கொல்கத்தா: திரிணமூல் காங்கிரஸ் கட்சியின் தேர்தல் உத்திகளை திருடும் நோக்கில் ஐ-பேக் நிறுவனத்தில் அமலாக்கத் துறை சோதனை நடத்தியதாக, அக்கட்சியின் தலைவரும், மேற்கு வங்க முதல்வருமான மம்தா பானர்ஜி குற்றம் சாட்டியுள்ளார்.
திரிணமூல் காங்கிரஸ் கட்சிக்கு தேர்தல் வியூகங்களை வகுத்தளிக்கும் ஐ-பேக் நிறுவனத்தின் கொல்கத்தா அலுவலகம், கொல்கத்தாவில் உள்ள அதன் இயக்குநர் வீடு உட்பட 10 இடங்களில் அமலாக்கத் துறை அதிகாரிகள் நேற்று சோதனை நடத்தியதற்கு எதிர்ப்பு தெரிவித்து அக்கட்சியின் தலைவரும், மேற்கு வங்க முதல்வருமான மம்தா பானர்ஜி தலைமையில் கொல்கத்தாவில் மிகப் பெரிய பேரணி நடத்தப்பட்டது.
பேரணியின் முடிவில் உரையாற்றிய மம்தா பானர்ஜி, ‘‘ஐ-பேக் நிறுவனத்துக்கு சொந்தமான இடங்களில் அமலாக்கத் துறை நேற்று நடத்திய சோதனையின் நோக்கம், திரிணமூல் காங்கிரஸ் கட்சியின் தரவுகளையும் அதன் தேர்தல் உத்திகளையும் திருடும் நோக்கம் கொண்டது. இதை நாங்கள் வன்மையாகக் கண்டிக்கிறோம்.
பாஜகவின் அரசியல் கருவியாக அமலாக்கத் துறை செயல்படுகிறது. அமலாக்கத் துறை சோதனை நடைபெற்ற இடத்துக்கு நான் கட்சியின் தலைவராகவே சென்றேன். மாநில முதல்வராக அல்ல. சட்டவிரோதமாக நான் எதையும் செய்யவில்லை.
அமலாக்கத் துறையின் நடவடிக்கையைக் கண்டித்து டெல்லியில் உள்ள அமித் ஷாவின் அலுவலகம் முன்பாக இன்று ஆர்ப்பாட்டத்தில் ஈடுபட்ட திரிணமூல் காங்கிரஸ் (டிஎம்சி) கட்சியின் எம்பிக்கள் நடத்தப்பட்ட விதம், வெட்கக்கேடானது; ஏற்றுக்கொள்ள முடியாதது.
ஜனநாயக முறைப்படி போராட்டத்தில் ஈடுபட்ட தேர்ந்தெடுக்கப்பட்ட மக்கள் பிரதிநிதிகளை, தெருக்களில் இழுத்துச் சென்றது டெல்லி போலீஸ் அல்ல; அது சீருடைக்குள் உள்ள ஆணவம். இந்த நாட்டின் ஜனநாயகம் பாஜகவின் தனிப்பட்ட சொத்து அல்ல.
அதிகாரத்தில் இருப்பவர்களின் வசதிக்காக செயல்படுவதல்ல ஜனநாயகம். பாஜக தலைவர்கள் போராட்டம் நடத்தும்போது அவர்கள் சிவப்பு கம்பள வரவேற்பையும், சிறப்புச் சலுகைகளையும் எதிர்பார்க்கிறார்கள். ஆனால், எதிர்க்கட்சி எம்பிக்கள் போராட்டம் நடத்தினால் அவர்களை இழுத்துச் செல்கிறார்கள். இந்த இரட்டை நிலைப்பாடு பாஜகவின் ஜனநாயகம் எப்படிப்பட்டது என்பதை அம்பலப்படுத்துகிறது.
மரியாதை என்பது பரஸ்பரமானது. நீங்கள் எங்களை மதித்தால், நாங்கள் உங்களை மதிப்போம். நீங்கள் எங்களை தெருவில் இழுத்துச் சென்றால், நாங்களும் உங்களை இழுத்துச் செல்வோம். இது நம் எல்லோருக்குமான நாடு. கண்ணியத்துக்கு யார் தகுதியானவர்கள் என்பதை உள்துறை அமைச்சர் தீர்மானிக்க முடியாது.
தேர்தல் ஆணையத்தின் உதவியுடன் மகாராஷ்டிர தேர்தலில் பாஜக வெற்றி பெற்றது. மேற்கு வங்கத்திலும் அதையே அவர்கள் செய்ய விரும்புகிறார்கள். டெல்லியில் உள்ள பாஜக மூத்த தலைவர்கள், நிலக்கரி ஊழல் பணத்தைப் பெறுகிறார்கள். தேவைப்பட்டால் பொதுமக்கள் முன்னிலையில் அதற்கான ஆதாரங்களை என்னால் சமர்ப்பிக்க முடியும்.
நாங்கள் 2026 சட்டமன்றத் தேர்தலில் வெற்றி பெறுவோம். மத்தியில் உள்ள பாஜக அரசு 2029 வரை நீடிக்காது. மேற்கு வங்கத்தில் திரிணமூல் காங்கிரஸ் வெற்றி பெற்ற பிறகு, டெல்லியிலும் நாம் வெற்றி பெற வேண்டும். பாஜக இந்தியாவை ஆள அனுமதிக்க முடியாது’’ என்று மம்தா பானர்ஜி பேசினார்.
பின்னணி என்ன? - மேற்கு வங்க மாநிலத்தில் ஈஸ்டர்ன் கோல்பீல்ட்ஸ் நிறுவனத்துக்கு சொந்தமான சுரங்கத்தில் இருந்து சட்டவிரோதமாக நிலக்கரி தோண்டி எடுக்கப்பட்டதாக புகார் எழுந்தது. இது தொடர்பாக 2020-ம் ஆண்டு சிபிஐ வழக்கு பதிவு செய்து விசாரணை நடத்தி வருகிறது. இந்த வழக்கின் அடிப்படையில், அமலாக்கத் துறை தனியாக வழக்கு பதிவு செய்து விசாரித்து வருகிறது.
குறிப்பாக இந்த முறைகேட்டில் பயனடைந்ததாக சந்தேகிக்கப்படுபவரும் மேற்கு வங்க முதல்வர் மம்தா பானர்ஜியின் உறவினருமான திரிணமூல் காங்கிரஸ் பொதுச் செயலாளர் அபிஷேக் பானர்ஜி உள்ளிட்டோரிடம் அமலாக்கத் துறை அதிகாரிகள் விசாரணை நடத்தி உள்ளனர்.
இந்தச் சூழலில், கொல்கத்தாவின் சால்ட்லேக் பகுதியில் உள்ள, அரசியல் ஆலோசனை வழங்கும் ஐ-பேக் நிறுவன அலுவலகம் மற்றும் அதன் இயக்குநர் பிரதிக் ஜெயின் வீடு மற்றும் டெல்லியில் உள்ள 4 இடங்கள் உட்பட மொத்தம் 10 இடங்களில் அமலாக்கத் துறை அதிகாரிகள் நேற்று காலை 7 மணி முதல் சோதனை நடத்தினர்.
சோதனை நடைபெற்றுக்கொண்டிருந்தபோது, பிரதிக் ஜெயினின் வீட்டுக்கு போலீஸாருடன் சென்ற மம்தா பானர்ஜி, முக்கிய ஆவணங்களை அமலாக்கத் துறையினரிடம் இருந்து கைப்பற்றினார். பின்னர் வீட்டுக்கு வெளியே செய்தியாளர்களிடம் பேசிய அவர், ‘‘அமலாக்கத் துறையினரின் இந்த சோதனை நடவடிக்கை அரசியல் உள்நோக்கம் கொண்டது; அரசியலமைப்புக்கு எதிரானது.
அவர்கள் எங்கள் கட்சியின் ஆவணங்களையும் சட்டமன்றத் தேர்தலுக்கான எங்கள் வேட்பாளர்களைப் பற்றிய விவரங்களையும் கொண்ட ஹார்ட் டிஸ்குகளை பறிமுதல் செய்து கொண்டிருந்தனர். நான் அவற்றை அவர்களிடம் இருந்து மீட்டுக் கொண்டு வந்தேன். அரசியல் கட்சியின் தரவுகளைச் சேகரிப்பது அமலாக்கத் துறையின் கடமையா?. இதற்கும், நிதி முறைகேடு தொடர்பான விசாரணைக்கும் எந்த தொடர்பும் இல்லை. இது ஒரு பழிவாங்கும் நடவடிக்கை. உள்துறை அமைச்சர் நாட்டை பாதுகாப்பவரைப் போல அல்லாமல், மிகவும் மோசமான அமைச்சரைப் போல நடந்து கொள்கிறார்’’ என குற்றம் சாட்டினார்.
மம்தா மீது புகார்: இதுகுறித்து அமலாக்கத் துறை வெளியிட்ட அறிக்கையில், “பிரதீக் ஜெயின் வீட்டில் சோதனை நடத்தியபோது, அங்கு தனது உதவியாளர்களுடன் வந்த முதல்வர் மம்தா பானர்ஜி, சில ஆவணங்கள் மற்றும் மின்னணு சாதனங்களை எடுத்துச் சென்றார். இதுபோல, சால்ட்லேக் பகுதியில் உள்ள ஐ-பேக் அலுவலகத்துக்கு தனது உதவியாளர்களுடன் வந்த மம்தா, அங்கிருந்த சில ஆவணங்கள் மற்றும் மின்னணு ஆதாரங்களை எடுத்துச் சென்றார்” என கூறப்பட்டுள்ளது.
கடந்த 2021-ம் ஆண்டு நடைபெற்ற சட்டப்பேரவைத் தேர்தலில் திரிணமூல் கட்சிக்கு ஐ-பேக் நிறுவனம் வியூகம் அமைத்துக் கொடுத்தது. அத்துடன் கட்சியின் தகவல் தொழில்நுட்ப மற்றும் ஊடக செயல்பாடுகளை கவனித்து வருகிறது என்பது குறிப்பிடத்தக்கது.