வெற்றிகரமாக விண்ணில் பாய்ந்தது இஸ்ரோவின் அதிநவீன புவி கண்காணிப்பு செயற்கைக்கோள் EOS-05

ஸ்ரீஹரிகோட்டா: பூமியில் இருந்து சுமார் 36,000 கி.மீ. உயரத்தில் புவி - சுற்றுப்பாதையில் பயணித்து படமெடுக்கும் 2,367 கிலோ எடைகொண்ட இந்தியாவின் முதல் அதிக எடைகொண்ட EOS-05 செயற்கைக்கோளை ஜிஎஸ்எல்வி ராக்கெட் மூலம் இந்திய விண்வெளி ஆய்வு நிறுவனமான இஸ்ரோ இன்று வெற்றிகரமாக விண்ணில் செலுத்தி வரலாற்றில் இடம்பிடித்தது.

ஆந்திரப் பிரதேசத்தின் ஸ்ரீஹரிகோட்டாவில் உள்ள சத்தீஸ்தவான் ஏவுகணைத் தளத்தில் இருந்து இன்று அதிகாலை 2.55 மணிக்கு செயற்கைக்கோள் விண்ணில் செலுத்தப்பட்டது. நள்ளிரவு நேரம், மழை என சவால்கள் இருந்தபோதிலும் ஏராளமான பொதுமக்கள் குடைகளுடன் திரண்டு இந்த ஏவுதலை உற்சாகமாக கண்டு ரசித்தனர். செயற்கைக்கோள் ஏவப்பட்ட சுமார் 18 நிமிடங்களுக்குப் பிறகு திட்டமிட்டபடி துணை புவி ஒத்திசைவு சுற்றுப்பாதையில் வெற்றிகரமாக நிலைநிறுத்தப்பட்டது. இது இந்த ஆண்டில் இஸ்ரோவின் முதல் வெற்றியாக அமைந்தது.

பூமியைக் கண்காணிக்கும் பல செயற்கைக்கோள்கள் குறைந்த புவி சுற்றுப்பாதையில் செயல்படும் நிலையில் EOS - 05 செயற்கைக்கோள் பூமியில் இருந்து 36,000 கி.மீ. உயரத்தில் உள்ள புவி ஒத்திசைவு சுற்றுப்பாதையில் நிலைநிறுத்தப்பட்டுள்ளது. இதன்மூலம் இந்த செயற்கைக்கோள் பூமியின் சுழற்சி வேகத்துக்கு இணையாக செயல்படும். இதேபோல், இதுவரை விண்ணில் நிலைநிறுத்தப்பட்ட செயற்கைக்கோள்களிலேயே இதுதான் அதிக எடை கொண்டதாகும்.

விண்ணில் உள்ள கண் என்று வர்ணிக்கப்படும் இந்த செயற்கைக்கோள் நிகழ்நேர படங்களை வழங்குவதோடு, விவசாயம் மற்றும் பேரிடர் மேலாண்மை உள்ளிட்ட துறைகளில் நாட்டுக்கு உதவும்.

முந்தைய சில தோல்விகளுக்குப் பிறகு கிடைத்துள்ள இந்த வெற்றி குறித்து மகிழ்ச்சி தெரிவித்துள்ள இஸ்ரோ தலைவர் வி. நாராயணன், “GSLV F-17 வாகனம், மேம்பட்ட EOS-05 புவி-படமெடுக்கும் செயற்கைக்கோளைத் திட்டமிடப்பட்டபடி சுற்றுப்பாதையில் வெற்றிகரமாகவும் துல்லியமாகவும் நிலைநிறுத்தியுள்ளது என்பதை அறிவிப்பதில் நான் மிகவும் மகிழ்ச்சியடைகிறேன். ஸ்ரீஹரிகோட்டாவிலிருந்து மேற்கொள்ளப்பட்ட 107-வது ஏவுதல் நிகழ்வு இது. அத்துடன் GSLV-யின் 19-வது பணி இதுவாகும்” என்று தெரிவித்தார்.

இதுகுறித்து பிரதமர் மோடி எக்ஸ்' பக்கத்தில் பதிவிட்டுள்ள வாழ்த்து செய்தியில், “இந்திய விண்வெளி ஆராய்ச்சி நிறுவனத்தின் அதிநவீன புவி கண்காணிப்பு செயற்கைக்கோளான 'இஓஎஸ்-05'-ஐ சுமந்தபடி 'ஜிஎஸ்எல்வி-எஃப்17 ராக்கெட் வெள்ளிக்கிழமை (செப். 4) அதிகாலை 2.55 மணிக்கு வெற்றிகரமாக விண்ணில் செலுத்தப்பட்டுள்ளது. இது இஸ்ரோவின் மற்றொரு சிறப்பான சாதனை மற்றும் நாட்டின் பெருமைக்குரிய தருணம்” என்று குறிப்பிட்டுள்ளார்.