ஒவ்வொரு ஆண்டும் அந்த ஆண்டில் அதிகம் கூகுளில் எது தேடப்பட்டுள்ளது என்ற விவரத்தை கூகுள் தேடல் எந்திரம் வெளியிட்டு வருகிறது, 2018 பட்டியலை கூகுள் வெளியிட்டுள்ளது, அதில் விளையாட்டு குறித்த தேடல்கள் சினிமா மற்றும் கிரிக்கெட்டைப் பின்னுக்குத்தள்ளி ஃபீபா 2018 உலகக்கோப்பைக் கால்பந்து அதிக தேடல்கள் பட்டியலில் முதலிடம் வகிக்கிறது.
ஃபீபா உலகக்கோப்பை 2018, லைவ் ஸ்கோர், ஐபிஎல் 2018 ஆகியவை டாப் 3 ட்ரெண்டிங்காக தேடலில் இருந்துள்ளது.
அதேபோல் ட்ரெண்டிங் திரைப்படங்கள், ஆளுமைகளில் தமிழ், மலையாளம் பொழுதுபோக்கு உலகத் தேடல்கள் பெரும்பங்கு வகித்துள்ளது. சமீபத்தில் வெளியான ரஜினிகாந்தின் 2.0 அதிகம் கூகுள் செய்யப்பட்ட திரைப்படமாக விளங்குகிறது. அதிகம் தேடப்பட்ட ஆளுமைகளில் ‘கண்ணடி’ புகழ் நடிகை பிரியா வாரியர் அதிகம் கூகுள் செய்யப்பட்டுள்ள ஆளுமையாகத் திகழ்கிறார்.
இந்த ஆண்டில் கிரிக்கெட், பாலிவுட்டைத் தகர்த்து கால்பந்தாட்டம் தேடலில் முதலிடம் வகித்துள்ளது. இதில் செய்திகள் பிரிவில் ஃபீபா 2018 தான் அதிகம் இந்தியர்களால் தேடப்பட்ட ஒரு நிகழ்வாக டாப் இடம் பிடித்துள்ளது.
இந்தியத் திரைப்படங்களில் 2.0 முதலிடம் வகிக்க, பாகி2, ரேஸ்3, டைகர் ஜிந்தா ஹை, சஞ்சு ஆகியவை அதிகம் கூகுள் செய்யப்பட்டுள்ளன. அவெஞ்சர்ஸ்: இன்பினிட்டி வார் இந்தியர்களால் அதிகம் கூகுள் செய்யப்பட்ட ஹாலிவுட் திரைப்படமாகும். பிளாக் பேந்தர், டெட்பூல்2, செக்ஸ் அண்ட் த சிட்டி, தி நன் ஆகியவையும் அடுத்தடுத்த அதிகம் தேடப்பட்டவைகளில் உள்ளன.
சமீபத்தில் திருமணம் செய்து கொண்ட ஜோடி பிரியங்கா சோப்ரா-நிக் ஜோனாஸ் டாப் 5 ட்ரெண்டிங் ஆளுமைகளில் உள்ளது. அதேபோல் புகழ்பெற்றவர்கள் திருமணங்களில் இந்திய மக்களைக் கவர்ந்தது பிரியங்கா சோப்ரா-நிக் ஜோனாஸ் திருமணம், தீபிக படுகோன் திருமணம், சோனம் கபூர் திருமணம் ஆகியவை 2018-ல் டாப் ட்ரெண்டிங் செய்திகளாக இருந்தது. மேலும் கர்நாடகா தேர்தல் முடிவுகள், நிபா வைரஸ், சர்தார் வல்லபாய் படெல் ஒருமைப்பாடு சிலை, பிட்காயின் பிரைஸ், பட்ஜெட் 2018, மற்றும் செக்ஷன் 377 ஆகியவையும் அதிகம் தேடப்பட்டுள்ளது. தன் பாலின் உறவு குற்றமல்ல என்ற உச்ச நீதிமன்ற தீர்ப்பு குறித்த ‘வாட் இஸ்’ என்ற தேடல் அதிகம் பதிவாகியுள்ளது.