புதுடெல்லி: நரேந்திர மோடி வெளிநாட்டு சக்திகளின் உதவியால்தான் பிரதமர் ஆனார் என்று ராகுல் காந்தி குற்றம்சாட்டி உள்ளார்.
கடந்த வாரம் தேசிய ஒற்றுமை தினத்தை (ராஷ்ட்ரிய ஏக்தா திவாஸ்) முன்னிட்டு பிரதமர் நரேந்திர மோடி பேசும்போது, “இந்தியாவைப் பிரிக்கவும் நாட்டின் பிம்பத்தைச் சீர்குலைக்கவும் வெளிநாடுகளிலிருந்து சில எதிரி சக்திகள் சதி செய்கின்றன. வெளிநாடுகளில் அவர்கள் யாரையெல்லாம் ரகசியமாக சந்திக்கிறார்கள் என்பதை மக்கள் அடையாளம் காண வேண்டும்” என தெரிவித்திருந்தார்.
இதற்குப் பதிலடி கொடுக்கும் வகையில், மக்களவை எதிர்க்கட்சித் தலைவர் ராகுல் காந்தி தனது எக்ஸ் பக்கத்தில், “பிரதமர் அவர்களே, நாட்டு மக்களிடம் பொய் சொல்வதை நிறுத்துங்கள். நீங்கள் வெளிநாட்டு உதவியால்தான் பிரதமர் ஆனீர்கள்; அவர்கள் தயவால்தான் ஆட்சியில் நீடிக்கிறீர்கள்.
நாட்டின் நிதி அமைப்பும் சமூக ஊடகங்களும் வெளிநாட்டினரால் கட்டுப்படுத்தப்படுகின்றன. தைரியம் இருந்தால் இதுகுறித்து எந்த மேடையிலும் என்னுடன் நேருக்கு நேர் விவாதிக்கத் தயாரா” என சவால் விடுத்தார். பாஜகவின் பதிலடி ராகுல் காந்தியின் இக்குற்றச்சாட்டுக்கு பாஜக தேசிய செய்தித் தொடர்பாளர் சி.ஆர். கேசவன் கண்டனம் தெரிவித்துள்ளார்.
2023-ம் ஆண்டு மார்ச் மாதம் லண்டனில் பிரிட்டிஷ் எம்.பி.க்கள் மற்றும் சர்வதேச அமைப்புகளிடையே ராகுல் பேசிய காணொலியைப் பகிர்ந்த சி.ஆர். கேசவன், இந்தியாவின் உள்நாட்டு விவகாரங்களில் வெளிநாட்டு சக்திகள் தலையிட வேண்டும் என்றும், இது வெறும் இந்திய அரசியல் போராட்டம் மட்டுமல்ல என்றும் வெளிப்படையாகக் கோரியவர் ராகுல் காந்திதான் என்று தெரிவித்துள்ளார்.
மேலும், சர்வதேச நிதியாளர் ஜார்ஜ் சோரோஸின் நிதி உதவியுடன் இயங்கும் அமைப்புகளுடனும், ‘ஹிண்டன்பர்க்’ ஆய்வு நிறுவனத்துடனும் காங்கிரஸுக்கும் ராகுல் காந்திக்கும் உள்ள ரகசியத் தொடர்புகள் என்ன என்பது குறித்து அவர்கள் மவுனம் காப்பது ஏன் என்றும், ராகுல் அடிக்கடி மேற்கொள்ளும் ரகசிய வெளிநாட்டுப் பயணங்களின் நோக்கம் என்ன என்றும் அவர் கேள்வி எழுப்பியுள்ளார்.