ஒளிப்பதிவாளர்களுக்கு நீர், ஓர் ‘இயக்கமுள்ள கண்ணாடி’ (Moving Mirror). அது அமைதியாக இருக்கும்போது தியான நிலையையும், கொப்பளிக்கும்போது பேரழிவையும் உணர்த்துகிறது. நீர், ஒரு காட்சியின் ஆழத்தையும் ஒளியின் தன்மையையும் மாற்றும் வலிமையான ஊடகம்.
நீரின் வெவ்வேறு வடிவங்களும் அவற்றின் உளவியலும்
ஒவ்வொரு நீர்நிலையும் தனித்துவமான காட்சி மொழியைக் கொண்டுள்ளது. ஒளிப்பதிவாளர் கதையின் தேவைக்கேற்ப இவற்றைப் பயன்படுத்துகிறார்.
கடல் (The Infinite Sea): இது எல்லையற்ற தன்மையையும், தனிமையையும் குறிக்கிறது. அலைகளின் ஓயாத சத்தம் ஒருவிதமான ‘பதற்றத்தை’ (Anxiety) உருவாக்கும்.
ஏரி (The Still Lake): ஏரியின் அசைவற்ற நீர் ‘நிசப்தமான பயங்கரத்தை’ உருவாக்க வல்லது. இது ரகசியங்களின் இருப்பிடமாகக் காட்டப்படுகிறது.
நீர்வீழ்ச்சி (The Powerful Falls): இது ஒரு ‘வெர்டிகல் டைனமிசத்தை’ காட்சிக்கு வழங்குகிறது. இது ஒரு மாபெரும் சக்தியாகவோ அல்லது காதலின் தீவிரமாகவோ வெளிப்படும்.
குழாய்கள் மற்றும் சொட்டு நீர் (Taps & Drips): சிறிய குழாயிலிருந்து சொட்டும் நீர், ஒரு கதாபாத்திரத்தின் பதற்றத்தை (Tension) அல்லது வறுமையின் விரக்தியைச் சொல்லும் ஒரு நுணுக்கமான கருவி.
பிரதிபலிப்புகள் (Reflections) மற்றும் இரட்டைத்தன்மை
நீரின் மிக முக்கியமான அம்சம் அதன் பிரதிபலிக்கும் தன்மை.
உளவியல் பிரதிபலிப்பு: ஒரு கதாபாத்திரம் அசைவற்ற நீர்நிலையின் முன் நிற்கும் போது, நீரில் விழும் அதன் பிம்பம் அந்தக் கதாபாத்திரத்தின் உள்மனப் போராட்டத்தை அல்லது ஒரு மாற்று ஆளுமையை (Alter ego) வெளிப்படுத்தப் பயன்படும்.
இரவு நேரக் காட்சிகளில், நீரின் மீது விழும் விளக்குகளின் பிரதிபலிப்பு காட்சிக்கு ஓர் ஆழமான பின்னணியையும் (Depth), ஒருவித மர்மத்தையும் வழங்குகிறது.
‘ஜாஸ்’ (Jaws): கடலும் அறியப்படாத அச்சமும்
இயக்குநர் ஸ்டீவன் ஸ்பீல்பெர்க் மற்றும் ஒளிப்பதிவாளர் பில் பட்லர் கூட்டணியில் உருவான ‘Jaws’ (1975) திரைப்படம், நீரை ஒரு அச்சுறுத்தும் கதாபாத்திரமாக மாற்றியது.
உணர்ச்சிகளின் ஊற்றாக நீர்
கடல் மட்டக் கோணம் (Water-Level Shots): இந்தப் படத்தில் கேமரா பெரும்பாலும் நீரின் மட்டத்திலேயே வைக்கப்பட்டிருக்கும். இது பார்வையாளரை ஒரு இரையாக (Prey) உணர வைக்கும்.
கடல் பயணம் (Sea Voyage): ஒரு சிறிய படகில் எல்லையற்ற கடலுக்கு நடுவே கதாபாத்திரங்கள் பயணிக்கும்போது, அந்த நீர்ப்பரப்பு அவர்களைத் தனிமைப் படுத்துகிறது. இங்கே கடல் தப்பிக்க முடியாத போர்க்களமாக மாறுகிறது.
‘அச்சமில்லை அச்சமில்லை’: கதாபாத்திரமாக மாறும் நீர்வீழ்ச்சி இயக்குநர் கே.பாலசந்தர் மற்றும் ஒளிப்பதிவாளர் பி.எஸ்.ரகுநாத ரெட்டி கூட்டணியில் உருவான ‘அச்சமில்லை அச்சமில்லை’ படத்தில் நீரை ஒரு கதாபாத்திரமாகவே கையாண்டனர்.
நீர்வீழ்ச்சியின் தீவிரம்: இப்படத்தில் வரும் நீர்வீழ்ச்சி வெறும் இயற்கை அழகுக்காகப் பயன்படுத்தப்படவில்லை. அது கதையின் உணர்ச்சிகரமான உச்சகட்டங்களின்போது ஒரு மவுன சாட்சியாகவும், தீவிரமான பின்னணியாகவும் செயல்படுகிறது. கொட்டும் நீர்வீழ்ச்சியின் வேகம், அரசியலில் நிலவும் கொந்தளிப்பையும், கதாபாத்திரங்களின் மனப் போராட்டத்தையும் குறியீடாக உணர்த்தும்.
ஏன் நீர் நீல நிறமாகத் தெரிகிறது? (The Science of Blue)
ஒளிப்பதிவாளர்கள் உணர்ச்சியை வெளிப்படுத்த நீரின் நிறத்தைப் பயன்படுத்துகின்றனர்.
அறிவியல்: சூரிய ஒளி நீரில் படும்போது, நீரின் மூலக்கூறுகள் நீண்ட அலைநீளம் கொண்ட சிவப்பு நிறத்தை உறிஞ்சிக் கொள்கின்றன. குறுகிய அலைநீளம் கொண்ட நீல நிறத்தை மட்டும் சிதறடிக்கின்றன.
மூட்: இந்த நீல நிறம் திரையில் ‘குளிர்ச்சியை’ (Cold tone) உணர்த்தப் பயன்படுத்தப்படுகிறது. இதற்கு நேர்மாறாக, கலங்கிய நீர் (Muddy Waters) ஒரு கதையில் நிலவும் குழப்பம் அல்லது வறுமையைக் குறிக்கும்.
‘மிஷன் இம்பாசிபிள்’ (1996): நீர்நிலை வெடிப்பு திரைப்பயணத்தில் நீரின் அழிவுச் சக்தியைச் சரியாகப் பயன்படுத்திய ஒரு காட்சி ‘மிஷன் இம்பாசிபிள்’ படத்தில் வரும் அந்த ராட்சத மீன் தொட்டி வெடிக்கும் காட்சி. இதில் 16 டன் தண்ணீர் ஒரே நேரத்தில் வெடித்துச்சிதறியது.
ஒளிப்பதிவாளர் ஸ்டீபன் ஹெச். பரம், அந்த நீரின் வேகத்தை ‘ஸ்லோ-மோஷன்’ தொழில்நுட்பத்தில் படம்பிடித்து, அதன் விசை (Kinetic Energy), ஒரு மனிதனை எப்படி நிலைகுலையச் செய்யும் என்பதைக் காட்சிப்படுத்தினார்.
ஒளிப்பதிவாளர்களுக்கான தொழில்நுட்பச் சவால்கள்
நீரைப் படம்பிடிப்பது என்பது கலை மற்றும் அறிவியல் இரண்டும் இணைந்தது.
கிளேர் (Glare): நீரின் மேல் படும் ஒளி கேமரா லென்ஸிற்குள் ஊடுருவிப் பிம்பத்தைச் சிதைக்கும். இதைத் தவிர்க்க ‘போலரைசிங் ஃபில்டர்கள்’ பயன்படுத்தப் படுகின்றன.
ஒளி விலகல் (Refraction): நீருக்கு அடியில் படம்பிடிக்கும்போது பொருட்கள் அவற்றின் உண்மையான இடத்தை விடச் சற்றுத் தள்ளித் தெரியும்.
ஒளி விலகல்: பிம்பச் சிதைவிற்கான தீர்வு
நீருக்கு அடியில் படம்பிடிக்கும்போது ஒளி விலகல் காரணமாகப் பொருட்கள் அவற்றின் உண்மையான அளவை விட 33% பெரியதாகவும், நெருக்கமாகவும் தெரியும். இதைச் சரிசெய்ய ஒளிப்பதிவாளர்கள் இரண்டு முக்கிய உத்திகளைக் கையாள்கின்றனர்:
டோம் போர்ட் (Dome Port): கேமரா ஹவுசிங்கின் முன்னால் தட்டையான கண்ணாடிக்கு பதிலாக, உருண்டையான ‘டோம்’ வடிவக் கண்ணாடியைப் பயன்படுத்துவது ஒளி விலகலால் ஏற்படும் உருமாற்றத்தைத் (Distortion) தடுத்து, பிம்பத்தின் தெளிவை (Sharpness) மீட்க உதவும்.
ஃபோகஸ் திருத்தம் (Focus Correction): நீரின் அடர்த்தியால் ஒளியின் வேகம் மாறுபடுவதால், லென்ஸை ‘மேனுவல்’ முறையில் துல்லியமாக ஃபோகஸ் செய்ய வேண்டும்.
நவீன கேமராக்களில் இதற்கெனப் பிரத்யேக ‘அண்டர்வாட்டர் மோட்’ இருந்தாலும், அனுபவம் வாய்ந்த ஒளிப்பதிவாளர்கள் பிம்பத்தின் ஆழத்தை (Depth of field) கருத்தில் கொண்டு மேனுவல் ஃபோகஸையே விரும்புவர்.
நீரைப் பின்னணியாகப் பயன்படுத்துவதற்கும், கேமராவைக் கொண்டு நீருக்கு அடியில் சென்று படம்பிடிப்பதற்கும் தொழில்நுட்ப ரீதியாகவும் அழகியல் ரீதியாகவும் வித்தியாசங்கள் உள்ளன.
நீரைப் பின்னணியாகப் பயன்படுத்துதல்
இது, காட்சியின் ‘டெக் ஷர்’ மற்றும் இயக்கத்தைத் தீர்மானிக்கிறது. சூரிய ஒளியின் எதிரொளிப்பு (Sparkle) பின்னணியில் இருக்கும்போது, அது ஒரு கவித்துவமான அழகைத் தரும். குறிப்பாக, நீரை ‘அவுட் ஆஃப் ஃபோகஸ்’ செய்யும்போது கிடைக்கும் ‘பொக்கே’ (Bokeh) விளைவு, காட்சியின் உணர்வைத் தீவிரப்படுத்தும்.
நீருக்கு அடியில் படப்பிடிப்பு
கேமரா நீருக்குள் நுழையும்போது, ஒளிப்பதிவின் விதிகள் மாறுகின்றன. ஒளி இழப்பு -நீர் அடர்த்தியான ஊடகம் என்பதால், ஆழம் செல்லச் செல்ல ஒளி குறை கிறது.
முதலில் சிவப்பு நிறம் மறையும், பிறகு மஞ்சள். ஆழமான பகுதிகளில் அனைத்தும் நீலமாகவோ அல்லது பச்சையாகவோ மாறும். இதனால் செயற்கை ஒளி அமைப்புகள் மற்றும் ‘கலர் கரெக் ஷன்’ ஃபில்டர்கள் அவசியமாகின்றன.
நீருக்கு அடியில் எடுக்கப்படும் காட்சிகள் ஒருவிதமான ‘எடையற்ற’ உணர்வைத் தரும். இது கதாபாத்திரங்களின் கனவு நிலையை, மரணப் போராட்டத்தை அல்லது மர்மமான உலகை சித்தரிக்க உதவும் உளவியல் காரணி.
‘ஜாஸ்’ படத்தில் ஒரு வேட்டையாடும் களமாகவும், ‘அச்சமில்லை அச்சமில்லை’ படத்தில் ஒரு கதாபாத்திரமாகவும் ‘மிஷன் இம்பாசிபிள்’ படத்தில் ஆயுதமாகவும் மாறுகிறது நீர். கடல், ஏரி, நீர்வீழ்ச்சி என நீரின் ஒவ்வொரு வடிவமும் ஒரு செய்தியைச் சொல்கிறது.
(புதன்தோறும் ஒளிகாட்டுவோம்)
- cjrdop@gmail.com