முகுந்தன், சஞ்சய்
ஆவடி: மது அருந்தும்போது ஏற்பட்ட தகராறில் இளைஞர் கொலை செய்யப்பட்டு புழல் ஏரியில் வீசப்பட்டார்.
இச்சம்பவம் தொடர்பாக 2 சிறுவர்கள் உட்பட 4 பேரை நேற்று போலீஸார் கைது செய்தனர்.
சென்னை, அம்பத்தூர் அருகே உள்ள சண்முகபுரம், அன்னை இந்திரா நகரை சேர்ந்தவர்கள் முகுந்தன்(23), சஞ்சய்(18). நண்பர்களான இவர்கள் கடந்த 28-ம் தேதி இரவு, அன்னை இந்திரா நகர் பகுதியில் உள்ள புழல் ஏரிக் கரைக்கு மது அருந்தச் சென்றுள்ளனர்.
இருவரும் மது அருந்த ஆரம்பிக்கும் நேரத்தில், சஞ்சய் தன் நண்பர்களான 17 வயதுடைய 2 சிறுவர்களை செல்போன் மூலம் மது அருந்த அழைத்துள்ளார். இதையடுத்து, சிறுவர்கள் இருவரும் அங்கு வந்து, அவர்களுடன் சேர்ந்து மது அருந்தியதாக கூறப்படுகிறது.
அப்போது முகுந்தனுக்கும், சஞ்சய்க்கும் இடையே தகராறு ஏற்பட்டுள்ளது. அப்போது சஞ்சய் கத்தியால், முகுந்தனை வெட்டிக் கொலை செய்துள்ளார்.
பிறகு தன் இரு நண்பர்கள் உதவியுடன், முகுந்தனின் உடலை ஏரிக்கரையில் கிடந்த பழைய துணிகளால் கட்டி, புழல் ஏரியினுள் வீசியுள்ளார். தொடர்ந்து சஞ்சய் உள்ளிட்ட 3 பேரும் தலைமறைவாகினர்.
இந்நிலையில் நேற்று காலை புழல் ஏரியில் சடலம் மிதப்பதை அறிந்த புதூர் போலீஸார் விரைந்து சென்று முகுந்தனின் உடலைக் கைப்பற்றி, பிரேதப் பரிசோதனைக்காக கீழ்ப்பாக்கம் அரசு மருத்துவமனைக்கு அனுப்பி வைத்தனர்.
தொடர்ந்து வழக்குப் பதிவு செய்து விசாரித்தனர், அதன் அடிப்படையில், தலைமறைவாக இருந்த சஞ்சய் மற்றும் இரு சிறுவர்கள் என 3 பேரை கைது செய்து விசாரணை நடத்தினர்.
அதில் முகுந்தன் கொலைக்கு, சண்முகபுரம், பாரதிதாசன் நகரை சேர்ந்த ஹரிகிருஷ்ணன் (23) என்பவரும் தூண்டுகோலாக இருந்தது தெரியவந்தது. ஆகவே ஹரிகிருஷ்ணனையும் போலீஸார் கைது செய்தனர்.