“நான் நிறைய வெப் சீரிஸ் பார்ப்பேன்; மக்கள் விரும்புற, அவங்க தங்களோட தொடர்பு படுத்திப் பார்த்துக்கிற மாதிரியான கதைகளைச் சொல்லணும்னு எனக்கு ஆசை உண்டு. காதல் கதைகள் பண்ணணும்ங்கற ஆசையும் அதிகம். ஏன்னா, காதல் சொல்லிக் கொடுத்து வர்றதில்லை. அது இயல்பா மனசுக்குள்ள இருந்து வெளிப்படற விஷயம். அப்படி ஒரு காதலை சொல்றதுதான் ‘#லவ்’ வெப் சீரிஸ். நான் தயாரிச்ச ‘வித் லவ்’ பள்ளிக்காதலைத் திரும்பிப் பார்க்க வச்சது; இந்த ‘#லவ்’ வெப்தொடரும் வேற ஒரு விஷயத்தை பார்வையாளர்களுக்கு உணர வைக்கும்னு நம்பறேன்” என்கிறார், சவுந்தர்யா ரஜினிகாந்த்.
நெட்பிளிக்ஸில் வெளியாகி இருக்கிற இந்த #லவ் தொடரில் அர்ஜுன் தாஸ், ஐஸ்வர்யா லட்சுமி முதன்மை கதாபாத்திரங்களில் நடித்துள்ளனர். பாலாஜி மோகன் இயக்கி இருக்கிறார். தயாரிப்பாளர் சவுந்தர்யா ரஜினிகாந்திடம் பேசினோம்.
இந்த ‘#லவ்’ வெப் தொடருக்கு நீங்கதான் ஷோ-ரன்னர், கதை தேர்வில் இருந்து எல்லாத்துலயும் நீங்க இருந்திருக்கீங்க. இந்த தொடர்ல உங்களை ஈர்த்த விஷயம்னு எதை சொல்லுவீங்க?
நான் காதலை ஆழமா நம்புறேன். காதலை மையமா வச்சு நிறைய கதைகள் வந்துட்டே தான் இருக்கு. அது ஒரு முடிவில்லாத உணர்வு. அது நேர்க்கோடு இல்லை, சில நேரம் ரொம்ப சிக்கலானது, அது சிக்கலா இருந்தாலும் இந்த கதையில வர்ற இரண்டு முக்கிய கதாபாத்திரங்களான மேத்யூ (அர்ஜுன் தாஸ்), தாராவோட (ஐஸ்வர்யா லட்சுமி) காதல் கதை தவிர, மற்ற சில கதைகளும் இருக்கு. அதனாலதான் #லவ்-னு டைட்டில் வச்சோம். நானும் ஸ்கிரிப்ட் ரைட்டர் நிர்மலும் இந்த தொடருக்கான கதையை எழுத ஆரம்பிக்கும் போதே, இந்த கதாபாத்திரங்கள், எல்லோரும் ஏத்துக்கற மாதிரி இருக்கணும்னு நினைச்சோம். அதுமாதிரி அமைஞ்சது.
இந்த டைட்டில்ல ‘லவ்’-க்கு முன்னால ‘ஹேஷ்டேக்’ இருக்கே, ஏன்?
‘ஹேஷ்டேக்’ அப்படிங்கறது இப்ப வெறும் சிம்பல் இல்லை. அது ஒரு அடையாளமாகவே மாறிடுச்சு. ஹேஷ்டேக் அப்படிங்கறது ஜென்-ஸி வார்த்தை. அது எவ்வளவு மாடர்னா இருந்தாலும் காதல் அப்படிங்கற உணர்வு காலத்தை கடந்தது. இன்றைய தலைமுறையினருக்கு, இன்றைய காலகட்டத்து மொழியில சொல்லணுங்கறதுக்காக அப்படி தலைப்பு வச்சோம்.
ஜென்-ஸிக்கான காதல்தான் கதையா?
நான் வளரும்போது காதல் மாதிரியான உறவுகளை வெளிப்படையா குடும்பங்கள்ல பேச முடியாது. இதை பத்தி எப்படி பேசறது, சொல்றது, அப்படிங்கற தயக்கம் இருந்த காலம் அது. சமூக ஊடகங்கள் வளர்ந்திருக்கிற இந்தக் காலகட்டத்துல எதுக்கும் தடையில்லை, தயக்கம் இல்லை. எதையும் எளிமையா சொல்ல முடியுது, பேச முடியுது. இதை பரிணாம வளர்ச்சின்னும் சொல்லலாம். இந்த #லவ் தொடர்ல பல்வேறு விதமான, பலதரப்பட்ட காதல்களைச் சொல்லியிருக்கோம். இதுல ஜென்- ஸி இளைஞர்கள் கனெக்ட் ஆவாங்கன்னு நினைக்கிறேன்.
ஒரு த்ரில்லர் அல்லது க்ரைம் மாதிரியான வெப்தொடர்கள்ல ஒவ்வொரு எபிசோடு முடியும்போது, ஒரு சஸ்பென்ஸ் இருக்கும். அது அடுத்த எபிசோடை பார்க்கறதுக்கு இழுக்கும். காதல் கதையில அப்படி என்ன இருக்கும்?
இதுலயும் இருக்கு. அதுக்காகவே எடிட்டிங் இதுக்கு பெரிய சவாலா இருந்தது. ஒவ்வொரு எபிசோடு முடியும் போதும் அடுத்து என்ன என்கிற ஆர்வத்தைத் தூண்டுறதுதான் இதுல முக்கிய சவால். ‘நான்- லீனியரா’க இருந்தா கூட அந்த எதிர்பார்ப்பு ஒவ்வொரு எபிசோடு முடிவுலயும் இருக்கும். கதை எழுதும்போது அது முக்கியம்னு முடிவு பண்ணிதான் எழுத ஆரம்பிச்சோம்.
இயக்குநர் பாலாஜி மோகனை எப்படி இதுக்குள்ள கொண்டு வந்தீங்க?
திரைப்படமா இருந்தாலும் சரி, வெப் சீரிஸா இருந்தாலும் சரி, டீம் அமையறதும் அமைக்கிறதும் ரொம்ப முக்கியம். நானும் என் எழுத்தாளர்களும் இந்தக் கதையை ரெடி பண்ணிட்டு, யாரை டீமுக்குள்ள கொண்டு வரலாம்னு யோசிப்ப, இதை இயக்கறதுக்கு பாலாஜி மோகன்தான் சரியான நபர்னு முடிவு பண்ணினோம்.
காதல் ஜானரை அவர் நல்லா இயக்குவார்னு நம்பினோம். சில இயக்குநர்கள், சில ஜானர் படங்களை சிறப்பா இயக்குவாங்க. அதுபோல பாலாஜி மோகனுக்கு காதல் கதைகள் நல்லா வரும்னு அழுத்தமா நம்பினேன். அப்படித்தான் அவரை தேர்வு செய்தோம்.
அப்பா ரஜினிகாந்தை வச்சு ‘கோச்சடையான்’ பண்ணியிருக்கீங்க...
அது என் வாழ்நாள் முழுமைக்குமான படம். அந்த முயற்சி ஒரு மைல்ஸ்டோன். ‘கோச்சடையான்’ படம் இப்பவரை என்னோட அடையாளமாகவே இருக்குது. அதுல எனக்கு பெருமையாகவும் இருக்கு. ஏன்னா, இன்னைக்கு அனிமேஷன், மோஷன் கேப்சர் தொழில்நுட்பம் பற்றி எல்லோருக்கும் தெரியுது. நான் பண்ணும்போது அது புதுசு. யாருக்கும் புரியாத விஷயம்.
இப்போ அந்தடெக்னாலஜியை நிறைய பேர் பயன்படுத்தறாங்கன்னு நினைக்கும் போதே சந்தோஷமா இருக்கு. அடுத்து அப்பா கூட படம் பண்ற வாய்ப்பு கிடைக்குமான்னு தெரியாது. கிடைச்சா அது கடவுளின் அருளாகவும் அப்பாவின் ஆசீர்வாதமாகவும் இருக்கும். இப்ப சில படங்களும் வெப் தொடரும் தயாரிக்கிற பணிகள் போயிட்டிருக்கு. நான் இயக்கப் போற படத்துக்கான ஸ்கிரிப்ட் வேலைகளும் நடந்துட்டு இருக்கு.