பனாஜி: பிரபல இந்தி நடிகர் நானா படேகர், மாரடைப்பு காரணமாக கோவாவில் நேற்று காலமானார். குடியரசு தலைவர், பிரதமர் மோடி, திரை பிரபலங்கள் உள்ளிட்டோர் இரங்கல் தெரிவித்துள்ளனர்.
கோவா மாநிலம் டோனா பவுனாவில் உள்ள தனது வீட்டில் வசித்து வந்த நானா படேகருக்கு நேற்று அதிகாலை கடுமையான நெஞ்சுவலி ஏற்பட்டுள்ளது. இதுகுறித்து தகவல் அறிந்த மருத்துவக்குழுவினர் அங்கு விரைந்து சென்றபோது, அவர் மயங்கிய நிலையில் இருந்தார்.
உடனடியாக அவரை மருத்துவமனைக்கு சிகிச்சைக்காகக் கொண்டு சென்றனர். ஆனால் அவர் 5.20 மணிக்கு உயிரிழந்துவிட்டதாக மருத்துவர்கள் தெரிவித்தனர். நானா படேகரின் மறைவு பாலிவுட் திரையுலகில் சோகத்தை ஏற்படுத்தி உள்ளது.
இதனிடையே, நானே படேகர் உடல் மகாராஷ்டிர மாநிலம் புனே நகரில் உள்ள அவருடைய பண்ணை வீட்டுக்கு கொண்டு செல்லப்பட்டது. அங்கு, அவரது குடும்பத்தினர், அரசியல் தலைவர்கள், திரையுலகினர், ரசிகர்கள் உள்ளிட்டோர் நேரில் அஞ்சலி செலுத்தினர். குடியரசுத் தலைவர் திரவுபதி முர்மு விடுத்துள்ள இரங்கல் செய்தியில், “மூத்த நடிகர் நானா படேகரின் மறைவுச் செய்தி கேட்டு மிகுந்த மனவேதனை அடைந்தேன். அவரது மறைவு இந்தியத் திரையுலகத்துக்குப் பேரிழப்பாகும். அவரது குடும்பத்தினருக்கும் ரசிகர்களுக்கும் எனது ஆழ்ந்த இரங்கலைத் தெரிவித்துக் கொள்கிறேன்” என கூறியுள்ளார்.
பிரதமர் மோடி விடுத்துள்ள இரங்கல் செய்தியில், “இந்தி மற்றும் மராத்தி திரைப்படத் துறைக்கு நானா படேகர் ஆற்றிய பங்களிப்பு அளப்பரியது. அவரது மறைவு ஒரு பெரும் வெற்றிடத்தை ஏற்படுத்தியுள்ளது. அவரது குடும்பத்தினர், நண்பர்கள் மற்றும் எண்ணற்ற ரசிகர்களுக்கு எனது ஆழ்ந்த இரங்கலைத் தெரிவித்துக் கொள்கிறேன். ஓம் சாந்தி” என கூறியுள்ளார்.
இதுபோல, காங்கிரஸ் மூத்த தலைவர் சோனியா காந்தி, காங்கிரஸ் தலைவர் மல்லிகார்ஜுன கார்கே, மகாராஷ்டிர முதல்வர் தேவேந்திர பட்னாவிஸ், தெலங்கானா முதல்வர் ரேவந்த் ரெட்டி, கேரள முன்னாள் முதல்வர் பினராயி விஜயன், திமுக எம்.பி.கனிமொழி, நடிகர்கள் ரஜினிகாந்த், அனுபம் கெர், சிரஞ்சீவி உள்ளிட்ட அரசியல் மற்றும் திரையுலக பிரபலங்கள் பலர் நானா படேகர் மறைவுக்கு இரங்கல் தெரிவித்துள்ளார்.
தமிழிலும் நடித்துள்ளார்
முதலில் மேடை நாடகங்களில் நடித்து வந்த நானா படேகர், பின்னர் மராத்தி படங்களில் சிறு சிறு வேடங்களில் நடித்தார். ‘காமன்’ என்ற படம் மூலம் இந்தியில் அறிமுகமாகி ஏராளமான படங்களில் நடித்துள்ளார். இயக்குநர் பாரதிராஜா ‘பொம்மலாட்டம்’ (2008) படம் மூலம் அவரை தமிழுக்கு அழைத்து வந்தார். இந்தப் படம் இந்தி, தமிழில் உருவானது. அடுத்து ரஜினி நடித்த ‘காலா’ (2018) படத்திலும் அவர் நடித்துள்ளார். ‘கிரந்திவீர்’ படத்துக்காக சிறந்த நடிகருக்கான தேசிய விருதை பெற்றுள்ளார். 2013-ம் ஆண்டு மத்திய அரசு பத்ம விருது அளித்து கவுரவித்தது.