கோப்புப் படம்
புதுடெல்லி: ஜூலை 25 அன்று அளிக்கப்பட்ட வாக்குறுதிகளை நிறைவேற்றத் தவறிய மத்திய அரசை கண்டித்து, செப்டம்பர் 5 அன்று டெல்லியில் அமைதிப் பேரணி நடத்தப்படும் என்று கரப்பான்பூச்சி ஜனதா கட்சி (சிஜேபி) அறிவித்துள்ளது.
டெல்லி இந்தியா கேட் பகுதியில் இருந்து டெல்லி காவல் ஆணையர் அலுவலகம் வரை இந்தப் பேரணி நடைபெறும் என்றும் அந்த இயக்கம் தெரிவித்துள்ளது.
இது தொடர்பாக சிஜேபியின் அதிகாரப்பூர்வ எக்ஸ் தளத்தில் வெளியிடப்பட்டுள்ள அறிக்கையில், “நாட்டின் இளைஞர்களுக்கு ஜூலை 25, 2026 அன்று அளிக்கப்பட்ட வாக்குறுதிகளை இந்திய அரசும், பாஜக ஆளும் மாநில அரசுகளும் எந்தளவுக்கு நிறைவேற்றியுள்ளன என்பதை ஆய்வு செய்ய சிஜேபி தேசிய செயற்குழு இன்று கூடியது.
உண்மையில், அரசு தனது வாக்குறுதியை நிறைவேற்ற விரும்புகிறதா என்பது குறித்து குழு உறுப்பினர்கள் ஆழ்ந்த சந்தேகத்தை வெளிப்படுத்தினர்.
வாக்குறுதிகளை நிறைவேற்றுவதற்குப் பதிலாக கடந்த ஒரு மாதமாக அரசு காலதாமதம் செய்யும் தந்திரங்களைக் கையாண்டு வருகிறது. தொழில்நுட்பக் காரணங்களைக் கூறித் தப்பித்து வருகிறது. இந்திய உச்ச நீதிமன்றத்தின் முன்பாகக் கூட தெளிவான வாக்குறுதிகளை அளிக்காமல் தவிர்த்து வருகிறது.
நாடு முழுவதும் பதிவு செய்யப்பட்ட முதல் தகவல் அறிக்கைகளின் பட்டியலை வழங்குமாறு மத்திய அரசிடம் உச்ச நீதிமன்றம் ஆகஸ்ட் 18 அன்று பலமுறை கேட்டுக்கொண்டது. இதன் மூலம் அவற்றை ஒரே நேரத்தில் ரத்து செய்வது குறித்து நீதிமன்றம் பரிசீலிக்கவும், வாக்குறுதியை நிறைவேற்றுவதை எளிதாக்கவும் முடியும்.
இருப்பினும், அவ்வாறு செய்வதற்கான தெளிவான வாக்குறுதியை அளிக்க அரசு மறுத்துவிட்டது. சிஜேபி-க்கு அரசு அளித்த எழுத்துப்பூர்வ உறுதிமொழியும் இன்னும் நிறைவேற்றப்படவில்லை.
இந்த நிலை தொடர முடியாது. எங்கள் பொறுமையை பலவீனமாகக் கருதக்கூடாது. எங்கள் நல்லெண்ணம், அரசு எங்களை ஏமாற்றுவதற்கான வாய்ப்பாக மாறிவிடக்கூடாது.
எனவே, செப்டம்பர் 5 அன்று புதுடெல்லியில் அமைதியான போராட்டத்தை நடத்த தேசிய செயற்குழு ஒருமனதாகத் தீர்மானித்துள்ளது.
நீட் தேர்வு காரணமாக உயிரிழந்தவர்களின் குடும்பத்தினர் மற்றும் காவல்துறை அத்துமீறலால் பாதிக்கப்பட்டவர்களின் தலைமையில் இந்த பேரணி நடைபெறும். நாடு முழுவதிலுமிருந்து மாணவர்கள் மற்றும் இளைஞர்கள் பங்கேற்கும் அமைதியான இந்த போராட்டப் பேரணி இந்தியா கேட் முதல் புதுடெல்லி காவல் ஆணையர் அலுவலகம் வரை நடைபெறும்.
நாட்டின் இளம் தலைமுறையினரான 'ஜென் ஸி' மற்றும் நீட் தேர்வால் தங்கள் பிள்ளைகளை இழந்த குடும்பங்கள் ஆகியோருக்கு எதிராக நம்பிக்கை துரோகம் இழைக்க அரசு உறுதியாக இருப்பதால், நாங்கள் மீண்டும் வீதிக்கு வர வேண்டிய கட்டாயத்திற்குத் தள்ளப்பட்டுள்ளோம்.
கடந்த ஜூலை 25 அன்று ஒரு கூட்டுச் செய்தியாளர் சந்திப்பில் அரசு தரப்பில் வாக்குறுதிகள் பகிரங்கமாக அளிக்கப்பட்டன. அந்த வாக்குறுதிகளை இளம் தலைமுறையினர் நம்பினர். நல்லெண்ணத்தின் அடிப்படையில் நாங்கள் நாடு தழுவிய போராட்டத்தைக் கைவிட்டோம்.
ஒரு முழு தலைமுறையின் நம்பிக்கையைப் பயன்படுத்தி அவர்களை வீட்டுக்கு அனுப்பிவிட்டு, பின்னர் தனது சொந்த வார்த்தையிலிருந்து அரசு அமைதியாகப் பின்வாங்குவதை ஏற்றுக்கொள்ள முடியாது. இந்தத் துரோக முயற்சியை நாங்கள் ஒருபோதும் ஏற்கமாட்டோம்.
இந்தியாவின் அனைத்து இளைஞர்கள், மாணவர்கள், இளைஞர் அமைப்புகள் மற்றும் மாணவர் அமைப்புகள் செப்டம்பர் 5 அன்று இந்தியா கேட் பகுதியில் எங்களுடன் பெருந்திரளாக இணையுமாறு நாங்கள் கேட்டுக்கொள்கிறோம்.
பேரணியின் முன்வரிசையில், தங்கள் பிள்ளைகளை இழந்த குடும்பத்தினர் நடப்பார்கள். காவல்துறை வன்முறைக்கு ஆளானவர்கள் அவர்களுடன் நடப்பார்கள். அவர்களுக்குப் பின்னால், "அளித்த வாக்குறுதியைக் காப்பாற்றுங்கள்" என்ற ஒரே ஒரு விஷயத்தை மட்டும் வலியுறுத்தும் ஒரு தலைமுறை அணிவகுத்துச் செல்லும்.
இந்த நாட்டு இளைஞர்களுக்கு அளிக்கப்பட்ட உறுதியான வாக்குறுதிகளுக்கு ஏதேனும் மதிப்பு இருந்தால், அரசு அவற்றை எழுத்துப்பூர்வமாகவும் அதன் உண்மையான நோக்கத்துடனும் நிறைவேற்ற வேண்டும்” என்று தெரிவிக்கப்பட்டுள்ளது.