பார்த்திபன், சீனிவாசன்
வேலூர்: கே.வி.குப்பம் அருகே வங்கி யில் கவரிங் நகைகளை அடமானம் வைத்து ரூ.1.07 கோடி மோசடி செய்ததாக வங்கியின் நகை மதிப்பீட்டாளர்கள் இருவரை வேலூர் மாவட்ட குற்றப்பிரிவு காவல் துறையினர் கைது செய்து சிறையில் அடைத்தனர்.
வேலூர் மாவட்டம் கே.வி.குப்பம் அடுத்த மேல் காவனூரில் தேசிய மயமாக்கப்பட்ட வங்கியின் கிளை இயங்கி வருகிறது. இந்த வங்கியில் சின்ன வடுகன்தாங்கல் கிராமத்தைச் சேர்ந்த பார்த்திபன் (32), என்பவர் கடந்த 3 ஆண்டுகளாக நகை மதிப்பீட்டாளராக பணிபுரிந்து வருகிறார். கீழ் முட்டுகூர் கிராமத்தைச் சேர்ந்தவர் சீனிவாசன் (55) என்பவரும் அதே வங்கியில் கடந்த 15 ஆண்டுகளாக நகை மதிப்பீட்டாளராக பணிபுரிந்து வருகிறார்.
இந்த வங்கியில் சென்னையில் இருந்து வந்த அதிகாரிகள் குழுவினர் அடமானத்தில் இருந்த நகைகளை ஆய்வு செய்தனர். அப்போது, இருப்பில் இருந்த தங்க நகைகளில் கவரிங் நகைகள் இருந்தது தெரியவந்தது. நகை மதிப்பீட்டாளர்கள் இருவரும் இதற்கு உடந்தை என்பது உறுதி செய்யப்பட்டது.
இதுகுறித்து, வேலூர் மாவட்ட குற்றப்பிரிவில் வங்கியின் மண்டல மேலாளர் யாசின் பாஷா (46) என்பவர் புகார் அளித்தார். அதன்பேரில், காவல் துறையினர் விசாரணை நடத்தியதில், இருவரும் கூட்டு சேர்ந்து கவரிங் நகைகளை 16 நகை கடன்கள் மூலம் 1,080 கிராம் தங்க நகைகளுக்கான மதிப்பீட்டில் கடனை, நண்பர்கள் மற்றும் உறவினர்கள் பெயரில் கடந்த ஏப்ரல் மாதம் முதல் கடந்த மாதம் வரை கடன் பெற்றுள்ளனர்.
இதன்மூலம் ரூ.1 கோடியே 7 லட்சத்து 28 ஆயிரம் பணத்தை பெற்று மோசடி செய்துள்ளனர். இந்த பணத்தில் பெருந்தொகையை பார்த்தீபன், ஆன்லைன் பங்கு வர்த்தகத்தில் முதலீடு செய்து நஷ்டம் அடைந்ததுடன், ரூ.25 லட்சம் அளவுக்கு வெளி வட்டாரத்தில் இருந்த கடனையும் அடைத்துள்ளார். இந்த மோசடியில் பார்த்தீபன் பிரதான குற்றவாளியாகவும் அவருக்கு சீனிவாசன் உடந்தையாகவும் இருந்துள்ளார் என்பது உறுதி செய்யப்பட்டது.
இதையடுத்து, தங்க நகை மோசடி வழக்கில் ஈடுபட்ட நகை மதிப்பீட்டாளர்கள் பார்த்தீபன் மற்றும் சீனிவாசன் ஆகியோரை காவல் துறையினர் கைது செய்து வேலூர் மத்திய சிறையில் அடைத்தனர்.