'அசுரன்' படத்தைப் பார்த்துவிட்டு, படக்குழுவினருக்கு கமல் வாழ்த்து தெரிவித்துள்ளார்.
வெற்றிமாறன் இயக்கத்தில் தனுஷ், மஞ்சு வாரியர், கென் கருணாஸ், டிஜே, பாலாஜி சக்திவேல் உள்ளிட்ட பலர் நடிப்பில் வெளியாகியுள்ள படம் 'அசுரன்'. வேல்ராஜ் ஒளிப்பதிவு செய்துள்ள இந்தப் படத்துக்கு ஜி.வி.பிரகாஷ் இசையமைத்துள்ளார். தாணு தயாரிப்பில் வெளியான இந்தப் படத்துக்கு விமர்சன ரீதியாகவும், வசூல் ரீதியாகவும் நல்ல வரவேற்பு கிடைத்துள்ளது.
மேலும், திரையுலகப் பிரபலங்கள் பலர் இந்தப் படத்தைப் பார்த்துவிட்டுப் படக்குழுவினருக்கு வாழ்த்துகளைத் தெரிவித்து வருகிறார்கள். தொடர்ச்சியாக தனுஷின் நடிப்பு, வெற்றிமாறன் இயக்கம், வெக்கை நாவலை அழகாகத் தழுவிய திரைக்கதை அமைப்பு, படத்தின் வசூல் நிலவரங்கள் என சமூக வலைதளத்தில் 'அசுரன்' குறித்த பேச்சாகவே இருக்கிறது.
இந்நிலையில், பிரத்யேகக் காட்சியில் 'அசுரன்' படத்தைப் பார்த்துள்ளார் கமல். அதனைத் தொடர்ந்து இயக்குநர் வெற்றிமாறன், தனுஷ் இருவரையும் தொலைபேசி வாயிலாக வெகுவாகப் பாராட்டியுள்ளார். மஞ்சு வாரியர் சென்னையில் இருந்ததால், அவரை நேரில் அழைத்துப் பாராட்டியதுடன், அவரது நடிப்பு குறித்து நீண்ட நேரம் உரையாடியுள்ளார்.
கமல் - மஞ்சு வாரியர் இருவரும் எடுத்துக்கொண்ட புகைப்படங்கள் இணையத்தில் வெளியாகியுள்ளன. மேலும், "நன்றி கமல் சார். 'அசுரன்' பார்த்துவிட்டு உங்களுக்கு எவ்வளவு பிடித்திருந்தது எனப் பகிர்ந்தமைக்கு நன்றி' எனத் தனது ட்விட்டர் பதிவில் தெரிவித்துள்ளார் மஞ்சு வாரியர்.
கமலிடம் கிடைத்த பாராட்டால் மிகவும் மகழ்ச்சியில் இருக்கிறது 'அசுரன்' படக்குழு.