மும்பை: மூன்று நாள் அரசுமுறைப் பயணமாக இந்தியா வந்துள்ள பிரிட்டன் இளவரசர் வில்லியம், மும்பையின் வீதிகளில் சச்சின் டெண்டுல்கர் மற்றும் பள்ளி மாணவிகளுடன் இணைந்து கிரிக்கெட் விளையாடி மகிழ்ந்தார்.
மும்பையின் தெற்கு பகுதியில் உள்ள என்.மொரார்ஜி சாலையில் இந்த நிகழ்வு நடைபெற்றது. சுற்றுச்சூழல் பாதுகாப்பு மற்றும் நிலைத்தன்மை குறித்த விழிப்புணர்வை ஏற்படுத்தும் விதமாக ஏற்பாடு செய்யப்பட்டிருந்த இந்நிகழ்வில் பங்கேற்ற பிரிட்டன் இளவரசர் வில்லியம், இளவரசி கேத்தரின் தம்பதியினருக்கு, மகாராஷ்டிராவின் பாரம்பரிய மேளதாள வாத்தியங்கள் முழங்க உற்சாக வரவேற்பு அளிக்கப்பட்டது.
இதனைத் தொடர்ந்து, பெரிய ஆலமரத்தின் அடியில் அமைந்திருந்த சாலையோரத் தேநீர் கடையில் மண் குவளைகளில் வழங்கப்பட்ட மும்பையின் பிரபலமான 'கட்டிங் சாய்' தேநீரை இருவரும் ருசித்துப் பருகினர். பின்னர் சச்சின் டெண்டுல்கர், பள்ளி மாணவிகளுடன் இணைந்து கிரிக்கெட் விளையாடிய இளவரசர் வில்லியம், முதலில் பேட்டிங் செய்ததுடன் கேத்தரின் மற்றும் சச்சின் டெண்டுல்கருக்கு பந்துவீசினார். இளவரசி கேத்தரின் பேட்டிங் செய்தபோது சச்சின் டெண்டுல்கர் ஃபீல்டிங் செய்த காட்சிகள் அங்கிருந்தவர்களை கவர்ந்தது.
பாதுகாப்புக் காரணங்களுக்காக இந்த நிகழ்வின் விவரங்கள் மிகவும் ரகசியமாக வைக்கப்பட்டிருந்ததால், இதில் பங்கேற்ற பள்ளி மாணவிகளுக்கு யார் வரப்போகிறார்கள் என்பது முன்கூட்டியே தெரியாது. நாக்பாடாவில் உள்ள அஞ்சுமன் இஸ்லாம் பேகம் ஷரீஃபா கல்சேகர் பெண்கள் ஆங்கிலப் பள்ளியின் எட்டாம் வகுப்பு மாணவிகள் கூறுகையில், தீபாவளி விடுமுறை என்பதால் ஆசிரியர்களின் அழைப்பை ஏற்றுப் பெயரைப் பதிவு செய்ததாகவும், வேல்ஸ் இளவரசர்தான் வந்துள்ளார் என்பதை அறிந்ததும் மிகுந்த ஆச்சரியமும் மகிழ்ச்சியும் அடைந்ததாகவும் தெரிவித்தனர்.
சுற்றுச்சூழல் சவால்களுக்குத் தீர்வு காணும் புதுமைகளைப் பாராட்டும் 'எர்த்ஷாட் பரிசு' விழாவில் பங்கேற்பதற்காக பிரிட்டன் அரச தம்பதியினர் நவம்பர் 16 முதல் 18 வரை இந்தியா வந்துள்ளனர்.
முன்னதாக 2016-ஆம் ஆண்டு ஏப்ரல் மாதம் இந்தியா வந்திருந்த இவர்கள், பத்து ஆண்டுகளுக்குப் பிறகு தற்போது இரண்டாவது முறையாக அரசுமுறைப் பயணம் மேற்கொண்டுள்ளனர். நாளை (நவ. 17) மும்பையில் நடைபெறும் எர்த்ஷாட் பரிசு வழங்கும் விழாவில் பங்கேற்கும் இளவரசர் வில்லியம் மற்றும் இளவரசி கேத்தரின், நவம்பர் 18-ஆம் தேதி டெல்லியில் பிரதமர் மோடியை சந்தித்துப் பேசவுள்ளனர்.