புதுடெல்லி: சோமாலியா கடற்கொள்ளையர்களால் கடத்தப்பட்ட மீன்பிடிக் கப்பலில் இருந்து 20 மாலுமிகளை இந்திய கடற்படை பத்திரமாக மீட்டது.
ஈரான் நாட்டுக்கு சொந்தமான ‘அசினி’ என்கிற மீன்பிடிக் கப்பல் கடந்த மாதம் 29-ம் தேதி சோமாலியாவின் வடகிழக்குக் கடற்கரைக்கு அப்பால் சென்று கொண்டிருந்தபோது, ஆயுதம் ஏந்திய கடற்கொள்ளையர்கள் கப்பலை வழிமறித்து கடத்தினர். கப்பலில் இருந்த 20 ஈரானிய மாலுமிகள் சிறை பிடிக்கப்பட்டனர்.
இந்த சம்பவம் கடல்சார் பாதுகாப்பு அச்சுறுத்தலை ஏற்படுத்தியதுடன், அப்பகுதி வழியாக செல்லும் பிற வர்த்தகக் கப்பல்கள் மீது தாக்குதல்களை தொடுப்பதற்கு கடற்கொள்ளையர்கள் இந்த மீன்பிடிக் கப்பலை பயன்படுத்தலாம் என்ற கவலை எழுந்தது. இதனையடுத்து, கடத்தப்பட்ட மீன்பிடி கப்பலைக் கண்காணிப்பதற்காக ஒரு போர்க்கப்பலையும், கடல்சார் உளவு விமானத்தையும் இந்திய கடற்படை களமிறக்கியது.
தொடர் கண்காணிப்புக்குப் பிறகு மீன்பிடி கப்பலின் இருப்பிடத்தைக் கண்டறிந்த இந்திய கடற்படையினர், அதன் இயக்கத்தைக் கட்டுப்படுத்தவும் கடற்கொள்ளையர்கள் தப்பிச் செல்வதைத் தடுக்கவும் நடவடிக்கை எடுத்தனர்.
அதனை தொடர்ந்து, கடற்படை கமாண்டோக்கள் இந்திய விமானப்படையின் சி-17 விமானம் மூலம் சரியான நேரத்தில் மீன்பிடி கப்பலில் இறங்கினர். அவர்கள், விரைவான மற்றும் நன்கு ஒருங்கிணைக்கப்பட்ட நடவடிக்கையின் மூலம் கொள்ளையர்களின் அச்சுறுத்தலை முறியடித்து, கப்பலைப் பாதுகாத்து, 20 மாலுமிகளையும் பாதுகாப்பாக மீட்டனர்.
இது தொடர்பாக இந்திய கடற்படை வெளியிட்டுள்ள அறிக்கையில், “இந்த வெற்றிகரமான நடவடிக்கை, இந்தியக் கடற்படையின் உயர் செயல்பாட்டுத் தயார்நிலைக்கும், படைகளுக்கு இடையேயான ஒருங்கிணைப்பின் மூலம் சிக்கலான கடல்சார் பாதுகாப்பு நடவடிக்கைகளை மேற்கொள்ளும் திறனுக்கும் ஒரு சான்றாகும்.
மாலுமிகளைப் பாதுகாப்பதற்கும், முக்கிய கடல்வழி வர்த்தகப் பாதைகளைப் பாதுகாப்பதற்கும், இந்தியப் பெருங்கடல் பிராந்தியத்தில் பாதுகாப்பான, உறுதியான மற்றும் நிலையான கடல்சார் சூழலை உறுதி செய்வதற்கும் இந்தியக் கடற்படை உறுதியுடன் உள்ளது” என தெரிவிக்கப்பட்டுள்ளது.
வெற்றிகரமான இந்த நடவடிக்கையைத் தொடர்ந்து, டெல்லியில் உள்ள ஈரான் தூதரகம், மீட்புப் பணியின்போது வெளிப்படுத்தப்பட்ட துல்லியம், படைப்பிரிவுகளுக்கு இடையேயான ஒருங்கிணைப்பு மற்றும் மனிதாபிமான அர்ப்பணிப்பு ஆகியவற்றுக்காக இந்திய ஆயுதப் படைகளுக்கு பாராட்டு மற்றும் நன்றி தெரிவித்தது.