சினிமா எடிட்டிங்கில் இதுவரை பார்த்த ‘இன் விசிபிள் கட்’ அல்லது ‘கட் ஆன் ஆக் ஷன்’ போன்ற நுட்பங்கள் அனைத்தும் ஒரு காட்சியைத் தடையின்றி (சீம்லெஸ்) காட்டுவதையே நோக்கமாகக் கொண்டவை.
ஆனால், அந்த விதிகளை உடைத்து, எடிட்டிங் செய்யப்பட்டுள்ளது என்பதைப் பார்வையாளருக்குத் தெள்ளத்தெளிவாகக் காட்டும் நுட்பம்தான் ‘ஜம்ப் கட்’ (Jump Cut). ஒரு தொடர்ச்சியான ஷாட்டில், இடையில் இருக்கும் சில வினாடிகளை வெட்டி எடுத்துவிட்டு, மீதமுள்ள பகுதியை இணைக்கும்போது உருவாகும் அந்த ‘குதிப்பு’ (ஜம்ப்), சினிமாவின் இலக்கணத்தையே மாற்றியமைத்தது.
ஜீன்-லூக் கோடார்ட்: ஜம்ப் கட்டின் பிதாமகன்
1960-களில் உருவான ‘பிரெஞ்சு நியூவேவ்’ இயக்கத்தின் நாயகன் ஜீன்-லூக் கோடார்ட், தனது முதல் படமான ‘பிரத்லெஸ்’ (Breathless / bout de souffle) மூலம் ஜம்ப் கட் நுட்பத்தை உலகுக்கு அறிமுகப்படுத்தினார்.
ஏன் ஜம்ப் கட்?
அந்தக்காலத்தில் ஒரு படம் நீளமாக இருந்தால், தேவையற்ற காட்சிகளை நீக்குவார்கள். ஆனால் கோடார்ட், ஒரு நீண்ட ஷாட்டுக்குள்ளேயே தேவையற்ற வினாடிகளை வெட்டி எறிந்தார்.
விளைவு: ஒரு கதாபாத்திரம் காரில் பயணிக்கும்போது, பின்னணி மட்டும் திடீர் திடீரென மாறும், ஆனால் கதாபாத்திரம் அதே நிலையில் இருப்பார். இது அந்த கதாபாத்திரத்தின் ஒருவிதமான ‘அந்நியப்படுதல்’ உணர்வையும் பார்வையாளருக்குக் கடத்தியது. “எடிட்டிங் என்பது மறைத்து வைக்கப்பட வேண்டியது அல்ல; அது ஒரு கலை என்பதைப்பார்வையாளர் உணர வேண்டும்” என்பது கோடார்ட்டின் தத்துவம்.
இசைப் படங்கள்: நடனத்தின் வேகம்
இசைப் படங்களில் ஜம்ப் கட் ஒரு வரப்பிரசாதம். ஒரு பாடலில் உணர்ச்சிகள் உச்சத்தில் இருக்கும்போது, காலத்தைக் கடத்த இது பயன்படுகிறது.
நடன அசைவுகள்: நடனக் கலைஞர் ஒரு சுழற்சியைத் தொடங்கும்போது ஒரு கோணத்திலும், அந்தச் சுழற்சியின் நடுவில் அடுத்த கோணத்துக்கும் ஜம்ப் கட் செய்யும்போது, அந்த நடனத்தின் வேகம் அதீதமாகத் தெரியும்.
பாடல் காட்சிகள்: 3 நிமிடப் பாடலுக்குள் பல மாதங்கள் அல்லது பல இடங்களைக் காட்ட வேண்டியிருக்கும்போது, ஜம்ப் கட் ஒரு பாலமாகச் செயல்படுகிறது. ஓர் உடையில் இருக்கும் கதாபாத்திரம், அடுத்த மைக்ரோ செகண்டில் மற்றொரு உடையில் அதே அசைவைத் தொடர்வது ‘மேட்ச் கட்’ கலந்த ஜம்ப் கட் ஆகும்.
‘அபூர்வ சகோதரர்கள்’ இந்திய சினிமாவில் ஜம்ப் கட் நுட்பம் மிகவும் ஆக்கப்பூர்வமாகக் கையாளப்பட்டுள்ளது. குறிப்பாக, கமல்ஹாசன் - சிங்கீதம் சீனிவாச ராவ் கூட்டணியில் வெளியான ‘அபூர்வ சகோதரர்கள்’ ஒரு சிறந்த உதாரணம்.
அப்புவின் அசைவுகள்: குள்ளமான அப்பு கதாபாத்திரத்தின் அசைவுகளில் விசித்திரமான வேகம் இருக்கும். அவர் ஒரு மேஜையிலிருந்து இன்னொரு இடத்துக்குத் தாவும்போதும், சண்டையிடும் போதும் ஜம்ப் கட் நுட்பம் அந்த கதாபாத்திரத்தின் சுறுசுறுப்பை அதிகப்படுத்தப் பயன்படுத்தப்பட்டது.
கமல்ஹாசன் தனது பல படங்களில், (உதாரணமாக ‘ஹே ராம்’, ‘விருமாண்டி’) ஜம்ப் கட்டுகளை கதாபாத்திரத்தின் குழப்பமான மனநிலையைக் காட்டப் பயன்படுத்தியிருப்பார். ஒரு நபர் ஒரே இடத்தில் அமர்ந்து யோசிக்கும்போது, அவர் வெவ்வேறு கோணங்களில் திடீர் திடீரெனத் தோன்றுவது அவரது மனவோட்டத்தின் வேகத்தைக் குறிக்கும்.
ஜம்ப் கட்டின் உளவியல் தாக்கம்:
சாதாரணமாக எடிட்டிங் என்பது கண்ணுக்குத் தெரியாதவாறு இருக்க வேண்டும் என்று நாம் பார்த்தோம். ஆனால் ஜம்ப் கட் ஏன் பயன்படுத்தப்படுகிறது? பதற்றம்: ஒரு த்ரில்லர் காட்சியில், கதாபாத்திரம் பயந்து கொண்டிருக்கும்போது, ஜம்ப் கட்டுகள் அந்தப் பயத்தை அதிகப் படுத்தும். காட்சி நிலைபெறாமல் ‘குதிப்பது’ பார்வையாளருக்கு ஒருவித அசவுகரியத்தைத் தரும்.
காலத்தைச் சுருக்குதல்: ஒரு நபர் மிக நீண்ட தூரத்தை நடந்து கடப்பதைக்காட்ட 5 நிமிடங்கள் தேவையில்லை. 10 வினாடிகளுக்குள் 5 ஜம்ப் கட்டுகளைப் பயன்படுத்தினால், அவர் வெகுதூரம் கடந்துவிட்டார் என்பதைப் பார்வையாளர் புரிந்து கொள்வர்.
ஆற்றல்: வேகமான ஆக் ஷன் அல்லது இசை காட்சிகளில் இது ஒரு துடிப்பான உணர்வைத் தரும்.
ஒளிப்பதிவாளரின் நிபுணத்துவம்
ஒரு ஜம்ப் கட் சிறப்பாக அமைய ஒளிப்பதிவாளர் சில விஷயங்களைக் கவனிக்க வேண்டும்:
30-டிகிரி விதி: ஒரு ஷாட்டுக்கும் அடுத்த ஷாட்டுக்கும் இடையே கேமரா கோணம் 30 டிகிரிக்கும் குறைவாக மாறினால், அது தற்செயலான ஜம்ப் கட் போலத் தெரியும் (பிழை போலத் தெரியும்). ஆனால் வேண்டுமென்றே ஜம்ப் கட் செய்யும்போது, அதே கோணத்தில் நின்றுகொண்டு காலத்தை மட்டும் வெட்டுவது ஒரு பாணியாகப் பின்பற்றப்படுகிறது.
லுக் ரூம்: ஜம்ப் கட் செய்யும்போது கதாபாத்திரத்தின் பார்வைத் திசை மாறாமல் இருப்பது அவசியம். இல்லையெனில், பார்வையாளர் திசை தெரியாமல் குழம்பிவிடுவர். பின்னணி மாற்றம்: கதாபாத்திரத்தின் அசைவை விட பின்னணியில் ஏற்படும் மாற்றமே ஜம்ப் கட்டை அழகாக்கும்.
உலக சினிமாவில் நவீன உதாரணங்கள்
இன்று ஜம்ப் கட் என்பது ஒரு பொதுவான நுட்பமாக மாறிவிட்டது. பிரேசிலிய படமான ‘சிட்டி ஆஃப் காட்’-ல், போதைப்பொருள் கும்பல்களின் வாழ்க்கையை விவரிக்க ஜம்ப் கட் அதீதமாகப் பயன்படுத்தப்பட்டது. இது அவர்கள் வாழ்வின் நிச்சயமற்ற தன்மையைக் காட்டியது.
யூ-டியூப் மற்றும் சமூக ஊடகங்கள்: இன்று சிறிய வீடியோக்கள் முதல் பெரிய படங்கள் வரை, பேச்சில் இருக்கும் இடைவெளிகளை நீக்கி வேகத்தைக் கூட்ட ஜம்ப் கட் அடிப்படைத் தேவையாகிவிட்டது.
விதிகளின் மீறலே கலை
சினிமா விதிகளால் ஆனது; ஆனால் அந்த விதிகளை எப்போது மீற வேண்டும் என்று தெரிந்துகொண்ட பிறகு செயல்படுத்துவதே சிறந்த கலைஞனின் அடையாளம். ‘இன்விசிபிள் கட்’ அமைதியைக் கொடுத்தால், ‘ஜம்ப் கட்’ அதிர்ச்சியைத் தருகிறது. கோடார்ட் ஒரு விபத்தைப் போலத் தொடங்கிய இந்த நுட்பம், இன்று சினிமாவின் மிக வலிமையான மொழிகளில் ஒன்றாகத் திகழ்கிறது.
புரொஃபைல் ஷாட்கள், மீடியம் லாங் ஷாட்கள், ஸ்மாஷ் கட்டுகள் மற்றும் பெர்க்மேன் ஷாட்கள் என நாம் விவாதித்த அனைத்தும் ஒரு கோர்வையாக இணையும்போது, ஜம்ப் கட் என்பது அந்த மாலையில் கோர்க்கப்பட்ட ஒரு வைரக்கல்லாக ஜொலிக்கிறது. இது ஒரு கலை மட்டுமல்ல; மாறாக, காலத்தை நம் விருப்பப்படி வளைக்கும் ஒரு மந்திரக்கோல்.
(புதன்தோறும் ஒளிகாட்டுவோம்)
- cjrdop@gmail.com