புதுடெல்லி: தேர்தல் ஆணையர்களுக்கு இடையே கருத்து வேறுபாடு நிலவுவதாக முன்னணி ஆங்கில நாளிதழ் செய்தி வெளியிட்டது. இதையடுத்து, தலைமைத் தேர்தல் ஆணையத்தை எதிர்க்கட்சிகள் கடுமையாக விமர்சித்து வருகின்றன.
இந்நிலையில், கரப்பான்பூச்சி ஜனதா கட்சியின் (சிஜேபி) நிறுவனர் அபிஜித் திப்கே டெல்லியில் நேற்று செய்தியாளர்களிடம் கூறும்போது, “தலைமைத் தேர்தல் ஆணையர் (சிஇசி) ஞானேஷ் குமார் அடுத்த 48 மணி நேரத்துக்குள் பதவி விலக வேண்டும். இல்லாவிட்டால் டெல்லியில் மட்டுமல்லாது நாடு முழுவதும் தர்ணா போராட்டம் நடத்தப்படும்” என்றார்.
சிஜேபி இணை நிறுவனர் சவுரவ் தாஸ் கூறும்போது, “தலைமைத் தேர்தல் ஆணையர் ஞானேஷ் குமார் பதவி விலக வேண்டும். இனி நடைபெறவுள்ள அனைத்து தேர்தல்களையும் நிறுத்திவைக்க வேண்டும்.
எஸ்ஐஆர் அடிப்படையிலான வாக்காளர் பட்டியலை நிறுத்திவைத்துவிட்டு, முந்தைய வாக்காளர் பட்டியலை பயன்படுத்த வேண்டும். எஸ்ஐஆர் தொடர்பான கோப்புகளை உச்ச நீதிமன்றத்தின் தலைமையிலான குழுவின் பாதுகாப்பில் வைக்க வேண்டும். தேர்தல் ஆணையர்களை நியமிப்பது தொடர்பான சட்டத்தை ரத்து செய்ய வேண்டும்” என்றார்.