யோகி பாபு கதையின் நாயகனாக நடித்துள்ள ‘சிங்காரம்’ படத்தை கே.வி.கதிர்வேலு இயக்கியுள்ளார்.
நரிக்குறவர் சமூகத்தைச் சேர்ந்த ஒருவர் அரசியலில் ஈடுபட்டு சட்டப்பேரவை உறுப்பினராக உயர்வதை மையமாகக் கொண்ட இப்படத்தில் வேல ராமமூர்த்தி, எம்.எஸ்.பாஸ்கர், மரியா வின்சென்ட், சாம்ஸ், ஆர்த்தி கணேஷ் உள்ளிட்ட பலர் முக்கிய கதாபாத்திரங்களில் நடித்துள்ளனர்.
சாம் சி.எஸ் இசை அமைத்துள்ள இப்படத்தை ராக் புரொடக் ஷன் சார்பில் ஏ.எஸ்.ரமண பாலாஜி மற்றும் பத்மாவதி காந்தி இணைந்து தயாரித்துள்ளனர். பிரசன்னா எஸ். குமார் ஒளிப்பதிவு செய்துள்ளார். அக். 30-ல் வெளியாகும் இப்படத்தின் இசை வெளியீட்டு விழா சென்னையில் நடைபெற்றது. படக்குழுவினருடன் இயக்குநர் ஆர்.வி.உதயகுமார் உள்பட பலர் கலந்து கொண்டனர்.
இயக்குநர் கே.வி. கதிர்வேலு பேசும் போது, “நரிக்குறவர் சமூகத்தினரின் வரலாறு மற்றும் பின்னணியை அறிந்துகொள்வதற்காக விரிவான ஆய்வுகளை மேற்கொண்டு இப்படத்தை உருவாக்கியுள்ளேன். சமூகத்தில் நிலவும் ஏற்றத்தாழ்வுகள், அதிகாரம் கொண்டவர்களுக்கு அளிக்கப்படும் மரியாதை, மற்றவர்கள் புறக்கணிக்கப்படுவது போன்ற பிரச்சினைகளையும் இப்படம் பேசும். நரிக்குறவர் சமூகத்தின் வரலாற்றுடன் அரசியல் சார்ந்த அம்சங்களும் இதில் இடம்பெற்றுள்ளது. சமூகக் கருத்துகளுடன் குடும்பத்துடன் ரசிக்கக்கூடிய படமாக உருவாகிஉள்ளது” என்றார்.