அரூர்: அரசுப் பள்ளிகளில் நுழையும் மர்ம நபர்கள் ஆய்வகத்தில் உள்ள கணினிகளின் ஹார்டு டிஸ்க்குகள், மதர் போர்டுகளை குறிவைத்து திருடிச் செல்வதால் மாணவர்களின் கல்வி பாதிக்கப்பட்டுள்ளதாக அரூர் பகுதியில் உள்ள பள்ளிகளின் ஆசிரியர்கள் அச்சம் தெரிவித்துள்ளனர்.
தமிழகத்தில் உள்ள அரசு உயர்நிலை மற்றும் மேல்நிலைப் பள்ளிகளில் தகவல் தொடர்பு தொழில்நுட்பத்தை மேம்படுத்தும் நோக்கில் உயர் தொழில்நுட்ப ஆய்வகங்கள் (ஹை-டெக் லேப்கள்) உள்ளன. தற்போது நடுநிலைப் பள்ளிகளுக்கும் இந்த வசதி விரிவுபடுத்தப்பட்டுள்ளது.
ஒரு நடுநிலைப் பள்ளிக்குத் தலா 10 கணினிகள், புரொஜெக்டர், சர்வர் மற்றும் இணையதள வசதிகள் ஆகியவை ஆய்வகங்களில் செய்து தரப்படுகின்றன. மாணவர்களிடம் டிஜிட்டல் அறிவு, படைப்பாற்றல், ஆங்கில மொழித்திறன் மற்றும் கணினி சார்ந்த செயல்பாடுகளை வளர்ப்பதே இதன் முக்கிய நோக்கமாகும்.
இத்திட்டத்தின்கீழ் தருமபுரி மாவட்டம் அரூர் வட்டாரத்துக்குட்பட்ட 37 நடுநிலைப் பள்ளிகளில் ஹைடெக் லேப்கள் செயல்பாட்டில் உள்ளன. கடந்த சில நாட்களாக அரூர் பகுதியில் உள்ள அரசுப் பள்ளிகளில் கணினிகளை குறிவைத்து மர்ம நபர்கள் திருட்டு சம்பவங்களில் தொடர்ந்து ஈடுபட்டு வருகின்றனர்.
கடந்த 4-ம் தேதி அச்சல்வாடியில் உள்ள அரசு நடுநிலைப்பள்ளியில் கணினி ஆய்வகத்தின் பூட்டை உடைத்து உள்ளே புகுந்த கும்பல் 10 ஹார்டு டிஸ்க்குகள், மதர்போர்டுகள் உள்ளிட்ட கணினியின் முக்கிய பொருட்களை திருடிச் சென்றது. இதேபோல, கடந்த 5-ம் தேதி கீழானூரில் உள்ள நடுநிலைப் பள்ளியில் 10 ஹார்டு டிஸ்க்குகள், மதர்போர்டுகள் உள்ளிட்டவையும், 23-ம் தேதி சோரியம்பட்டியில் உள்ள பள்ளியில் 11 ஹார்டு டிஸ்க்குகள், மதர்போர்டுகள் உள்ளிட்டவையும் திருடப்பட்டிருந்தன. ஏற்கெனவே, கடந்த மாதத்தில் பள்ளிப்பட்டி, அம்பாலப்பட்டி, பாப்பிரெட்டிப்பட்டி மற்றும் அரூர் நகர் பகுதிகளில் உள்ள சில பள்ளிகளிலும் கணினி ஆய்வகத்தில் திருட்டு நடந்தது.
இதன் தொடர்ச்சியாக நேற்று முன்தினம் இரவு அரூர் நகராட்சி ராயப்பன்கொட்டாய் நடுநிலைப் பள்ளியிலும் மர்ம நபர்கள் புகுந்து 10 ஹார்டு டிஸ்க்குகள், மதர் போர்டு, அங்கிருந்த கண்காணிப்பு கேமராவின் மெமரி கார்டு உள்ளிட்டவற்றை திருடிச் சென்றுள்ளனர்.
இந்த தொடர் திருட்டு குறித்து கல்வித் துறையினர் மற்றும் ஆசிரியர்கள் கூறும்போது, “அரசுப் பள்ளிகளில் நடைபெறும் கணினி திருட்டால் மாணவர்களுக்கு கல்வி கற்பிப்பதில் பெரும் பாதிப்பு ஏற்பட்டுள்ளது. ஆய்வகத்தின் பூட்டை உடைத்து உள்ளே நுழையும் கும்பல், கணினியில் விலை உயர்ந்த பொருட்களை மட்டும் திருடிச் செல்கின்றன. மேலும், கண்காணிப்பு கேமராவில் மெமரி கார்டுகளையும் திருடிச் செல்கின்றனர். இதனால், கணினி குறித்து விவரமறிந்த நபர்களே இதில் ஈடுபட்டிருப்பார்கள் என தெரிகிறது. உடனடியாக திருட்டு கும்பலை பிடிக்க காவல் துறை நடவடிக்கை எடுக்க வேண்டும்” என்றனர்.