மீண்டும் தொடங்கப்படும் ‘இந்தியன் 3’ பேச்சுவார்த்தை?

‘இந்தியன் 3’ படத்தின் பணிகள் மீண்டும் தொடங்கப்படுவது தொடர்பான பேச்சுவார்த்தை நடைபெற்று வருவதாக தகவல்கள் வெளியாகியுள்ளன.

ஷங்கர் இயக்கத்தில் கமல் நடிப்பில் வெளியான படம் ‘இந்தியன் 2’. இதன் இறுதியில் ‘இந்தியன் 3’ படத்தின் ட்ரெய்லரும் இணைக்கப்பட்டது. ஆனால், ‘இந்தியன் 2’ படம் யாரும் எதிர்பாராத வகையில் மாபெரும் தோல்வியை தழுவியது. அதனைத் தொடர்ந்து ஷங்கர் இயக்கத்தில் வெளியான ‘கேம் சேஞ்சர்’ படமும் தோல்வியை தழுவியது. இதனால் ‘இந்தியன் 3’ படத்தின் பணிகள் அனைத்தும் நிறுத்தப்பட்டன.

தற்போது ‘வேள்பாரி’ படத்தின் பணிகளைத் தொடங்கும் முனைப்பில் இருக்கிறார் ஷங்கர். இதனால் ‘இந்தியன் 3’ படத்தின் நிலை குறித்த பேச்சுவார்த்தை தொடங்கவுள்ளதாக தகவல்கள் வெளியாகியுள்ளன. ‘வேள்பாரி’ படத்தின் பணிகளைத் தொடங்கிவிட்டால், மீண்டும் ‘இந்தியன் 3’ படத்தின் பணிகளில் தன்னால் ஈடுபட இயலாது என்று ஷங்கர் கறாராக சொல்லியிருப்பதாக கூறுகிறார்கள்.

இப்படித்தான் ‘இந்தியன் 2’ மற்றும் ‘கேம் சேஞ்சர்’ ஆகிய படங்களுக்கு இடையே மாட்டிக் கொண்டு, இரண்டுமே தோல்வியை தழுவியதால், ஒரு சமயத்தில் ஒரு படத்தில் மட்டுமே முழுமையாக கவனத்தை செலுத்துவது என்ற முடிவில் இருக்கிறார் ஷங்கர்.

’இந்தியன் 3’ படத்துக்கு இன்னும் சில நாட்கள் படப்பிடிப்பு, இறுதிகட்டப் பணிகள் என பல்வேறு விஷயங்கள் இருப்பதால் தயாரிப்பு நிறுவனமும் இந்த விவகாரத்தில் தீவிரம் காட்டும் என கூறப்படுகிறது. இதனால் விரைவில் ‘இந்தியன் 3’ படத்தின் பணிகள் குறித்த தகவல் விரைவில் வெளியாகும் என எதிர்பார்க்கப்படுகிறது.