சென்னை: சென்னை விமான நிலையத்தில் ரூ.3.4 கோடி மதிப்புள்ள உயர்ரக கஞ்சா பறிமுதல் செய்யப்பட்டது.
மலேசியா தலைநகர் கோலாலம்பூரில் இருந்து பயணிகள் விமானம் சென்னைக்கு வந்தது. அதில் வந்த பயணிகளையும், அவர்களின் உடைமைகளையும் சுங்கத்துறை அதிகாரிகள் சோதனை செய்து வெளியே அனுப்பிக் கொண்டிருந்தனர்.
அப்போது வந்த சென்னையை சேர்ந்த 30 வயது பெண் மீது சுங்கத்துறை அதிகாரிகளுக்கு சந்தேகம் ஏற்பட்டது. சுற்றுலா விசாவில் மலேசியா சென்று திரும்பும் அந்தப் பெண் வைத்திருந்த பையை அதிகாரிகள் சோதனை செய்தபோது, அதில் ரூ.3.4 கோடி மதிப்புள்ள 3.4 கிலோ உயர்ரக ஹைட்ரோபோனிக் கஞ்சா மறைத்து வைக்கப்பட்டிருந்தது தெரியவந்தது.
இதையடுத்து, கஞ்சாவை பறிமுதல் செய்த அதிகாரிகள், அந்தப் பெண்ணை கைது செய்தனர். விசாரனையில் அப்பெண் சர்வதேச போதைப்பொருள் கடத்தல் கும்பலுக்கு கடத்தல் குருவியாக செயல்பட்டது தெரியவந்தது. சென்னையில் யாரிடம் கஞ்சாவை கொடுக்கவிருந்தார் என்பது குறித்து அதிகாரிகள் விசாரணை நடத்தி வருகின்றனர்.