மணிகண்டன் - விஜய் சேதுபதி இணையும் ஆண்டவன் கட்டளை

'காக்கா முட்டை' மணிகண்டன் இயக்கத்தில் விஜய் சேதுபதி நடிக்கவிருக்கும் படத்துக்கு 'ஆண்டவன் கட்டளை' எனப் பெயரிட்டு இருக்கிறார்கள்.

2015ம் ஆண்டில் அனைத்து தரப்பிலும் பெரும் வெற்றியடைந்த படம் 'காக்கா முட்டை'. தனுஷ் மற்றும் வெற்றிமாறன் இருவரது கூட்டு தயாரிப்பில் வெளியான இப்படத்தை மணிகண்டன் இயக்கி இருந்தார்.

அப்படத்தைத் தொடர்ந்து 'குற்றமே தண்டனை' என்னும் படத்தை இயக்கி இருக்கிறார். வித்தார்த், ஐஸ்வர்யா உள்ளிட்ட பலர் நடித்திருக்கும் இப்படத்தின் மூலமாக தயாரிப்பாளராக அறிமுகமாகிறார் வித்தார்த். இப்படம் மும்பை சர்வதேச திரைப்பட விழாவில் திரையிடப்பட்டு இருக்கிறது. பாடல்களே இல்லாத இப்படத்துக்கு இளையராஜா பின்னணி இசையமைத்திருக்கிறார்.

'குற்றமே தண்டனை' படத்தைத் தொடர்ந்து விஜய் சேதுபதி நாயகனாக நடிக்கவிருக்கும் படத்தை இயக்க, அப்படத்தை அன்புசெழியன் தயாரிக்க இருக்கிறார். இப்படத்தின் படப்பிடிப்பு அடுத்தாண்டு தொடங்க இருக்கிறது. இப்படத்துக்கு 'ஆண்டவன் கட்டளை' என்று தலைப்பிட்டு இருக்கிறார்கள். இப்படத்திலும் பாடல்களே இல்லையென்றும் பின்னணி இசை மட்டுமே என்றும் படக்குழு சார்பில் தெரிவித்தார்கள்.