தி ஹர்ட் லாக்கர், ரன் லோலா ரன், குணா
ஒளிப்பதிவின் பெரும்பாலான நுட்பங்கள் ஒளி, நிழல், லென்ஸ், கோணங்களில் நிகழ்கின்றன. அவற்றில் மிகவும் முக்கியமான ஒன்று, நேரத்தை மாற்றும் திறன். நிஜ வாழ்க்கையில் நேரம் கடிகாரத்தில் நகர்கிறது. ஆனால் சினிமாவின் திரைநேரம் ஒளிப்பதிவாளர் மற்றும் படத்தொகுப்பாளர் ஆகியோரின் கைகளில் நிகழ்கிறது.
படைப்பில் ஒரு நிமிடம் என்பது பல நிமிடங்களாக நீளலாம். பத்தாண்டுகள் சில நொடிகளில் முடிந்து விடலாம். இந்த நுட்பம் சினிமாடிக் டைம் எனப்படும். சினிமாவில் நேரம் மூன்று வடிவங்களில் செயல்படுகிறது-சுருங்கிய நேரம் (கம்ப்ரெஸ்டு டைம்), உண்மையான நேரம் (ரியல் டைம்) மற்றும் நீட்டிக்கப் பட்ட நேரம் (எக்ஸ் டென்டட் டைம்). இவை ஒவ்வொன்றும் ஒளிப்பதிவின் ரிதம், காட்சியின் அமைப்பு, கேமரா அசைவு மற்றும் ஒரு ஷாட்டின் நேர அளவுகோல் மூலம் உருவாக்கப்படுகிறது.
சுருங்கிய நேரம் – கதை ஓடும் வேகம்: இது சினிமாவின் இயல்பான மொழி. இது எப்படிச் சாத்தியப்படுகிறது என்றால், காட்சியில் தேவையில்லாத இடைவெளிகள் அனைத்தும் அகற்றப்படும். கதை முன்னேறும் தருணங்கள் மட்டுமே திரையில் தோன்றும்.
எலிப்டிகல் ஃப்ரேமிங்: ஒளிப்பதிவாளர் ஒரு செயலின் முடிவை ஒரு ஃப்ரேமிலும், அடுத்த நிகழ்வின் தொடக்கத்தை மற்றொன்றிலும் அமைக்கிறார். உதாரணத்துக்கு ஒரு கதாபாத்திரம் “நாளை நான் மும்பை போகிறேன்” என்று சொல்கிறார்.
அடுத்த ஷாட்டில் நேரடியாக மும்பை விமான நிலையம் காட்டப்படும். நடுவிலிருந்த பயணம் திரையில் நிகழவே இல்லை, ஆனால் பார்வையாளரின் மனதில் நடந்துவிட்டது.
மாண்டேஜ் (காட்சித் தொடர்ச்சி) - ஒளிப்பதிவில் வேகமான அமைப்புகள், வேகமான ஷாட்டுகள், ஒத்த செயல்கள், மாறும் இடவெளிகள், ஃப்ரேமின் ரிதம், இவற்றின் மூலம் மாதங்கள், ஆண்டுகள் சில நொடிகளில் சுருங்கி விடுகின்றன.
இன்றைய பெரும்பாலான திரைப்படங்களின் சுமார் 90 சதவிகிதக் காட்சிகள், இந்த சுருங்கிய நேர நெறியைப் பின்பற்றுகின்றன. ஏனெனில், சினிமாவின் நோக்கம் ‘உண்மை நேரத்தை காட்டுவது’ அல்ல; ‘கதை உணர்ச்சியை முன்னேற்றுவது’தான்.
உண்மையான நேரம்: உண்மையான நேரம் என்பது, திரையில் ஒரு காட்சி ஓடும் நேரமும், அது கதையில் நடக்கும் நேரமும் ஒன்றாகவே இருக்கும் நுட்பம். இது சினிமாவில் மிகவும்அரிதாகப் பயன்படுத்தப்படும். ஆனால் சக்திவாய்ந்த முறையாகும்.
நுழைவு உணர்வு (இம்மெர்ஷன்) - கட் இல்லாமல் தொடர்ந்து ஓடும் காட்சி, பார்வையாளரை நேராக அந்த சூழ்நிலைக்குள் இழுத்துச் செல்கிறது. கதாபாத்திரத்தைத் தொடர்வது போல ஒரு நிஜ உணர்வு உருவாகிறது. காட்சியில் அழுத்தம் மற்றும் உணர்ச்சி உயர்வும் நிகழ்கிறது.
இடையே நிறுத்தம் இல்லாததால் ஓட்டம், பயம், பதற்றம் போன்ற உணர்வுகள் இன்னும் தீவிரமாக வெளிப்படும். பார்வையாளருக்கு ஒரு ‘தப்ப முடியாத’ உணர்வு உண்டாகும். உண்மையான நேரம் எப்படி உருவாக்கப்படும்? ஒரு காட்சி அல்லது ஒரு முழு சீக்வென்ஸ் எந்த கட்டும் இல்லாமல் தொடர்ந்து படமாக்கப்படும்.
நடக்கும் நிகழ்வு எப்படியோ, அதே நேரத்தில் திரையிலும் காட்சி ஓடுவதால் அதன் தாக்கம் அதிகரிப்பதோடு நம்பகத்தன்மையையும் கூட்டுகிறது. உதாரணமாக, ஒரு நடிகர் பாலத்திலிருந்து ஆற்றில் குதிக்கிறார். இதை ஒரு தொடர் ஷாட்டாக ரியல் டைமில் படமாக்கப்படுவதால், அந்த செயல் உண்மையாக நடந்தது போல உணரப்படுகிறது.
‘குணா’ திரைப்படத்தில் இடம்பெற்ற ஒரு புகழ்பெற்ற ரியல் டைம் காட்சியில் கமல்ஹாசன் ஓர் அறைக்குள் தொடர்ந்து நடந்து கொண்டே பேசுவார். முதலில் மெதுவாக நடக்கத் தொடங்கி போகப் போக நடையும், வசன உச்சரிப்பும், கேமரா நகர்வும் வேகமெடுக்கும்.
இதன் விளைவாக அந்தக் காட்சியின் உணர்ச்சி இன்னும் தீவிரமடைந்தது. ‘கட்’ இல்லாமல் படமாக்கப்பட்டதாலேயே கமல்ஹாசனும் ஒளிப்பதிவாளர் வேணுவும் மிகவும் பாராட்டப்பட்டனர்.
நீட்டிக்கப்பட்ட நேரம்: திரையில் நேரத்தை நீட்டிக்க ஸ்லோ மோஷன் (அதிக ஃப்ரேம் ரேட்டில் கேமரா இயக்கம்) ஓவர்லேப்பிங் ஆக் ஷன் மற்றும் மல்ட்டி கேமரா உத்திகளில் படமாக்குவது. ஒரே செயலை பல கோணங்களில் காட்சிப்படுத்தி மீண்டும் மீண்டும் காட்டுவதால், நேரத்தை நீட்டிக்க முடியும்.
தி ஹர்ட் லாக்கர் (2008) - போர்ப் பின்னணியில் உருவான இத்திரைப்படத்தில் குண்டுவெடிப்புக் காட்சிகள் அதீத ஸ்லோ மோஷனில் படமாக்கப்பட்டன. இதன் மூலம் காற்றில் பறக்கும் தூசி, உடைந்த பொருட்களின் சிறுதுண்டுகள், கதாபாத்திரங்களின் முகத்தில் தோன்றும் மிரட்சி இவை அனைத்தும் ஃப்ரேமில் நேரம் நீண்டது போன்ற உணர்வை ஏற்படுத்தியது.
இதன் நோக்கம், கணப் பொழுதில் நடக்கும் அதிர்ச்சியை பார்வையாளருக்கு நீட்டித்துக் காட்டுவதேயாகும். ஒளியைப் பயன்படுத்தும் திறனைப் போலவே, நேரத்தைக் கையாளும் திறனும் ஒளிப்பதிவாளருக்கு மிகவும் முக்கியமானது. சுருங்கிய நேரம் கதை முன்னேற்றத்தைத் துல்லியமாக வழி நடத்தும். உண்மையான நேரம் பார்வையாளரை காட்சிக்குள் அழைத்துச் செல்லும். நீட்டிக்கப்பட்ட நேரம் உணர்ச்சியை நொடிகளில் உறையச் செய்யும்.
காலத்தின் அமைப்பு – கதையின் நான்கு வழிகள்: நேர்கோட்டுக் கதை சொல்லல் முறை (லீனியர் காலம்) பாரம்பரிய கதை சொல்லல் உத்தியான இதில் கதை ஆரம்பத்தில் தொடங்கி நடுப்பகுதியாக வளர்ந்து, முடிவில் நிறைவடையும்.
சரியான கால ஓட்டத்தில் நகரும் கட்டமைப்பு. காரணம்–விளைவு வரிசை தெளிவாக இருக்கும். இதில் பார்வையாளருக்கு எளிய புரிதலும் சீரான உணர்ச்சிப் பயணமும் அளிக்கிறது.
நான்–லீனியர் காலம்: கதையின் நேர வரிசை முறையாகச் செல்லாமல் காட்சிகளில் காலத்தை முன் பின்னாக மாற்றி நிகழ்காலம், கடந்த காலம், எதிர்காலம் என தாவிச் செல்லும் முறையில் உருவாக்கப்படுவதே ‘நான் –லீனியர்’ படமாக்கல் உத்தி. இது கதையின் மர்மத்தையும் உணர்ச்சிக் கலக்கத்தையும் அதிகரிக்கிறது.
சுழற்சி காலம் (லூப் / சைக்ளிக்கல் டைம்) - ஒரு நிகழ்வு பலவிதமாக மீண்டும் மீண்டும் நிகழ்வது போல காட்சியமைக்கப்படும். இவ்வகையான திரைப்படங்களில் சில செய்கைகள், சில முடிவுகள், சுழற்சி வடிவில் திரும்பத் திரும்பத் தோன்றும்போது ஒவ்வொரு முறையும் ஒரு புதிய கோணத்தில் அணுகி பார்வையாளருக்கு ஒரு பரவச உணர்வையும் ஒரு முடிவில்லா பயண அனுபவத்தையும் அளிக்கிறது.
ரன் லோலா ரன், மாநாடு ஆகிய திரைப்படங்கள் முழுவதுமாகவே லூப் டைமில் படமாக்கப்பட்டவை. நிறுத்தப்பட்ட காலம் (சஸ்பெண்டட் டைம் இது, கதை முன்னேறாமல் நேரம் நின்றுவிட்டது போன்ற தோற்றத்தை உருவாக்குவது.
சினிமாவில் மிக ஆழமான உணர்ச்சி நிறைந்த தருணங்களை உருவாக்கும் உத்தி. இயக்குநர் அடூர் கோபாலகிருஷ்ணன், தனது எலிப்பத்தாயம் போன்ற படங்களில் நேரத்தை ஸ்டாட்டிக்காக அமைத்து ஒவ்வொரு தருணத்தையும் உன்னிப்பாகக் கவனிக்க வைப்பார்.
காட்சி நீளம் (ஷாட் ட்யூரேஷன்) - ஒரு காட்சி எவ்வளவு நேரம் நீடிக்க வேண்டும் என்பதை இது நிர்ணயிக்கிறது. நீண்ட காட்சிகளில் மூழ்கும் உணர்வும் குறுகிய காட்சிகளில் வேகமான ஆற்றலும் வெளிப்படும்.
கேமரா இயக்கம் (கேமரா மூவ்மென்ட்) - நேரத்தின் உணர்வை மாற்றக்கூடியவற்றில் முக்கியமானது கேமரா இயக்கம். மெதுவான அசைவு மூலம் நேரத்தை நீட்டிக்கச் செய்து எதிர்பார்ப்பையும், வேகமான அசைவு மூலம் அவசர உணர்வையும் அளிக்கும்.
திரையில் காலத்தை யார் உருவாக்குகிறார்கள்? - பார்வையாளர் ஒரு தருணத்தை எவ்வளவு நேரம் உணர வேண்டும் என்று தீர்மானிப்பவர் இயக்குநர். அந்தத் தருணம் எப்படி வெளிப்பட வேண்டும் என்று முடிவு செய்பவர் ஒளிப்பதிவாளர்.
அவை எப்போது முடிவடைய வேண்டும் என்பதைத் தீர்மானிப்பவர் எடிட்டர். இம்மூவரும் இணைந்து உருவாக்குவது பார்வையாளரின் “உணர்வுக் கடிகாரம்”. திரையில் நேரம் இயற்கை நேரம் அல்ல. அது படக்குழு உருவாக்கும் ‘திரைக்காலம்’
(புதன் தோறும் ஒளிகாட்டுவோம்)
- cjrdop@gmail.com