சென்னை: மதுரவாயல் அருகே மேம்பால கட்டுமானப் பணியை மேற்கொண்டு வரும் தனியார் நிறுவனத்தில் விஜயகுமார் (48) என்பவர் நிர்வாகப் பொறுப்பாளராகப் பணியாற்றி வருகிறார்.
இந்நிறுவனத்தினர் மதுரவாயல் ஏரிக்கரை அருகே மேம்பாலத் தூண் பகுதியில் கட்டுமானப் பணிக்காக இரும்புப் பொருட்களை வைத்திருந்தனர்.
இந்நிலையில், அக்.23-ம் தேதி மாலை இருசக்கர வாகனத்தில் வந்த 3 பேர், அங்கிருந்த ரூ.25 ஆயிரம் மதிப்பிலான இரும்புப் பொருட்களைத் திருடி சென்றதாகக் கூறப்படுகிறது.
இதுகுறித்து விஜயகுமார் அளித்த புகாரின் பேரில், மதுரவாயல் போலீஸார் வழக்குப் பதிவு செய்து விசாரணை மேற்கொண்டனர்.
விசாரணையில், இரும்புப் பொருட்களைத் திருடிச் சென்றது, திருவேற்காடு, ஐயப்பா நகரைச் சேர்ந்த சதீஷ்குமார் (25), ஸ்ரீதேவி நகரைச் சேர்ந்த சூர்யா (25), ஐயப்பா நகரைச் சேர்ந்த சபித்குமார் (23) என்பது தெரியவந்தது. இதையடுத்து, 3 பேரையும் நேற்று முன்தினம் கைது செய்த போலீஸார் அவர்களை சிறையில் அடைத்தனர்.