மேட்டுப்பாளையம் பவானி ஆற்றில் கலக்கும் கழிவுநீர்.
கோவை: குப்பை கொட்டுவது, கழிவுநீர் கலப்பது உள்ளிட்ட காரணங்களால் மேட்டுப்பாளையம் பவானி ஆறு நாள்தோறும் மாசடைந்து வருவதாக பொதுமக்கள் குற்றம்சாட்டுகின்றனர்.
கோவை மாவட்டம் மேட்டுப் பாளையத்தின் அடையாளமாக விளங்கும் பவானி ஆற்று நீரை கோவை, திருப்பூர் மாவட்டங்களில் பல லட்சம் மக்கள் குடிநீருக்காகப் பயன்படுத்தி வருகின்றனர். இந்நிலையில், ஆற்றிலும் அதன் கரையோரப் பகுதிகளிலும் அதிக அளவில் குப்பை கொட்டப்படுகிறது.
மேலும், கழிவுநீரும் ஆற்றில் கலப்பதால் நீர்நிலை மாசடைந்து வருகிறது. இதனால், ஆற்றில் இருந்து எடுக்கப்படும் குடிநீரின் தரமும் பாதிக்கப்படுவதாகக் கூறப்படுகிறது. பல ஆண்டுகளாக நீடிக்கும் இப்பிரச்சினைக்கு இதுவரை நிரந்தரத் தீர்வு காணப்படவில்லை.
இதுகுறித்து மேட்டுப்பாளையம் பகுதி மக்கள் கூறியதாவது: மேட்டுப்பாளையம் பவானி ஆற்றில் இருந்து 20-க்கும் மேற்பட்ட குடிநீர்த் திட்டங்களுக்கு தண்ணீர் எடுக்கப்படுகிறது. ஆனால், ஆற்றில் நாள்தோறும் குப்பை கொட்டப்படுகிறது.
கழிவு நீரும் கலக்கிறது. சுற்றுலாப் பயணிகளின் வருகையால் ஆற்றங்கரைப் பகுதிகளில் குப்பை அதிகரித்து வருகிறது. இதுபோன்ற காரணங்களால் பவானி ஆறு தொடர்ந்து மாசடைந்து வருகிறது. இங்கிருந்து எடுக்கப்படும் குடிநீரைப் பயன்படுத்தும் பல லட்சம் மக்கள் பாதிக்கப்படும் அபாயம் உள்ளது.
ஆற்றுப் பகுதிகளில் குப்பை மற்றும் கழிவுகள் கொட்டப்படுவதால், நீரின் தரம் ஆண்டு தோறும் மோசமடைந்து வருகிறது. மாசுக்கட்டுப்பாட்டு வாரியம் அவ்வப்போது தண்ணீர் மாதிரிகளைச் சேகரித்து ஆய்வு செய்தாலும், குடிநீருக்கான பிரதான ஆதாரமாக விளங்கும் ஆற்றை மாசுபடாமல் பாதுகாப்பதே மிகவும் அவசியம்.
மேட்டுப்பாளையம் நகராட்சி, சம்பந்தப்பட்ட பிற துறைகளுடன் இணைந்து ஒருங்கிணைந்த நடவடிக்கை மேற்கொண்டால் மட்டுமே, இந்த ஆற்று நீரை ஆதாரமாகக் கொண்ட குடிநீர்த் திட்டங்களின் பயனாளிகளுக்கு எதிர்காலத்தில் தூய்மையான குடிநீர் கிடைப்பதை உறுதி செய்ய முடியும். இவ்வாறு அவர்கள் தெரிவித்தனர்.
இதுகுறித்து மேட்டுப்பாளையம் நகராட்சி நிர்வாகத்தினர் கூறும்போது, “மேட்டுப்பாளையம் - ஊட்டி பிரதான சாலையில் உள்ள ஓடந்துறை பாலம் அருகே குப்பை கொட்டப்படுகிறது. இதைத் தடுக்க எச்சரிக்கைப் பதாகைகள் வைக்கப்பட்டுள்ளன.
அவ்வப்போது அபராதமும் விதிக்கப்படுகிறது. இருப்பினும், சுற்றுலாப் பயணிகளின் வருகை அதிகமாக இருப்பதால், குப்பை கொட்டுவதை முழுமையாகக் கட்டுப்படுத்துவதில் சிரமம் நிலவுகிறது.
இதுதொடர்பாக பாலப் பகுதியில் நெடுஞ்சாலைத் துறையினர்தான் உரிய நடவடிக்கை எடுக்க வேண்டும். மேலும், பாதாளச் சாக்கடைத் திட்டமும் முழுமையாகச் செயல்படுத்தப்படாததால், ஆற்றின் பல்வேறு பகுதிகளில் கழிவுநீர் கலப்பதைத் தடுக்க முடியாத நிலை உள்ளது என்றனர்.