சென்னை: விருதுநகர் ரோசப்பட்டி பாண்டியன் நகரைச் சேர்ந்தவர் கார்த்திக் ராஜா (28). இவரது சகோதரர் வினோத் (21). இருவரும் கடந்த 29-ம் தேதி தேர்வு எழுதுவதற்காக சென்னை வந்ததாகக் கூறி, பெரியமேட்டில் உள்ள தனியார் விடுதியில் தங்கியுள்ளனர்.
இந்நிலையில், நேற்று முன்தினம் இரவு அவர்கள் தங்கியிருந்த அறையில் இருந்து துர்நாற்றம் வீசியதில் சந்தேகம் அடைந்த விடுதி ஊழியர் சுப்பிரமணி, ரோந்து பணியில் இருந்த பெரியமேடு போலீஸாருக்கு அளித்த தகவலையடுத்து, பெரியமேடு காவல் நிலைய உதவி ஆய்வாளர் விநாயகம், போலீஸார் விடுதிக்கு விரைந்து சென்றார்.
சகோதரர்கள் தங்கியிருந்த அறையின் கதவை உடைத்து உள்ளே சென்று பார்த்தபோது, கார்த்திக் ராஜா, வினோத் ஆகிய இருவரும் தூக்கில் தொங்கிய நிலையில் இருந்தனர்.
இதையடுத்து உடல்களை் மீட்ட போலீஸார், பிரேத பரிசோதனைக்காக சென்னை ராஜீவ்காந்தி அரசு மருத்துவமனைக்கு அனுப்பி வைத்தனர். இதுதொடர்பாக பெரியமேடு போலீஸாரின் முதற்கட்ட விசாரணையில், உயிரிழந்த சகோதரர்களின் தந்தை, தாய் குடும்பத்தினர் இடையே குடும்ப பிரச்சினை இருந்துள்ளது.
இதனால் மனமுடைந்த இருவரும் சில நாட்களுக்கு முன்பு தாயாருடன் சேர்ந்து தற்கொலைக்கு முயன்றுள்ளனர். அப்போது தாய் உயிரிழந்துள்ளார். சகோதரர்கள் உயிர் தப்பியதாக போலீஸார் தெரிவித்துள்ளனர்.
தாயார் உயிரிழந்த துக்கத்தில் சகோதரர்கள் இருவரும் மனமுடைந்து சென்னை விடுதியில் தற்கொலை செய்து கொண்டதாக முதற்கட்ட விசாரணையில் தெரியவந்துள்ளது. இதுகுறித்து போலீஸார் விசாரணை நடத்தி வருகின்றனர்.