உயர்கல்வி அமைச்சர் விஸ்வநாதன்
சென்னை: பொறியியல் படிப்புக்கான தரவரிசை பட்டியல் ஜூலை 1-ம் தேதி வெளியிடப்படும் என உயர் கல்வித் துறை அமைச்சர் பி.விஸ்வநாதன் அறிவித்துள்ளார். முன்னதாக, தரவரிசை பட்டியல் ஜூன் 29-ம் தேதி அன்று வெளியிடப்படும் என அறிவிக்கப்பட்டிருந்தது.
தமிழகத்தில் அரசு பொறியியல் கல்லூரிகள், அரசு உதவி பெறும் பொறியியல் கல்லூரிகள், அண்ணா பல்கலைக்கழக துறைசார் கல்லூரிகள் என 400-க்கும் மேற்பட்ட பொறியியல் கல்லூரிகள் இயங்கி வருகின்றன. இவற்றில் வழங்கப்படும் பி.இ, பி.டெக் படிப்புகளில் ஏற்ததாழ ஒரு லட்சத்து 8 ஆயிரம் இடங்கள் அரசு ஒதுக்கீட்டு இடங்கள் ஆகும். இவை ஒற்றைச்சாளர முறையில் பொது கலந்தாய்வு மூலம் நிரப்பப்படுகின்றன. இந்த கலந்தாய்வை தமிழக அரசு சார்பில் தொழில்நுட்பக் கல்வி இயக்ககம் ஆண்டுதோறும் நடத்தி வருகிறது.
அந்த வகையில் நடப்பு கல்வி ஆண்டில் (2026-2027) அரசு ஒதுக்கீட்டு பிஇ, பிடெக் இடங்களில் சேருவதற்கான ஆன்லைன் விண்ணப்ப பதிவு கடந்த மே 3-ம் தேதி தொடங்கி ஜூன் 5-ம் தேதி முடிவடைந்தது. மொத்தம் 2.23 லட்சம் மாணவ - மாணவிகள் விண்ணப்பித்துள்ளனர். அவர்கள் பதிவேற்றம் செய்த சான்றிதழ்கள் மற்றும் ஆவணங்களை ஆன்லைனில் சரிபார்க்கும் பணி ஜூன் 8-ம் தேதி தொடங்கி தொர்ந்து நடைபெற்று வருகிறது.
இந்த பணி வருகிற 29-ம் தேதி முடிவடைகிறது. அன்றைய தினம் தரவரிசை பட்டியல் வெளியிடப்படும என தொழில்நுட்பக் கல்வி இயக்ககம் முன்பு அறிவித்திருந்தது.
இந்நிலையில், தரவரிசை பட்டியல் வெளியிடும் நாள் ஜூலை 1-ம் தேதிக்கு மாற்றப்பட்டுள்ளது. இதுதொடர்பாக உயர் கல்வித் துறை அமைச்சர் பி.விஸ்வநாதன் செவ்வாய்க்கிழமை மாலை வெளியிட்ட செய்திக் குறிப்பு: சிபிஎஸ்இ 12-ம் வகுப்பு விடைத்தாள் மறுமதிப்பீட்டு முடிவுகள் ஜூன் 21 முதல் படிப்படியாக வெளியிடப்பட்டு வருகின்றன.
இந்நிலையில், ஜூன் 29-ம் தேதி அன்று வெளியிட இருந்த பொறியியல் தரவரிசை பட்டியல் ஜூலை 1-ம் தேதி அன்று வெளியிடப்படும். அன்றைய தினம், பொறியியல் சேர்க்கைக்கான கலந்தாய்வு தேதிகளும் அறிவிக்கப்படும். தரவரிசை பட்டியலில் ஏதேனும் குறைபாடு இருந்தால் அவற்றை சரிசெயவ்தற்கு ஜூலை 1 முதல் 5 வரை காலஅவகாசம் அளிக்கப்படும்.
இந்த காலகட்டத்தில் மாணவர்கள் தங்கள் குறைகளை நிவர்த்தி செய்துகொள்ள தங்கள் இருப்பிடத்துக்கு அருகேயுள்ள தமிழ்நாடு பொறியியல் மாணவர் சேர்க்கை சேவை மையத்தை (TFC) நேரில் அணுகலாம் என்று அவர் கூறியுள்ளார்.