புதுடெல்லி: கடந்த செப்டம்பர் 30-ம் தேதி ஐக்கிய அரபு அமீரகத்தின் துபாயில் இருந்து இஸ்ரேலின் டெல் அவிவ் நகருக்கு ஃபிளை துபாய் விமானம் புறப்பட்டது. இதில் 180 பேர் பயணம் செய்தனர். இந்திய பைலட் ஸ்மித் மச்சார், ஓமனை சேர்ந்த துணை பைலட் ஹமாம் அல் ஹமாமி விமானத்தை இயக்கினர்.
அப்போது, விமானத்தை தரையில் மோத திட்டமிட்ட ஹமாம் அல் ஹமாமி, நடுவானில் ஸ்மித் மச்சாரை கோடாரியால் தாக்கினார். இதில் நிலைகுலைந்த ஸ்மித் மச்சார், சிரமப்பட்டு காக்பிட் அறைக் கதவை திறந்தார். இதனால் சதி முறியடிக்கப்பட்டது. படுகாயமடைந்த ஸ்மித் உடல்நலம் தேறி துபாயில் உள்ள தனது வீட்டுக்கு திரும்பி உள்ளார். அவரது பின்னந்தலையில் உள்ள அறுவைச் சிகிச்சை தழும்புகள் தெளிவாக தெரிகிறது.
இதுகுறித்து அமெரிக்காவை சேர்ந்த மூத்த நரம்பியல் மருத்துவர் தீட்சித் சமூக வலைதளத்தில் வெளியிட்ட பதிவில், "பைலட் ஸ்மித் மச்சாரின் மண்டை ஓடு உடைந்து மிக மோசமான பாதிப்புகள் ஏற்பட்டிருக்கிறது. அறுவைச் சிகிச்சை காயங்களை பார்க்கும்போது இதயம், மூளைக்கு ரத்தத்தை கொண்டு செல்லும் மிகப்பெரிய நரம்பு வெட்டுப்பட்டிருக்கக்கூடும். மருத்துவர்கள் மிகுந்த சிரமப்பட்டு பைலட் மச்சாருக்கு அறுவைச் சிகிச்சை செய்து உள்ளனர்".
டெல்லியை சேர்ந்த மூத்த நரம்பியல் மருத்துவர் ராகுல் சாவ்லா கூறும்போது, “பைலட் மச்சாரின் மண்டை ஓடு உடைந்து மூளை பகுதியில் ரத்தக் கசிவு ஏற்பட்டிருக்க அதிக வாய்ப்பு உள்ளது. அவருக்கு சிக்கலான அறுவைச் சிகிச்சைகள் நடைபெற்றிருக்கக்கூடும்” என்றார்.
மூத்த மருத்துவர்கள் கூறும்போது, “விமானத்தில் துணை பைலட் ஹமாமியின் கொடூர தாக்குதலில் பைலட் ஸ்மித் மச்சார் உயிர் பிழைத்தது மிகப்பெரிய அதிசயம். அவருக்கு நடத்தப்பட்ட சிக்கலான அறுவைச் சிகிச்சையில் அவர் உயிர் பிழைத்தது மற்றொரு அதிசயமாகும். இருமுறை அவர் மரணத்தை வென்று உயிர் பிழைத்திருக்கிறார்” என்றனர்.