திருப்பரங்குன்றம் தீபத்தூண்

 

கோப்புப் படம்

இந்தியா

திருப்பரங்குன்றம் தீபத்தூணில் தீபம் ஏற்ற நிபந்தனைகளுடன் உச்ச நீதிமன்றம் அனுமதி

மோகன் கணபதி

புதுடெல்லி: திருப்பரங்குன்றம் மலையில் உள்ள தீபத்தூணில் தீபம் ஏற்ற அனுமதிக்கும் சென்னை உயர் நீதிமன்றத்தின் தீர்ப்புக்கு இடைக்கால தடை விதித்த உச்ச நீதிமன்றம், ஒருமுறை நடவடிக்கையாக வரும் கார்த்திகை தீபத்தன்று மட்டும் தீபத்தூணில் தீபம் ஏற்ற நிபந்தனைகளுடன் அனுமதித்துள்ளது. எனினும், இந்த அனுமதி என்பது இந்த வழக்கின் இறுதி ஒப்புதலாகக் கருதப்படக் கூடாது என்று உச்ச நீதிமன்றம் தெளிவுபடுத்தியுள்ளது.

திருப்​பரங்​குன்​றம் மலை​யில் உள்ள கல்​தூணில் தீபம் ஏற்ற அனுமதி அளித்து சென்னை உயர் நீதி​மன்​றம் அளித்த தீர்ப்பை எதிர்த்து தமிழக அரசு மற்​றும் தர்கா நிர்​வாகம் தரப்​பில் உச்ச நீதி​மன்​றத்​தில் மேல்​முறையீடு தாக்கல் செய்​யப்​பட்​டது.

அதேபோல், கார்த்​திகை திருநாளன்று பக்​தர்​கள் அனைவரை​யும் மலை​யில் தீபம் ஏற்ற அனுமதிக்​கக் கோரியும், தொல்​லியல் துறை அனுமதி பெற வேண்​டும் என்ற சரத்​துக்கு எதிராகவும் ராம ரவிக்​குமார் என்​பவர் உச்ச நீதி​மன்​றத்​தில் மேல்​முறையீடு செய்​திருந்​தார்.

இந்த மனுக்​களை உச்ச நீதி​மன்ற நீதிப​தி​கள் அர​விந்த் குமார், விபுல்.எம்.பஞ்​சோலி ஆகியோர் அடங்​கிய அமர்வு விசா​ரித்தது. இரு தரப்பும் மூன்று நாட்கள் தங்கள் வாதங்களை முன்வைத்தனர்.

இரு தரப்பு வாதங்களைக் கேட்ட நீதிபதிகள் இன்று இடைக்கால உத்தரவைப் பிறப்பித்துள்ளனர். நீதிபதிகள் தங்கள் உத்தரவில், “திருப்பரங்குன்றம் மலையில் உள்ள தீபத்தூணில் தீபம் ஏற்ற ஒருமுறை மட்டும் அனுமதி அளிக்கப்படுகிறது. எனவே, வரும் கார்த்திகை தீபத்தன்று (நவம்பர் 24) ஒருநாள் தீபத்தூணில் தீபம் ஏற்ற அனுமதிக்கப்படுகிறது.

அதேநேரத்தில், ஒருமுறை அனுமதி அளிப்பது பின்னாளில் ஒரு முன்னுதாரணமாக மாறிவிடக்கூடும் என்பதால் ஏற்படும் அபாயங்களை நீதிமன்றம் உணர்ந்திருக்கிறது. எனினும், உயர் நீதிமன்றத்தின் இரு வெவ்வேறு அமர்வுகள் தீபம் ஏற்ற அனுமதி அளித்திருப்பதை நீதிமன்றம் கவனத்தில் கொள்கிறது.

அதேசமயம், தீபத்தூணில் தீபம் ஏற்றுவதை ஒரு இன்றியமையாத நடைமுறையாக உறுதி செய்து கடந்த ஜனவரி 6 அன்று சென்னை உயர் நீதிமன்றம் வழங்கிய தீர்ப்பின் இறுதி கருத்துக்களுக்கு தடை விதிக்கப்படுகிறது.

நவம்பர் 24 அன்று தீபம் ஏற்றும் குழுவில் இடம் பெறுபவர்களை கோயில் நிர்வாகம் மட்டுமே தீர்மானிக்க வேண்டும். இந்த நிகழ்வுக்கான பொறுப்பு அதிகாரியாக மதுரை மாவட்ட ஆட்சியர் செயல்படுவார். பாதுகாப்பு ஏற்பாடுகளை மதுரை மாவட்ட காவல் ஆணையர் மேற்கொள்ள வேண்டும். தேவைப்பட்டால், மத்திய ரிசர்வ் காவல் படை வீரர்களைக் கொண்டு பாதுகாப்பை பலப்படுத்த மத்திய அரசு நடவடிக்கை எடுக்க வேண்டும்.

ஊர்வலங்கள் நடத்தவோ, முழக்கங்களை எழுப்பவோ அல்லது பொதுமக்கள் ஒன்றுகூடவோ அனுமதி இல்லை. தீபம் ஏற்றும் இடத்துக்கு அங்கீகரிக்கப்பட்ட நபர்களுக்கு மட்டும் அனுமதி அளிக்கப்படுகிறது.

தீபம் ஏற்றியவுடன் அந்த குழுவினர் உடனடியாக தீபத்தூண் பகுதியில் இருந்து வெளியேற வேண்டும். அங்கு தற்காலிகமான அல்லது நிரந்தரமான எந்தவொரு அமைப்பையும் விட்டுச்செல்லக்கூடாது.

மலையில் உள்ள தர்கா உட்பட எந்தவொரு மதச் சின்னத்திற்கும் எவ்வித சேதமோ அல்லது மாற்றமோ செய்யக்கூடாது. தர்காவுக்குச் செல்லும் பக்தர்களின் வழிபாடடு உரிமையிலோ அல்லது அவர்கள் தர்காவை பயன்படுத்துவதிலோ எந்தவித இடையூறும் செய்யக்கூடாது.

தீபத்தூண் மீது விளக்கேற்ற அனுமதிக்கும் இந்த இடைக்கால உத்தரவு யாருக்கும் எந்தவொரு சட்டப்பூர்வமான உரிமையையும் வழங்காது. வரும் ஆண்டுகளில் இதை ஒரு முன்னுதாரணமாகக் கருதக்கூடாது.

மாநில அரசு எழுப்பிய சிக்கல்கள் குறித்து தொடர்ந்து விசாரணை நடத்தப்படும். நவம்பர் 24 ன்று தீபத்திருவிழா நடைபெற உள்ள நிலையில், உடனடி மற்றும் அசாதாரண சூழலைக் கருத்தில் கொண்டே இந்த தற்காலிக ஏற்பாடு செய்யப்பட்டுள்ளது.

நவம்பர் 24ம் தேதிக்கான இந்த அனுமதி, ஒரு இன்றியமையாத மத நடைமுறையாக அங்கீகரிக்கப்பட்டதாக எவரும் கருதவோ அல்லது முடிவு செய்யவோ கூடாது. வெவ்வேறு நம்பிக்கை கொண்டவர்கள் ஒருவருக்கொருவர் பரஸ்பர மரியாதையுடன் தங்கள் மத உரிமைகளைப் பின்பற்ற வேண்டும்.

இந்த நிகழ்வு முடிந்த மூன்று நாட்களுக்குள் இது குறித்த நிலை அறிக்கையை மாவட்ட ஆட்சியர் நீதிமன்றத்தில் சமர்ப்பிக்க வேண்டும்.” என தெரிவித்துள்ளனர். மேலும், இந்த வழக்கின் அடுத்தகட்ட விசாரணையை 2027ம் ஆண்டு ஜனவரி மாதத்தின் இரண்டாவது வரத்துக்கு நீதிபதிகள் ஒத்திவைத்தனர்.

இரு தரப்பும் முன்வைத்த வாதங்கள்:

மதுரை மாவட்ட ஆட்சியர் தரப்பில் ஆஜரான மூத்த வழக்கறிஞர் கோபால் சங்கர நாராயணன் நேற்று முன்தினம் முன்வைத்த வாதத்தில், ‘‘தர்கா அருகே உள்ள கல்தூண் தீபத்தூண் கிடையாது. அது ஆங்கிலேயர் ஆட்சிக் காலத்தில் நிலங்களை அளவீடு செய்வதற்காக அமைக்கப்பட்ட எல்லைக் கல்.

தமிழகத்தின் பல்வேறு மலைப் பகுதிகளிலும் இதுபோன்ற நில அளவீட்டுக் கற்கள் உள்ளன. திருப்பரங்குன்றத்தில் உள்ள கல்தூணும் இன்று வரை நில அளவீட்டுக் கல்லாகவே பயன்படுத்தப்பட்டு வருகிறது. கல்தூண் பகுதிக்குச் செல்வதற்கான வழி தர்கா நிர்வாகத்துக்குச் சொந்தமானது’’ என்று வாதிட்டார்.

அப்போது நீதிபதிகள், ‘‘அந்தக் கல்தூண் அமைந்துள்ள இடம் கோயில் நிர்வாகத்துக்குச் சொந்தமானதா, இல்லையா?’’ என்று நேரடியாகக் கேள்வி எழுப்பினர்.

அதற்கு, ‘‘அதிகாரிகளிடம் கேட்டுத் தெரிவிக்கிறோம்’’ என்று மாவட்ட ஆட்சியர் தரப்பு வழக்கறிஞர் கோபால் சங்கரநாராயணன் கூறினார். இந்த பதிலில் அதிருப்தி அடைந்த நீதிபதிகள், ‘‘மாவட்ட ஆட்சியர் என்ற முறையில், அந்த இடம் கோயிலுக்குச் சொந்தமானதா இல்லையா என்பதை ஒரே வார்த்தையில் கூறுங்கள்’’ என்று மீண்டும் வலியுறுத்தினர்.

இதையடுத்து, வழக்கறிஞர் கோபால் சங்கரநாராயணன், ‘‘அந்த இடம் கோயில் நிர்வாகத்துக்குச் சொந்தமானதுதான்’’ என்று தெரிவித்தார்.

அதன்பின்னர், சிக்கந்தர் தர்கா தரப்பில் ஆஜரான வழக்கறிஞர் ஹசீஃபா அகமதி, ‘‘மன்னர்கள் காலம் தொடங்கி ஆங்கிலேயர் ஆட்சி மற்றும் இந்திய அரசாங்கத்தின் காலம் வரையிலான ஆவணங்களில் தர்காவுக்குச் சொந்தமான நிலங்கள் வரையறுக்கப்பட்டுள்ளன.

குறிப்பாக, 1862 முதல் 1923-ம் ஆண்டு வரையிலான உத்தரவுகள் தற்போதைய வழிபாட்டு நடைமுறைகளை உறுதிப்படுத்துகின்றன. நெல்லித்தோப்பு முதல் தர்கா வரையிலான பகுதி, படிக்கட்டுகள், தர்கா அமைந்துள்ள இடம் மற்றும் கொடியேற்றும் பகுதி ஆகியவை தர்காவுக்குச் சொந்தமானவை.

கல் தூணுக்கும் தர்காவுக்கும் 20 மீட்டர் தொலைவுதான் உள்ளது. சென்னை உயர் நீதிமன்ற உத்தரவால் எங்களது தரப்புதான் அதிகம் பாதிக்கப்பட்டுள்ளது. எனவே, அந்த தீர்ப்புக்குத் தடை விதிக்க வேண்டும்’’ என்று வலியுறுத்தினார்.

இருதரப்பு வாதங்களையும் கேட்ட நீதிபதிகள், வழக்கு விசாரணையை நேற்று (நவ.19) பிற்பகல் 2 மணிக்கு ஒத்திவைத்தனர்.

நேற்று 3-வது நாள் விசா​ரணை​யின்​போது, சிக்​கந்​தர் தர்கா அரு​கில் தீபம் ஏற்​றக் கூடாது என வலியுறுத்தி அரங்கநாதன் என்​பவர் சார்​பில் ஆஜரான மூத்த வழக்​கறிஞர் நரேந்​திர ஹூடா வாதிடும்​போது, “மத நல்​லிணக்​கத்தை சீர்​குலைக்​கும் நோக்​கில் கடந்த, 1862, 1902 ஆகிய ஆண்​டுகளில் சிலர் தர்கா அரு​கில் தீபம் ஏற்ற முயன்றபோது அது தடுக்​கப்​பட்​டது.

இதையடுத்து, 1994-ம் ஆண்டு தர்கா அரு​கில் தீபம் ஏற்ற வேண்​டும் எனக் கோரி தாக்​கல் செய்​யப்​பட்ட வழக்கை விசா​ரித்த சென்னை உயர் நீதி​மன்​றம், தர்கா அரு​கில் தீபம் ஏற்​று​வது மரபு கிடை​யாது, எனவே கோரிக்கை ஏற்க முடி​யாது என தெளிவுபடுத்​தி​யுள்​ளது.

அதேபோல், தர்கா சார்​பில் நெல்​லித் தோப்பு பகுதி​யில் விலங்​கு​களை பலி​யிட்டு வழிபட அனுமதிக்க முடி​யாது. நூற்​றாண்டு பழமையான நடைமுறையை மாற்ற முடி​யாது, கடைபி​டிக்​கப்​படாத புதிய மரபு​களை மத வழிபாடு எனக்​கூறி சேர்க்​கவும் முடி​யாது என திட்​ட​வட்​ட​மாக கூறியுள்​ளது.

மேலும், மலை​யில் உள்ள கோயிலுக்கு அருகேதான் 150 ஆண்​டுகளுக்கு மேலாக தீபம் ஏற்​றப்​பட்டு வரு​கிறது. தர்கா அருகே தீபம் ஏற்​றப்​பட்ட வரலாறு கிடை​யாது, எனவே, தர்கா அருகே உள்ள கல்​தூணில் தீபம் ஏற்ற வேண்​டும் என்று கூறு​வதை ஏற்க முடி​யாது. தற்​போது கல்​தூணில் தீபம் ஏற்ற அனுமதித்​தால் பின்​னர் அங்கு வழிபாடு நடத்த அனுமதிக்க வேண்​டும் என்ற கோரிக்கை வைப்​பார்​கள், இது பிரச்​சினைகளுக்கு வழி வகுக்​கும்” என வாதிட்​டார்.

ராம ரவிக்​குமார் சார்​பில் ஆஜரான மூத்த வழக்​கறிஞர் வள்​ளியப்​பன் மற்​றும் வழக்​கறிஞர் லக் ஷ்​மண் ராஜா ஆகியோர், “தர்​கா​வுக்கு படிக்​கட்​டுகள், கொடிமரம், புது மண்​டபம் என அனைத்​தையும் சேர்த்து 86 சென்ட் நிலம்​தான் சொந்​த​மாக உள்​ளது, ஆனால், கோயிலுக்கு 171.17 ஏக்​கர் நிலம் உள்​ளது, அந்த குறிப்​பிட்ட கல்​தூண் கோயில் நிலத்​தில் அமைந்​துள்​ளது. அதில்​தான் தீபம் ஏற்ற வேண்​டும் என கோரு​கிறோம்.

தற்​போது குறிப்​பிட்ட கல் தூணில் விளக்கு ஏற்​றும் வகையில் குழிவான அமைப்பு இருக்​கின்​றது அதில் நெய் ஊற்றி திரியை வைத்து தீபம் ஏற்​றினால் இரண்டு மணி நேரம் தீபம் அணை​யாமல் எரியும். தமிழகத்​தில் மருதமலை, சுவாமிமலை, பழனி மலை முருகன் கோயில்​களி​லும் இவ்​வாறுதான் தீபம் ஏற்​றப்​படு​கிறது. ஆண்​டுக்கு ஒரு நாள் 2 மணி நேரம் மட்​டும் அந்த குறிப்​பிட்ட கல்​தூணில் தீபம் ஏற்​று​வ​தால் யாருக்கு என்ன பிரச்​சினை ஏற்​பட்டு விடப்​போகிறது” என தெரி​வித்​தனர் என்பது குறிப்பிடத்தக்கது.

Amazon.in: ஆன்லைன் ஷாப்பிங் - இலவச ஷிப்பிங் வசதி.

SCROLL FOR NEXT