நடிகர் விஜய் விஷ்வா
குரு சோமசுந்தரம், அனுமோள், அர்ச்சனா குமார், விஜய் விஷ்வா உள்ளிட்டோர் நடித்துள்ள படம், ‘பாரிஸ் கஃபே’. இப்படத்தைக் கண்மணி ரங்கநாதன் தயாரித்துள்ளார்.
சரஜ் சீலன் இயக்கியுள்ள இதில் நடித்தது பற்றி நடிகர் விஜய் விஷ்வா கூறியதாவது: இந்த படத்தில் அமெரிக்காவில் இருக்கும் கவின் என்கிற ஆய்வாளராக நடித்திருக்கிறேன். எனது தோழியின் தந்தையாக குரு சோமசுந்தரம் நடித்திருக்கிறார். இங்கு நடக்கும் ஒரு சம்பவத்துக்காக நான் அமெரிக்காவில் இருந்து வருகிறேன். பிறகு என்ன நடக்கிறது என்பது கதை. காதல் கொலை தொடர்பாக ஒரு முக்கியமான கருத்தை இந்தப் படம் பேசுகிறது.
இது தொடர்பான படங்களில் வழக்கமாகப் பேசப்படும் விஷயமாக இல்லாமல் புதிதாக சில விஷயங்களைச் சொல்லியிருக்கிறோம். இப்படத்துக்குப் பிறகு மேலும் 2 படங்களில் நடித்து வருகிறேன். வெப் தொடர் ஒன்றிலும் நடிக்கிறேன். திரைத்துறைக்கு வந்தது முதலே சமூக சேவைகளில் ஆர்வமாக ஈடுபட்டுக்கொண்டு வருகிறேன். இதற்காக ‘விவி என்டர்டெயின்மென்ட்’ என்ற நிறுவனத்தின் மூலம் பல்வேறு உதவிகள் செய்து வருகிறோம்.
பெண்கள் பாதுகாப்புக்காக ஷீல்டு என்ற அமைப்பை உருவாக்கி இருக்கிறோம். போதைப் பொருட்களுக்கு எதிராக விழிப்புணர்வு, மொபைல் அடிக் ஷனில் இருந்து குழந்தைகளை மீட்பது உள்பட பல்வேறு விஷயங்களுக்காக விழிப்புணர்வு நிகழ்ச்சிகளை நடத்தி வருகிறோம். இதற்கு மக்களிடம் நல்ல வரவேற்பு கிடைத்து வருகிறது” என்றார்.