எழில் இயக்கத்தில் ஜி.வி.பிரகாஷ் நடிப்பில் உருவாகும் 'ஆயிரம் ஜென்மங்கள்' படத்தின் ஃபர்ஸ்ட் லுக்கை வெளியிட்டுள்ளது படக்குழு.
ஜி.வி.பிரகாஷ் இசையமைப்பில் 'அசுரன்' படமும், நடிப்பு மற்றும் இசையில் '100% காதல்' படமும் வெளியாகியுள்ளது. இதில் 'அசுரன்' படத்தின் பின்னணி இசைக்கு நல்ல வரவேற்பு கிடைத்துள்ளது. ஆனால், '100% காதல்' படத்தில் நடிப்புக்கு போதிய வரவேற்பு கிடைக்கவில்லை.
இதனைத் தொடர்ந்து ஜி.வி.பிரகாஷின் நடிப்பில் அடுத்த வெளியீடாக 'ஜெயில்', 'ஐங்கரன்', 'காதலிக்க யாருமில்லை', '4ஜி' உள்ளிட்ட பல படங்கள் தயாராகி வருகின்றன. அவரது இசையமைப்பில் சூர்யா நடிக்கும் 'சூரரைப் போற்று' வெளியாகவுள்ளது.
இந்தப் படங்களின் பணிகளுக்கு இடையே, எழில் இயக்கத்தில் உருவாகும் படத்திலும் கவனம் செலுத்தி வந்தார் ஜி.வி.பிரகாஷ். 'ஆயிரம் ஜென்மங்கள்' எனப் பெயரிடப்பட்டுள்ள இந்தப் படத்தின் ஃபர்ஸ்ட் லுக்கை தற்போது வெளியிட்டுள்ளது படக்குழு.
ஹாரர் ஃபேன்டஸி படமான இதன் நாயகியாக ஈஷா ரெப்பா நடித்துள்ளார். சதீஷ் முக்கியக் கதாபாத்திரத்தில் நடித்துள்ளார். தற்போது இந்தப் படத்தின் படப்பிடிப்பு முடிந்து, இறுதிக்கட்டப் பணிகள் மும்முரமாக நடைபெற்று வருகின்றன.