லோகேஷ் கனகராஜ் இயக்கத்தில் கமல்

'தளபதி 64' படத்தைத் தொடர்ந்து கமல் நடிக்கவுள்ள புதிய படத்தை இயக்கவுள்ளார் லோகேஷ் கனகராஜ். ராஜ்கமல் நிறுவனம் இந்தப் படத்தைத் தயாரிக்கவுள்ளது.

கார்த்தி, நரேன், தீனா, ஜார்ஜ் மரியான், அர்ஜுன் தாஸ் உள்ளிட்ட பலர் நடிப்பில் வெளியான படம் 'கைதி'. லோகேஷ் கனகராஜ் இயக்கத்தில் வெளியான இந்தப் படத்துக்கு நல்ல வரவேற்பு கிடைத்துள்ளது. தெலுங்கு மற்றும் மலையாளம் ஆகிய இரண்டு மொழிகளிலுமே டப்பிங் செய்யப்பட்டதால், இதர மொழியில் ரீமேக் உரிமைக்குக் கடும் போட்டி நிலவி வருகிறது.

'கைதி' வெளியாகும் முன்பே, விஜய் நடிக்கும் 'தளபதி 64' படத்தின் பணிகளைத் தொடங்கிவிட்டார் லோகேஷ் கனகராஜ். இதில் மாளவிகா மோகனன், விஜய் சேதுபதி, ஆண்டனி வர்கீஸ், கெளரி கிஷன் உள்ளிட்ட பலர் நடித்து வருகிறார்கள். சேவியர் பிரிட்டோ தயாரித்து வருகிறார். 2020-ம் ஆண்டு கோடை விடுமுறை வெளியீடாக இந்தப் படம் வெளியாகவுள்ளது.

இந்நிலையில், கமலின் நிறுவனமான ராஜ்கமல் நிறுவனத்துக்கு புதிய படமொன்றை இயக்க ஒப்பந்தமாகியுள்ளார் லோகேஷ் கனகராஜ். இதற்கான ஒப்பந்தமும் 'கைதி' படத்துக்கு முன்பாகவே முடிந்துள்ளது. இதில் கமல் நாயகனாக நடிக்க முடிவு செய்துள்ளார்.

'கைதி' படத்தை விளம்பரப்படுத்த லோகேஷ் கனகராஜ் அளித்த பேட்டிகளில் "டெல்லி கதாபாத்திரம் ’விருமாண்டி’ படத்தில் கமல் சாருடைய கதாபாத்திரத்தின் சாயல்தான்" என்று தெரிவித்திருந்தது குறிப்பிடத்தக்கது.

தற்போது 'கைதி' படத்துக்குக் கிடைத்த வரவேற்பால், லோகேஷ் கனகராஜுக்கு பல்வேறு வாய்ப்புகள் வருகின்றன. 'தளபதி 64' படத்தை முடித்துவிட்டு, கமல் நடிக்கும் படத்தை இயக்கவுள்ளார். அதனைத் தொடர்ந்தே 'கைதி 2' இயக்குவார் எனத் தெரிகிறது.