நடிகர் சிட்டிபாபு சென்னையில் உள்ள மருத்துவமனையில் உடல் நலக்குறைவால் காலமானார். அவருக்கு வயது 49.
வெள்ளித்திரை மற்றும் சின்னத்திரையில் காமெடி, குணச்சித்திர வேடங்களில் நடித்து வந்தவர் நடிகர் சிட்டிபாபு.
கடந்த திங்கட்கிழமை திடீரென்று மயக்கம் ஏற்பட்டது. இதனைத் தொடர்ந்து சென்னை முகப்பேரில் உள்ள மருத்துவமனை ஒன்றில் அவர் அனுமதிக்கப்பட்டார்.
மூளையில் உண்டான கட்டி காரணமாக தொடர் சிகிச்சைக்கு பிறகும் அவரது உடல்நிலையில் மாற்றம் இல்லாமல் இருந்தது. இதனைத் தொடர்ந்து, அவர் சென்னை ராயப்பேட்டை அரசு மருத்துவமனையில் அனுமதிக்கப்பட்டார்.
அங்கு மருத்துவர்கள் தீவிர சிகிச்சை அளித்து வந்தனர். புதன்கிழமை மாலை முதலே அவரது உடல்நிலை மேலும் மோசமடைந்து கோமா நிலைக்கு சென்றுவிட்டார்.
இந்நிலையில் நடிகர் சிட்டிபாபு இன்று மாலை சிகிச்சை பலனின்றி காலமானார்.
'தூள்', 'பாய்ஸ்', 'சிவகாசி' உள்ளிட்ட 50 க்கும் மேற்பட்ட திரைப்படங்களில் காமெடி, குணச்சித்திர கதாபாத்திரத்தில் நடித்தவர் சிட்டிபாபு. சின்னத்திரையில் 'காமெடி டைம்', 'அசத்தப்போவது யாரு' உள்ளிட்ட காமெடி நிகழ்ச்சிகளையும் தொகுத்து வழங்கினார் என்பது குறிப்பிடத்தக்கது.