புதுடெல்லி: இந்தியாவின் உள்நாட்டுத் தயாரிப்பு விமானம் தாங்கிக் கப்பலான ஐஎன்எஸ் விக்ராந்தில் ரஃபேல் மரைன் போர் விமானம் அக்டோபர் 29-ம் தேதி முதல்முறையாகத் தரையிறங்கியது.
முதல் முயற்சியிலேயே இந்தத் தரையிறக்கம் வெற்றிகரமாக முடிந்தது.கடற்படையின் விமானம் தாங்கிக் கப்பல் செயல்பாடுகளில் இந்த விமானத்தை இணைப்பதற்கான முக்கிய முன்னேற்றமாக இது பார்க்கப்படுகிறது.
63,000 கோடியில் ஒப்பந்தம்
கடற்படைக்காக 26 ரஃபேல் விமானங்களை வாங்க, 2025 ஏப்ரல் 28-ம் தேதி பிரான்ஸுடன் இந்தியா சுமார் ரூ 63,000 கோடி மதிப்பிலான ஒப்பந்தத்தில் கையெழுத்திட்டது. உள்நாட்டு ஆயுதங்களை விமானத்தில் இணைக்கத் தொழில்நுட்பப் பரிமாற்றமும் ஒப்பந்தத்தில் உள்ளது.
மேலும், இந்தியாவில் ரஃபேல் விமான உடற்பகுதி தயாரிப்பு வசதிகளும், என்ஜின், சென்சார்கள், ஆயுதங்கள் ஆகியவற்றுக்கான பராமரிப்பு, பழுதுபார்ப்பு, முழுச் சீரமைப்பு வசதிகளும் அமைக்கப்படும்.
ரஃபேல் மரைன் விமானங்கள் கடற்படையின் வான்வலிமையை உயர்த்தும். வான் பாதுகாப்புக்கும், கடலிலும் தரையிலும் உள்ள இலக்குகளைத் தாக்கவும் இவை உதவும். தற்போது இவற்றை இயக்குவது பிரான்ஸ் கடற்படை மட்டுமே.