ஜம்மு: பாகிஸ்தானின் லஷ்கர்-இ-தொய்பா அமைப்பைச் சேர்ந்த தீவிரவாதியான ஹாஷிம் மூஸா காஷ்மீர் மாநிலம் புத்காமில் பதுங்கி இருப்பதாக உளவுத் தகவல் கிடைத்தது. இதையடுத்து இந்திய ராணுவத்தின் 15 சினார் படைப் பிரிவு, காஷ்மீர் போலீஸார் மற்றும் சிஆர்பிஎப் படையினர் அடங்கிய பாதுகாப்புப் படையினர் நேற்றுமுன்தினம் இரவு குர்வெத் கலான் பகுதியை சுற்றி வளைத்து தேடுதல் வேட்டையில் இறங்கினர்.
அப்போது மறைந்திருந்த தீவிரவாதிகள் துப்பாக்கியால் சுட்டுள்ளனர். பதிலுக்கு பாதுகாப்புப் படையினரும் துப்பாக்கியால் சுட்டுள்ளனர். இந்த துப்பாக்கிச் சண்டையில் மூஸா உயிரிழந்தார். சம்பவ இடத்திலிருந்து ஏகே-47 துப்பாக்கி மற்றும் மொபைல் போன் ஆகியவை கைப்பற்றப்பட்டன. ஆசிப்ஃபவுஜி, சுலைமான் என்ற பெயர்களிலும் அறியப்பட்ட மூஸா, பாகிஸ்தான் நாட்டைச் சேர்ந்தவர் ஆவார்.