தஞ்சாவூர்: தனியார் மருத்துவமனை விவகாரத்தில் ரூ.5 கோடி பணம் கைமாறியது தொடர்பான வீடியோ வெளியாகி இருப்பது சர்ச்சையை ஏற்படுத்தியுள்ளது.
தஞ்சாவூர் நம்பர் 1 வல்லம் சாலையில் உள்ள தனியார் மருத்துவமனையின் நிர்வாக இயக்குநராக ஆர்.எம்.பாஸ்கரன், இயக்குநராக சரவணன், பங்குதாரராக ஜெய ராமசாமி ஆகியோர் இருந்தனர். இதில் பங்குதாரருக்கும், நிர்வாக இயக்குநருக்கும் இடையே ஏற்பட்ட பிரச்சினையில், இரு தரப்பினரும் தஞ்சாவூர் மருத்துவக் கல்லூரி காவல் நிலையத்தில் புகார் அளித்தனர். இந்த புகாரின் பேரில் போலீஸார் வழக்குப் பதிவு செய்து விசாரித்து வந்தனர்.
இந்த நிலையில் காவல் துறையின் உயர் அதிகாரி ஒருவர் அறிவுறுத்தலின்பேரில், தஞ்சாவூர் குற்றப்பிரிவு ஆய்வாளர் சுகுமாறன் முன்னிலையில் அவரது வீட்டில் இரு தரப்பினருக்கும் இடையே பேச்சுவார்த்தை நடைபெற்றது.
இதில், பங்குதாரர் ஜெயஸ்ரீக்கு மருத்துவமனை நிர்வாகம் ரூ.24 கோடி கொடுப்பதாக ஒப்பந்தம் செய்து கொண்டதாகவும், முதற்கட்டமாக ரூ.5 கோடியை சரவணன் தரப்பினர் கொண்டு வந்திருந்ததாகவும் கூறப்படுகிறது. இதை அப்போது இரு தரப்பினரும் செல்போன்களில் வீடியோவாக பதிவு செய்து கொண்டனர்.
இந்த நிலையில் சுகுமாறனின் வீட்டில் இருந்து ஜெயஸ்ரீக்கு கொடுப்பதாக கூறி வாங்கப்பட்ட பணம் உரிய நேரத்தில் அவர்களுக்கு கிடைக்கவில்லை எனக் கூறி, சரவணனிடம் மீண்டும் ஜெய தரப்பினர் நெருக்கடி கொடுத்ததாக தெரிகிறது.
இதுகுறித்து தமிழக டிஜிபிக்கு சரவணன் புகார் அளித்ததைத் தொடர்ந்து, இந்த வழக்கு சிபிசிஐடிக்கு மாற்றப்பட்டது. பின்னர், தஞ்சாவூர் குற்றப்பிரிவு ஆய்வாளர் சுகுமாறன் ரூ.5 கோடி பெற்றதாக கூறி, சிபிசிஐடி போலீஸார் கடந்த அக்.9-ம் தேதி அவரை கைது செய்தனர். அந்த வழக்கை நேற்று முன்தினம் விசாரித்த உயர் நீதிமன்றத்தின் மதுரை கிளை, சுகுமாறன் கைது செய்யப்பட்டது சட்ட விரோதம் எனக் கூறி, அவரை விடுவிக்க உத்தரவிட்டது.
இந்நிலையில், பேச்சுவார்த்தையின்போது சுகுமாறன் வீட்டில் பணம் கட்டுகட்டாக இருக்கும் வீடியோ நேற்று சமூக வலைதளங்களில் வெளியானது. இது இந்த வழக்கில் மீண்டும் பரபரப்பை ஏற்படுத்தியுள்ளது.