விஜய் சேதுபதியின் அடுத்த தயாரிப்பு மேற்கு தொடர்ச்சி மலை

'ஆரஞ்சு மிட்டாய்' படத்தைத் தொடர்ந்து நடிகர் விஜய் சேதுபதி 'மேற்கு தொடர்ச்சி மலை' என்று பெயரிடப்பட்டுள்ள படத்தை தயாரிக்க இருக்கிறார்.

'புறம்போக்கு', 'நானும் ரவுடிதான்' உள்ளிட்ட பணிகளில் பிஸியாக இருக்கும் விஜய் சேதுபதி, மறுபுறம் படங்களை தொடர்ச்சியாக தயாரிக்க திட்டமிட்டு இருக்கிறார். ஏற்கெனவே பிஜு விஸ்வநாத் இயக்கத்தில் 'ஆரஞ்சு மிட்டாய்' எனும் படத்தில் நடித்து, தயாரித்திருக்கிறார் விஜய் சேதுபதி.

அப்படத்தின் இறுதிப் பணிகள் தீவிரமாக நடைபெற்று வருகிறது. விரைவில் அனைத்து பணிகளும் முடிந்து இசை வெளியீடு நடைபெற இருக்கிறது.

இதனைத் தொடர்ந்து 'மேற்கு தொடர்ச்சி மலை' எனும் படத்தை தயாரிக்க திட்டமிட்டு இருக்கிறார் விஜய் சேதுபதி.

இயக்குநர் சுசீந்திரனிடம் இணை இயக்குநராக பணியாற்றிய லெனின் பாரதி, 'மேற்கு தொடர்ச்சி மலை' படத்தின் மூலம் இயக்குநராக அறிமுகமாக இருக்கிறார். இளையராஜா இசையமைக்க, காசி விஸ்வநாதன் எடிட்டிங் பணிகளை மேற்கொள்ள இருக்கிறார். டிசம்பர் 2ம் வாரத்தில் படப்பிடிப்பு தொடங்க திட்டமிட்டு இருக்கிறார்கள்.