‘வித் லவ்’ வெற்றியை உணர்ந்த தருணம்: செளந்தர்யா ரஜினிகாந்த் விவரிப்பு

‘வித் லவ்’ படத்தின் வெற்றியை உணர்ந்த தருணம் குறித்து பத்திரிகையாளர் சந்திப்பில் செளந்தர்யா ரஜினிகாந்த் விவரித்துள்ளார்.

மதன் இயக்கத்தில் அபிஷன் ஜீவிந்த் மற்றும் அனஸ்வரா நடிப்பில் வெளியான படம் ‘வித் லவ்’. இப்படம் மக்கள் மத்தியில் வரவேற்பைப் பெற்றது. இதனைத் தொடர்ந்து வெற்றியைக் கொண்டாடும் வகையில் பத்திரிகையாளர்களை சந்தித்து நன்றி தெரிவித்தது படக்குழு. இந்தச் சந்திப்பில் படக்குழுவினர் அனைவரும் கலந்து கொண்டனர்.

இந்த விழாவில் தயாரிப்பாளர் செளந்தர்யா ரஜினிகாந்த் பேசியதாவது: “ரொம்ப சந்தோஷமாக இருக்கிறது. மகிழ்ச்சி என்ற வார்த்தை கூட இந்த உணர்வுக்கு சரியாக இருக்காது. ப்ரீமியர் ஷோவில் அப்பா படம் பார்த்து, படத்தை அடுத்த கட்டதிற்கு எடுத்துச் சென்று விட்டார்.

படம் முடிந்ததும், வீட்டிற்கு சென்றபோது அப்பா–அம்மா இருவரும் என்னைக் கட்டிப்பிடித்து சிரித்தார்கள். அப்போது தான் ‘இதுதான் சக்ஸஸ்’ என்று உணர்ந்தேன்.

அந்த அப்பாவின் சிரிப்பை வாழ்க்கை முழுக்க மறக்க மாட்டேன். 16–18 ஆண்டுகளாக சினிமா பயணத்தில் இருந்தாலும், இந்தப் படத்தின் மூலமாக தான் ‘வெற்றி’ என்பதன் உண்மையான அர்த்தம் புரிந்தது இது தான் முதல் சக்சஸ் மீட்.

அபி எனக்கு ஒரு பேபி பிரதர். அந்த மனதிலிருந்து வரும் சிரிப்பு எனக்கு மிகவும் பிடிக்கும். அவர் இங்கே நீண்ட காலம் நிலைத்திருப்பார் என்பதில் எந்த சந்தேகமும் இல்லை. அனஸ்வராவை எங்கே இருந்தீர்கள் இவ்வளவு நாள் என்று கேட்கத் தோன்றியது. இந்த படத்தில் அவர் மிக அழகாக நடித்துள்ளார். குறிப்பாக இறுதிக் காட்சியில் வரும் அமைதியும், மழையை பார்த்து அவர் சிரிக்கும் காட்சியும் எனக்கு மிகவும் பிடித்த தருணம்.

இயக்குநர் மதன் கதை சொன்னபோதே இது வெற்றிப் படம் என்ற நம்பிக்கை வந்தது. இரண்டாம் பாதியில் வரும் காட்சிகளும், இறுதியில் நான்கு கதாபாத்திரங்களும் ஒரே ஷாட்டில் சந்திக்கும் காட்சியும் முழுமையான டைரக்டர்ஸ் டச். அவரது அடுத்த படத்திற்கு நாங்கள் தயாராக இருக்கிறோம்.

இசையமைப்பாளர் ஷான் ரோல்டன் அனீஷா பாத்திரத்திற்கு போட்டது பத்து நிமிடத்தில் உருவான இசை என்பது நம்ப முடியாத மாயை. அந்த மேஜிக் அவரால் மட்டுமே முடியும். பாடலாசிரியர் மோகன், எடிட்டர் சுரேஷ், பிரஷாந்த் உள்ளிட்ட தொழில்நுட்ப குழுவினருக்கு மனப்பூர்வமான நன்றி. இந்த படம் வெறும் ‘நல்ல படம்’என்ற ஸ்டேட்டஸை தாண்டி, மக்கள் தங்கள் படமாக கொண்டாடுவது எங்களுக்கு கிடைத்த மிகப்பெரிய வெற்றி” என்று பேசினார் செளந்தர்யா ரஜினிகாந்த்.

’வித் லவ்’ படம் மக்கள் மத்தியில் வரவேற்பைப் பெற்றிருக்கிறது. இப்படம் வெளியாகும் முன்பே அனைத்து உரிமைகளும் விற்று, தயாரிப்பாளர்களுக்கு நல்ல லாபம் கிடைத்திருப்பது குறிப்பிடத்தக்கது.