சென்னை: கிரிப்டோகரன்சியில் முதலீடு செய்தால் அதிக லாபம் தருவதாகக் கூறி சுமார் ரூ.146 கோடி வரை நிதி மோசடியில் ஈடுபட்ட விவகாரத்தில், மேலும் இருவரை அமலாக்கத்துறை கைது செய்துள்ளது.
புதுச்சேரி சைபர் குற்றப் பிரிவு காவல்துறை பதிவு செய்த முதல் தகவல் அறிக்கையின் அடிப்படையில், ‘ஹாஷ்பே’ கிரிப்டோகரன்சி மோசடி தொடர்பாக அமலாக்கத்துறை சட்டவிரோத பணப்பரிவர்த்தனை தடைச் சட்டத்தின்கீழ் விசாரணையைத் தொடங்கியது.
இதன் தொடர்ச்சியாக, கடந்த செப்.1-ம் தேதி சென்னை, கோவை, கொல்கத்தா உட்பட 11 இடங்களில் அமலாக்கத்துறை அதிரடி சோதனை நடத்தியது. அதில் கைப்பற்றப்பட்ட ஆவணங்களின் அடிப்படையில், அமலாக்கத்துறை விசாரணையைத் தொடர்ந்தது.
முதற்கட்ட விசாரணையில், ‘ஹிதேஷ் குமார், இம்ரான் பாஷா, சையது உஸ்மான் மற்றும் தாமோதரன் உள்ளிட்டோர் இணைந்து ஹாஷ்பே என்ற பெயரில் ஒரு போலி முதலீட்டுத் திட்டத்தை உருவாக்கியது தெரியவந்தது.
மேலும், ‘டிசிஎக்ஸ்’ (TCX) எனப்படும் கிரிப்டோகரன்சி வர்த்தக தளம் மூலம் குறுகிய காலத்தில் அதிக லாபம் ஈட்டலாம் என ஆசை வார்த்தை கூறி முதலீட்டாளர்களைக் கவர்ந்துள்ளனர்.
இந்தத் திட்டத்தை உண்மையானது என நம்ப வைப்பதற்காக, பாலிவுட் பிரபலங்களைப் பங்கேற்கச் செய்து ஆடம்பரமான அறிமுக விழாக்கள், கார் விருது வழங்கும் நிகழ்ச்சிகள் மற்றும் மும்பையில் உள்ள ஒரு சொகுசுக் கப்பலில் பிரம்மாண்ட நிகழ்வுகளை நடத்தியுள்ளனர்.
மேலும், சமூக ஊடக விளம்பரங்கள் மற்றும் ‘ரெஃபரல் கமிஷன்’ முறையையும் பயன்படுத்தி அப்பாவி முதலீட்டாளர்களை வலைவீசிப் பிடித்துள்ளனர்’ என்று தெரியவந்தது. இதையடுத்து, இந்த மோசடியில் தொடர்புடைய ஹிதேஷ் குமார், இம்ரான் பாஷா ஆகிய இருவரையும் அமலாக்கத்துறை கடந்த 6-ம் தேதி கைது செய்து சிறையில் அடைத்தது.
தலைமறைவாக இருந்த மற்ற குற்றவாளிகளைத் தேடி வந்த நிலையில், கடந்த 22-ம் தேதி சையது உஸ்மான் மற்றும் அவரது கூட்டாளி தாமோதரன் ஆகிய இருவரையும் அமலாக்கத்துறை கைது செய்துள்ளது.
அவர்களிடம் நடத்திய விசாரணையின் அடிப்படையில் அமலாக்கத்துறை வெளியிட்டுள்ள செய்திக்குறிப்பில் கூறியிருப்பதாவது: முதலீட்டாளர்களிடம் இருந்து ரொக்கமாக ரூ.16 கோடியும், ‘ஹைஃபி சர்க்கிள்’ என்ற பெயரிலான வங்கி கணக்கு மூலம் ரூ.10.52 கோடியும், கிரிப்டோகரன்சி மூலம் ரூ.120 கோடியும் என மொத்தம் ரூ.146 கோடி வரை இவர்கள் திரட்டியுள்ளனர்.
சையத் உஸ்மான் பெருமளவிலான ரொக்க முதலீடுகளைக் கையாண்டதுடன், நிதியைத் திரட்டப் ‘ஹைஃபி சர்க்கிள்’ வங்கிக் கணக்கையும் இயக்கி வந்துள்ளார். தாமோதரன் ‘ஹாஷ்பே’ மென்பொருள், தரவுத்தளம் மற்றும் தளத்தின் வாலட் செயல்பாடுகள் உள்ளிட்ட கிரிப்டோகரன்சி சார்ந்த தொழில்நுட்ப நிர்வாகத்தைக் கவனித்து வந்துள்ளார்.
குற்றத்தின் மூலம் ஈட்டப்பட்ட இந்த பெருந்தொகை, சையத் உஸ்மான், தாமோதரன், அவர்களின் குடும்ப உறுப்பினர்கள் மற்றும் தொடர்புடைய நிறுவனங்களின் தனிப்பட்ட வங்கிக் கணக்குகளுக்குத் திசைதிருப்பப்பட்டுள்ளது.
அந்த நிதியைக் கொண்டு கிரிப்டோகரன்சி மற்றும் அசையாச் சொத்துக்களில் முதலீடு செய்ததும் அம்பலமாகியுள்ளது. தற்போது கைது செய்யப்பட்டுள்ள சையத் உஸ்மான் மற்றும் தாமோதரன் ஆகிய இருவரும் நீதிமன்றக் காவலில் சிறையில் அடைக்கப்பட்டுள்ளனர்.
இந்த மோசடித் தொடர்பில் மேல் விசாரணை தீவிரமாக நடைபெற்று வருகிறது. இவ்வாறு அதில் கூறப்பட்டுள்ளது.