நாகர்கோவில்: பிரபலமான வேகத்திலேயே பிரச்சினைகளிலும் சிக்கி வருகிறார் பெண் யூடியூபர் மதுமிதா. தன்னைப் பற்றி அடுத்தடுத்து வெளிவரும் மர்ம தகவல்களால், போலீஸ் விசாரணைக்கு பயந்து அவர் வீட்டை பூட்டிவிட்டு தலைமறைவாகியுள்ளார்.
நாகர்கோவிலை அடுத்த தம்மத்துக்கோணத்தைச் சேர்ந்த பெண் யூடியூபர் மதுமிதா (28), சமீபத்தில் பணம், நகைகளை வாரியிறைத்தும், தனது குழந்தைக்கு 500 ரூபாய் நோட்டுகளால் அபிஷேகம் செய்தும் வீடியோக்களை பதிவிட்டது சர்ச்சையானது. இந்த வீடியோக்களைப் பார்த்த 4 பேர் சேர்ந்து அவரது வீட்டில் நகை, பணத்தை திருடினர்.
மதுமிதா போலீஸில் அளித்த புகாரில் 118 பவுன் நகை திருடு போனதாக தெரிவித்திருந்த நிலையில், கைது செய்யப்பட்டவர்களிடம் இருந்து 98 பவுன் மட்டும் மீட்கப்பட்டது. மதுமிதா தனது யூடியூப் மூலம் 6,000-க்கும் அதிகமான வீடியோக்களை வெளியிட்டுள்ளார். வீட்டில் நகை திருட்டு நடந்த பின்னரும், கடந்த ஒரு வாரத்தில் ஓட்டலில் தனது குழந்தையுடன் நீச்சல் குளத்தில் இருப்பது போலவும், கேக் வெட்டுவது போலவும் பல வீடியோக்களை பதிவிட்டார்.
இதனிடையே, மதுமிதா பணமழை பொழியும் வீடியோவை ஆய்வு செய்த வருமான வரித்துறை அதிகாரிகள், அவரது வீட்டில் விசாரணை மேற்கொண்டனர். அத்துடன், நெல்லை கே.டி.சி. நகரைச் சேர்ந்த கட்டிட ஒப்பந்ததாரர் பேச்சிமுத்து (89), தனது 5 பவுன் நகையை பறித்துச் சென்றதாக அளித்த புகாரின்பேரில், மதுமிதா மீது ராஜாக்கமங்கலம் போலீஸார் வழக்கு பதிவு செய்துள்ளனர். இப்படி மதுமிதா அடுத்தடுத்து சர்ச்சையில் சிக்கினார்.
நகை பறிப்பு வழக்கில் போலீஸ் விசாரணைக்கு பயந்து நேற்று முன்தினம் வீட்டை பூட்டிவிட்டு கணவர் வினோத்குமார் மற்றும் குழந்தையுடன் மதுமிதா தலைமறைவாகியுள்ளார்.
இத்தனை பிரச்சினைகளுக்கு பிறகும் சமூக ஊடகங்களில் மதுமிதா வெளியிட்ட மற்றும் அவர் தொடர்புடைய வீடியோக்கள் பல கோடி பார்வைகளைக் கடந்து வைரலானதால், அவரைப் பின்தொடர்பவர்களின் எண்ணிக்கையும் மிக வேகமாக அதிகரித்து, 5 லட்சத்தை நெருங்கியுள்ளது. மதுமிதாவின் தனிப்பட்ட வாழ்க்கையை அறிந்துகொள்ள, அவரை யூடியூபில் பின்தொடர்வோர் அதிக ஆர்வம் காட்டி வருகின்றனர்.