அமீர் இயக்கத்தில் ஆர்யா நடிக்கவிருக்கும் புதிய படத்தின் நாயகிக்கு ஐஸ்வர்யா ராஜேஷிடம் பேச்சுவார்த்தை நடத்தி வருகிறது படக்குழு.
ராகவன் இயக்கத்தில் ஆர்யா, கேதரீன் தெரசா உள்ளிட்ட பலர் நடிப்பில் உருவாகி வரும் படம் 'கடம்பன்'. சூப்பர் குட் பிலிம்ஸ் நிறுவனம் தயாரித்து வரும் இப்படத்தின் இறுதிகட்ட படப்பிடிப்பு கேரளாவில் நடைபெற்று வருகிறது.
'கடம்பன்' படத்தைத் தொடர்ந்து அமீர் இயக்கவிருக்கும் படத்தில் நடிக்க தேதிகள் ஒதுக்கியிருக்கிறார் ஆர்யா. முழுக்க மதுரையைச் சுற்றியுள்ள பகுதிகளில் இப்படத்தின் படப்பிடிப்பை நடத்த திட்டமிட்டு இருக்கிறார் இயக்குநர் அமீர்.
'பிச்சைக்காரன்' பட நாயகியான சாத்னா டைட்டஸிடம் நாயகி வேடத்துக்கு பேச்சுவார்த்தை நடத்தியது. அவருக்கு திருமணமானதால் தற்போது ஐஸ்வர்யா ராஜேஷிடம் பேச்சுவார்த்தை நடத்தி வருகிறது படக்குழு. படப்பிடிப்புக்கான தேதிகள் முடிவானவுடன் ஐஸ்வர்யா ராஜேஷ் ஒப்பந்தமாவது குறித்து இறுதி செய்யப்படும் என்று படக்குழு சார்பில் தெரிவித்தார்கள்.
மேலும், இப்படத்தின் இசையமைப்பாளராக யுவன், ஒளிப்பதிவாளராக ராம்ஜி ஆகியோர் பணியாற்ற இருக்கிறார்கள். படக்குழு முடிவானவுடன் அதிகாரபூர்வமாக அறிவிக்க படக்குழு திட்டமிட்டு இருக்கிறது. படத்தின் தலைப்பாக 'சந்தனத்தேவன்' என்ற பெயரை பரிசீலித்து வருகிறது படக்குழு.