட்சித் தேர்தலில் போட்டியிட்டு 1,000 வாக்குகள் வித்தியாசத்தில் தோற்றார். 2024-ம் ஆண்டு உள்ளாட்சித் தேர்தலில் வெற்றி பெற்றார். தற்போது பிரதிநிதிகள் சபையின் இல்லினாய்ஸ் 84-வது தொகுதியில் ஜனநாயக கட்சி சார்பில் எம்பியாகி உள்ளார்.
வெள்ளையின மக்கள் பெரும்பான்மையாக உள்ள பகுதியில் வெற்றி பெற்றிருப்பதன் மூலம் தொகுதியின் முதல் தெற்காசிய பெண் எம்பி என்ற பெருமையைப் பெற்றுள்ளார்.
‘அம்மா... ஜெயிச்சுட்டேன்...’
உத்தர பிரதேசத்தின் காஜியாபாத்தில் வசிக்கும் சபா ஹைதரின் தாய் ஷெஹ்னாஸ் ஹைதர் பிடிஐ செய்தி நிறுவனத்துக்கு அளித்த பேட்டியில்,‘‘வாக்கு எண்ணிக்கை நடைபெற்ற நாளின் இரவில் நாங்கள் தூங்கவே இல்லை.
அடுத்தநாள் காலை 6.30 மணிக்கு சபா ஹைதரிடம் இருந்து போன் அழைப்பு வந்தது. “அம்மா.. நான் ஜெயிச்சிட்டேன்” என்று அவள் கூறினாள். அப்போது எனது மகிழ்ச்சிக்கு அளவே இல்லை. எனது முதிர் வயதிலும் நாற்காலியில் இருந்து எழுந்து துள்ளி குதித்துவிட்டேன்,’’ என்று கூறியுள்ளார்.