'கபாலி' படப்பிடிப்புக்காக இன்று மலேசியாவுக்கு பயணமானார் ரஜினி. ஒரு மாதம் படப்பிடிப்பு நடைபெற இருக்கிறது.
ரஞ்சித் இயக்கத்தில் ரஜினி, ராதிகா ஆப்தே, கிஷோர், ருத்விகா, கலையரசன், தன்ஷிகா உள்ளிட்ட பலர் நடித்து வரும் படம் 'கபாலி'. சந்தோஷ் நாராயணன் இசையமைத்து வரும் இப்படத்தை தாணு தயாரித்து வருகிறார்.
சென்னையில் பல்வேறு இடங்களில் இப்படத்தின் படப்பிடிப்பு நடைபெற்று வந்தது. மலேசியாவில் தொடங்கவிருந்த படப்பிடிப்பைத் தான் சென்னைக்கு மாற்றி நடத்தி வந்தார்கள். இறுதியாக மலேசியாவில் படப்பிடிப்புக்கு மலேசிய அரசு அனுமதி அளித்தது.
அக்டோபர் 19ம் தேதி முதல் மலேசியாவில் 'கபாலி' படப்பிடிப்பு நடத்த படக்குழு திட்டமிட்டது. ஆனால், விசா பிரச்சினை உள்ளிட்ட அனைத்தையும் முடித்து கிளம்ப தாமதமானது. கடந்த வாரம் படக்குழு மலேசியா சென்றடைந்தது. ஆனால், ரஜினி எப்போது செல்லவிருக்கிறார் என்பது மட்டும் ரகசியமாக வைக்கப்பட்டது.
இந்நிலையில், இன்று காலை 'கபாலி' படப்பிடிப்புக்காக மலேசியாவுக்கு கிளம்பிச் சென்றார் ரஜினிகாந்த். இதனை அவருடைய மகள் ஐஸ்வர்யா தனுஷ் ட்விட்டர் தளத்தில் உறுதிப்படுத்தினார்.
நாளை முதல் மலேசியாவில் தொடங்கவிருக்கும் இப்படத்தின் படப்பிடிப்பு சுமார் ஒரு மாதம் நடத்த திட்டமிட்டு இருக்கிறார்கள். அதனைத் தொடர்ந்து கோவா மற்றும் பாங்காக் உள்ளிட்ட இடங்களில் நடத்த தீர்மானித்திருக்கிறார்கள்.