புதுடெல்லி: புதிய வாக்காளர்கள் மற்றும் எஸ்ஐஆர்-ல் விடுபட்டவர்களை சேர்ப்பதற்காக தமிழகம் உட்பட 17 மாநிலங்கள், யூனியன் பிரதேசங்களில் சிறப்பு சுருக்கத் திருத்தம் (எஸ்எஸ்ஆர்) மேற்கொள்ள இந்திய தேர்தல் ஆணையம் உத்தரவிட்டுள்ளது.
நாடு முழுவதும் பல்வேறு கட்டங்களாக வாக்காளர் பட்டியல் சிறப்பு தீவிர திருத்த பணிகள் (எஸ்ஐஆர்) மேற்கொள்ளப்பட்டு வருகின்றன. இதில் பல்வேறு குளறுபடிகளும், முறைகேடுகளும் இருப்பதாகவும், 13 கோடி வாக்காளர்கள் நீக்கப்பட்டு இருப்பதாகவும் எதிர்க்கட்சிகள் தொடர்ந்து குற்றம் சாட்டி வருகின்றன. இந்த முறைகேடுகளுக்கு பொறுப்பேற்று தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று வலியுறுத்தி இண்டியா கூட்டணி கட்சிகளும், கரப்பான் பூச்சி ஜனதா கட்சியும் (சிஜேபி) தொடர் போராட்டங்களை நடத்தி வருகின்றன.
இண்டியா கூட்டணி தலைவர்கள் குடியரசுத் தலைவர் திரவுபதி முர்முவிடம் மனு அளித்தது மட்டுமல்லாமல், உச்ச நீதிமன்றத்திலும் வழக்கு தொடர்ந்துள்ளனர். மக்களவை எதிர்க்கட்சி தலைவர் ராகுல்காந்தி சார்பில் தாக்கல் செய்த இந்த மனு நேற்று விசாரணைக்கு வந்த போது உரிய பதில் அளிக்க தேர்தல் ஆணையத்திற்கு உச்ச நீதிமன்றம் உத்தரவிட்டது.
இந்த சர்ச்சைகளுக்கு மத்தியில் நேற்று புதிய திருப்பமாக புதிய வாக்காளர்கள் மற்றும் எஸ்ஐஆர்-ல் விடுபட்டவர்களை சேர்ப்பதற்காக தமிழ்நாடு உட்பட 17 மாநிலங்கள், யூனியன் பிரதேசங்களில் சிறப்பு சுருக்கத் திருத்தம் (எஸ்எஸ்ஆர்) மேற்கொள்ள இந்திய தேர்தல் ஆணையம் உத்தரவிட்டுள்ளது.அதன்விவரம் வருமாறு;
>> சிறப்பு சுருக்கத் திருத்தம் தமிழகம், மேற்கு வங்கம், உத்தர பிரதேசம், பஞ்சாப் மற்றும் பிஹார் உள்ளிட்ட 17 மாநிலங்கள், யூனியன் பிரதேசங்களில் நடத்தப்பட உள்ளது. இதில் சேர்க்கப்பட வேண்டியவர்களுக்கான தகுதி நாளாக ஜனவரி 1, 2027 நிர்ணயிக்கப்பட்டுள்ளது.
>> நவம்பர் 2-ம் தேதிக்குள் வாக்குச்சாவடிகள் மறுசீரமைக்கப்படும். நவம்பர் 12-ம் தேதி வரைவு வாக்காளர் பட்டியல் வெளியிடப்படும். கோரிக்கைகள் மற்றும் ஆட்சேபனைகளை நவம்பர் 12 முதல் டிசம்பர் 11 வரை தாக்கல் செய்யலாம். இவற்றின் மீது டிசம்பர் 28-ம் தேதிக்குள் முடிவு எடுக்க வேண்டும். இறுதி வாக்காளர் பட்டியல் 2027 ஜனவரி 4 அன்று வெளியிடப்படும். 2027 ஜனவரி 1 தகுதித் தேதிக்கான கோரிக்கைகளுடன் ஏப்ரல் 1, ஜூலை 1 மற்றும் 2027 அக்டோபர் 1 ஆகிய மூன்று பிந்தைய தகுதித் தேதிகளுக்கான முன்கூட்டிய விண்ணப்பங்களையும் தேர்தல் பதிவு அலுவலர்கள் ஏற்றுக்கொள்வார்கள்.
>> பெயர் சேர்க்க வேண்டியவர்கள் படிவம் 6 மூலம் விண்ணப்பிக்க வேண்டும்.
>> மொத்த வாக்காளர்களில் 2 சதவீதத்துக்கும் அதிகமான பெயர் நீக்கங்கள் முன்மொழியப்பட்டால், தேர்தல் பதிவு அதிகாரிகள் அவற்றை நேரடியாகச் சரிபார்க்க வேண்டும். எந்தவொரு வாக்குச்சாவடியிலும் 1,200 வாக்காளர்களுக்கு மேல் இருக்கக்கூடாது. வாக்காளர்கள் இரண்டு கிலோமீட்டருக்கு மேல் பயணிக்கவோ அல்லது இயற்கை தடைகளைக் கடக்கவோ தேவையில்லை, மேலும் வாக்குச்சாவடிகள் தரைத்தளத்தில் அமைய வேண்டும்.
>> ஒரே கதவு அல்லது ஒரே அடுக்குமாடி எண் கொண்ட குடும்பங்கள், வெவ்வேறு பிரிவுகளிலோ அல்லது வாக்குச்சாவடிகளிலோ பிரிக்கப்படக்கூடாது.
>> ஒரே நபர் ஐந்துக்கும் மேற்பட்ட எதிர்ப்புகளை அளித்திருந்தாலும், தேர்தல் பதிவு அதிகாரிகள் தனிப்பட்ட முறையில் ஆய்வு செய்ய வேண்டும். ஒவ்வொரு நீக்கல் வழக்கிலும் சம்பந்தப்பட்ட நபருக்கு விளக்கம் அளிக்கும் வாய்ப்பு வழங்கப்பட்ட பின்னரே தேர்தல் பதிவு அதிகாரிகள் காரணங்களுடன் கூடிய உத்தரவை வழங்க வேண்டும். அந்த உத்தரவு தேர்தல் ஆணையத்தின் இணையதளத்தில் பதிவேற்றப்பட வேண்டும்.
>> பெறப்படும் கோரிக்கைகள் மற்றும் எதிர்ப்புகள் தொடர்பான பட்டியல்கள் ஒவ்வொரு வாரமும் தலைமைத் தேர்தல் அதிகாரிகளின் இணையதளங்களில் வெளியிடப்பட வேண்டும். அரசியல் கட்சிகளுக்கும் வழங்கப்பட வேண்டும்
>> இந்த எஸ்எஸ்ஆர் நடைமுறை தமிழ்நாடு, அசாம், பிஹார், சத்தீஸ்கர், கோவா, குஜராத், கேரளா, மத்திய பிரதேசம், மணிப்பூர், பஞ்சாப், ராஜஸ்தான், உத்தர பிரதேசம், உத்தரகாண்ட் மற்றும் மேற்கு வங்கம் ஆகிய 14 மாநிலங்களிலும், அந்தமான் நிக்கோபார் தீவுகள், லட்சத்தீவு மற்றும் புதுச்சேரி ஆகிய 3 யூனியன் பிரதேசங்களிலும் நடைபெற உள்ளது.
>> ஆந்திரப் பிரதேசம், அருணாச்சல பிரதேசம், சண்டிகர், தாத்ரா மற்றும் நகர் ஹவேலி, டாமன் மற்றும் டையூ, ஹரியானா, ஜார்கண்ட், கர்நாடகா, மகாராஷ்டிரா, மேகாலயா, மிசோரம், நாகாலாந்து, டெல்லி, ஒடிசா, சிக்கிம், திரிபுரா மற்றும் தெலங்கானா ஆகிய பகுதிகளில் எஸ்ஐஆர் நடைபெற்று வருவதால் அல்லது சமீபத்தில் முடிவடைந்துள்ளதால், அந்த பகுதிகளுக்கான எஸ்எஸ்ஆர் அட்டவணை பின்னர் அறிவிக்கப்படும்.
>> இமாச்சல பிரதேசம், ஜம்மு-காஷ்மீர் மற்றும் லடாக் ஆகிய பகுதிகளில் எஸ்ஐஆர் இன்னும் தொடங்கப்படாததால், அங்குள்ள வானிலைச் சூழ்நிலைகளை கருத்தில் கொண்டு வாக்காளர் பட்டியல் திருத்த அட்டவணை பின்னர் வெளியிடப்படும். இவ்வாறு உத்தரவில் தெரிவிக்கப்பட்டுள்ளது.
எஸ்ஐஆர், எஸ்எஸ்ஆர் என்ன வித்தியாசம்?
எஸ்எஸ்ஆர் (சுருக்கமான திருத்த நடைமுறை - Special Summary Revision) என்பது, அரசியல் மற்றும் சட்ட ரீதியான சர்ச்சைகளுக்கு உள்ளான ‘சிறப்பு தீவிர திருத்த நடைமுறை’ (எஸ்ஐஆர் - Special Intensive Revision) என்பதிலிருந்து முற்றிலும் மாறுபட்ட ஒரு செயல்முறையாகும். எஸ்ஐஆர் முறையில் வாக்காளர் பட்டியல் புதிதாக மறுசீரமைக்கப்படுகிறது. ஆனால் எஸ்எஸ்ஆர் ஏற்கனவே உள்ள பட்டியலில் தேவையான திருத்தங்கள் மட்டுமே மேற்கொள்ளப்படுகின்றன. எஸ்எஸ்ஆர் என்பது ஆண்டுதோறும் நடத்தப்பட வேண்டிய ஒன்றாகும். இதன் முந்தைய சுழற்சிக்கான கால அட்டவணை 2024 ஆகஸ்ட் 7 அன்று வெளியிடப்பட்டது.அதன் இறுதி வாக்காளர் பட்டியல்கள் 2025 ஜனவரி 6 முதல் 10-ஆம் தேதிக்குள் வெளியிடப்பட்டன.
Amazon.in: ஆன்லைன் ஷாப்பிங் - இலவச ஷிப்பிங் வசதி.