அமெரிக்கத் தொலைக்காட்சித் துறையில் சிறந்து விளங்குபவர்களைக் கவுரவிக்கும் விதமாக எம்மி விருது வழங்கப்பட்டு வருகிறது. ஒவ்வொரு ஆண்டும் வழங்கப்படும் இந்த விருது விழாவில், விருது வழங்குவதற்கு உலக அளவில் பிரபலமானவர்களை அழைப்பது வழக்கம். இந்த முறை நடிகர் விஜய் சேதுபதி அழைக்கப்பட்டுள்ளார். இதன் மூலம் இவ்விழாவில் விருதை வழங்கும் முதல் இந்தியர் என்ற பெருமையை அவர் பெறுகிறார்.
அமெரிக்காவின் நியூயார்க் நகரில் நவ. 23-ல் நடைபெறும் 54-வது சர்வதேச எம்மி விருது விழாவில், அவர் பங்கேற்று விருது வழங்க உள்ளார். விஜய் சேதுபதி இதில் இடம்பெறுவதற்கு, சர்வதேச எம்மி விருதுகளை வழங்கும் ‘இன்டர்நேஷனல் அகாடமி ஆஃப் டெலிவிஷன் ஆர்ட்ஸ் அண்ட் சயின்சஸ்’அமைப்பின் வாரிய உறுப்பினரான கவிதா குப்தா, முக்கியப் பங்காற்றியுள்ளார்.